15
Moap 'Bìq Hadrah
1 Bàu doi adroi ca Moap:
Joq 'nàng ta mòiq mang phôq Arò ta Moap
'bìq raliang wa hnhung đac;
ta mòiq mang, Kit da Moap
'bìq raliang wa hnhung đac!
2 Wì haq tŏc ta nòi tadreo da 'bài kiac,
trùh ta Đibôn ta nòi bôi ha'nhèq đòiq hmoi.
Jàn Moap hmoi ca Nêbô wa Mê-đê-ba.
Dìq ca gàu got ngùn wa dìq ca xàc mùm got hreo.
3 Dìq ca wì caxùnh eo briang lam roc trong ta phôq;
dìq ca wì hmoi loh bàc diac mat ti cùa hnem wa ti xàn chòq.
4 Wì ta Hêtbôn wa Ê-lê-a-lê dìq hmoi,
bàu hmoi jah tàng trùh ta Jahai.
Taiq 'màng aih lình da Moap dìq hmoi,
mahua yiang wì tarìt tariang.
5 Manoh au ua-ac ca Moap;
mangai jàn Moap cadàu mot trùh ta phôq Xoa wa ta Êlat Sê-li-sia.
Jò wì rai heo ta criang Luhit rai hmoi;
ti trong lam ta Hô-rô-na-im,
wì hmoi taiq bìac 'bìq raliang đac.
6 Ma jah 'màng aih diac cròng ta Nimrim khoi xŏt,
nhat khoi croh, nhat nga khoi cachìt,
pi i ca long leq ŏi rìh.
7 Taiq 'màng aih 'bài cùng hang wì ma jah wa dahwèq wì ma khoi hanìuq đòiq,
wì wê 'ràng dŏng dìq cwa hŏc diac Long Yùang Liu.
8 Bàu hmoi jàp ta gùng Moap,
bàu cachech trùh ta Ê-la-im, wa trùh ta 'Bê-e-ê-lim.
9 Diac cròng ta Đimôn 'yôm mahem,
mahaq au xôq 'ràng hòm can ranàc ca Đimôn,
aih thê baco hlari lam trùh ta 'bài mangai Moap ma claih,
wa 'bài mangai ŏi xrong ta gùng aih.