41
Dueknah Kawng
1 Aw dueknah, nang poeknah khaw khahing mai, A khuehtawn sokah a ngai aka mong taengah, Mawnnah om pawt tih, a soeprhaep kho aka buh taengah, Bi rhang tih buh an ngaikhuek la aka om taengah.
2 Aw dueknah na oltloek te metlam n'doe lah eh, vawtthoeknah om tih thadueng aka tla taengah tah. Patong loh a kae tih cungkuem aka mawn aka tang, kalthalh la aka om tih thinsennah boeih aka bawt taengah tah.
3 Nang hamtah dueknah oltloek te khaw rhih boeh, Nang hmai kah aka cet rhoek neh, na hnukah aka lo rhoek te khaw poek.
4 Hetah pum sa boeih hamla Boeipa kah oltloeknah coeng ni, Balae tih Khohni kah kongaih te na aek mai eh. Hingnah eh kum rha, kum yakhat, kum thawng khat lo sitoe cakhaw, Hell ah rhae n'dawt mahpawh.
Halang kah Yoekam
5 Hlangtholh kah a ca tah rhalawt ca lam ni a om, amih long te Pathen mingmueh khosak ni a vai uh.
6 Hlang tholh ca kha a rho ta poci ni, a tiingan khaw a yoeyah hil yah a poh ni.
7 A napa lailak te a ca rhoek loh a khotohnah ni, anih rhangneh kumhal yah a poh uh van dongah.
8 Anunae nang lailak rhoek aih, Khohni Pathen kah olkhueng aka voei rhoek aih.
9 Ca na khueh cakhaw, citcai ni a yaak eh guekcoinah ham ni a mih te na sak eh. Na paloe vaengah omngaih vetih, Na duek te khaw thaephoeinah hmulung la om coeng.
10 Diklai lamkah na lo bangla diklai la na mael ni, Lailak ngawn tah thaephoeinah lamloh pocinah a paan.
11 Pilnam long he pumsa dueknah dongah rhap uh, Tedae hlang tholh kah ming thae tah a phae yoeyah ni.
12 Na ming dongah khaw ngaithuennah khueh, Te tah namah lah muep hing vetih Suitlang a thawng khat lakah khaw oe ngai ni.
13 Khosak then khohnin tah n'tae thai, Tedae ming then tah a dungyan duela cak.
14 Ka ca aw, nang n'phaepnah soah a thuem neh rhoepnah neo om. Cueinah a phah neh hmuh mueh kawnthen, melae a phu aka om tloe eh?
Cikcoknah
15 A cueihnah nah a thuh hlang lakah tah, a angnah aka khoem te then ngai.
16 Te dongah ka ol dongah hinyahnah tueng sak, A tue takuem yahyongnah he then pawt tih, cikcoknah boeih pom he pom ham om pawh.
17 Na nu neh na pa mikhmuh ah na cuk na halh te khaw Ukkung mangpa hmaiah na laithae te khaw,
18 hlangcal laitloek hmai ah na boe te khaw, Pilnam rhaengpuei hmaiah olkhueng na poe khaw, Paya rhoihui hmai ah a thae la na om khaw,
19 Na om nah kho ah na huen te khaw yak saw. Olkhueh neh olhlo na phae te khaw, Buh kung ah kut na vikvawk soeh khaw, paeknah neh doenah dongah kho la na hmuep khaw,
20 Nang aka uem taengah ol na mueh khaw, Pumyoi bueng na dan te khaw,
21 Pacaboeina khaw rhenbihnah na hnawt te khaw, hlang buhham neh kutdoe na mom te khaw, Hlang yuu dongah na yalh te khaw,
22 A salnu pum dongah om na rhoi te khaw yak saw. A thingkong te khaw paan boeh, Paya hmuh olthae hlah boeh.
23 Kutdoe na paek hnukah olthae neh pahoi bawt boeh.