40
Hlanghing Patangnah
1 Bi tloh he hlang boeih ham a suen pah, Adam koca rhoek te hamkun a rhih la a nan. A manu bung lamkah a suntlak paek lamloh, mulhing boeih kah a manu taengla a mael hnin duela.
2 Thinko ngaihmangnah neh rhihnah he amih ham ni Te dongah a dueknah hnin ah tah a ngai cikcok uh.
3 Boei ngolkhoel dongah aka ngol rhoek khaw, laivai neh hmaiphu dongah aka kol sut khaw,
4 Didi himbai neh rhuisam aka khuem lamloh a pawn savawk a pai hlang hil ah khaw,
5 thintoeknah neh, uetnah neh, ngaihmangnah, mawnnah, dueknah rhihnah neh, tohhaemnah, puenpa khaw om Hlang he a thingkong dongah a yalh vaengah hlaem kah a ih vaengah khaw a ngai cikcok.
6 Kolkalh khaw duemnah a dang moenih, a ih vaengah khaw khothaih bangla thingthuel uh.
7 Hil-uepnah vel a pha vaengah vik haenghang, lunglilungla la rhihnah loh a let sak.
8 Mulhing boeih, hlanghing neh rhamsa taengah om, tedae hlang taengah a pueh voei rhih hilah om.
9 Dueknah, thii longnah, puenthae neh cunghang khaw, citcai khaw, khokha khaw, pocinah khaw, lucik khaw pai.
10 He boeih he tah halang ham ni a phueng pah, amik kongah ni diklai khaw tuili loh ana et.
11 Diklai lamkah tah diklai mael tih, Vaan lamkah tah vaan la mael.
Songrhainah khaw Cikngae mahpawh
12 Kavelh caaknah neh a thuem pawt tah poci ni, Tedae a then tangnah tah cak yoeyah ni.
13 A thuem mueh la aka boei khaw tuiva bangla kak, a pocinah khaw hlipuei khuikah rhaeh ol bangla cai.
14 Moeihoeih hlang tah omngaihnah a coeng sak, Tedae olkhueng a aek rhep poci ni.
15 Hlangmuen ca rhoek tah a paek yol, a yung khaw koh tih thael rhaep ah kingkaek.
16 Tuiva tui taengkah carhaek kung tah, a tloe khopol lakah yue a phuk.
17 Tedae rhennah he tah yoethennah dum bangla om, hlang doedannah he khaw dungyan duela nguel bal.
Omngaih Hingnah
18 Khuehtawn neh thapang loh khosak a tui sak, tedae thakvoh aka hmuh khaw then ngai bal.
19 Camoe neh khopuei kah imsak khaw pakhat ming longni a thoh, te lakah khaw cueihnah ka hmu tah then ngai bal. Saelhung neh cangpai loh hlang a boei sak Tedae a yuu khoboe aka then tah te rhoi lakah then.
20 Misur neh toembael loh ko a hoe sak, Tedae paya lungnah he te rhoi lakah then.
21 Phavi neh rhotoeng loh laa a tui sak Tedae olding tah te rhoi lakah then.
22 Mik loh sitlohnah neh sakthen te a nai, tedae cang sai hingsuep tah terhoi lakah then.
23 Paya neh pueipo he khaw n'doe yoeyah, Tedae yuu aka cueih he te rhoi lakah then ngai.
24 Huiko neh bomkung he tah ngaihmang tue kah ham ni Tedae doedannah loh te rhoi lakah a then la a hlawt.
25 Sui neh tangka loh paihmuen a cak sak Cilsuep then tah terhoi lakah a ngaihom ngai.
26 Boeinah neh thaomnah loh uepangnah a thoh, Tedae Boeipa rhih he te rhoi lakah then ngai.
27 Boeipa rhihnah tah yoethennah dum la om, thangpomnah lakah hlang a thing a cam ngai.
Rhaidaeng la Kutduennah
28 Ka ca, na khosak te buhbihnah la khuen boeh, m'bih lakah tah n'duek ham he then ngai.
29 Hlang loh a hui kah caboei bung a sawt vaengah, a khosak long te khaw khosaknah la a poek moenih. Pakhat long tah hlang kah buh an soah a yah a voeih, Tedae aka cueih neh a thuituen hlang tah amah tuem uh.
30 Yahdaeng kah a ka ah buhbih khaw a tui pah, Tedae a khuiah tah hmai la a ung pah coeng.