14
Boeipa loh Ezra a Tueihnah
1 A hnin thum dongkah thingnu hmuiah ka ngol, ka hmaidan kah tangpuem khui lamloh ol ha thoeng tih, “Ezra, Ezra!,” a ti.
2 Te dongah ka doo tih, “Boeipa ka om he,” ka ti nah tih ka kho dongah ka pai.
3 Te vaengah amah loh kai te, “Kai he tangpuem dongah ka phoe tih, ka pilnam loh Egypt kah hloong dongah a om vaengah Moses t eka voek.
4 Anih te ka tueih tih ka pilnam te Egypt lamloh ka mawt. Anih te Sinai tlang la ka khuen tih kamah taengah khoyin a yet ka om puei.
5 Anih te kopoekrhai ol muep ka thui pah tih a tue kah olhuep khaw ka tueng. A tue a bawtnah khaw anih taengah ka phong pah. Te vaengah anih ka uen tih,
6 He ol he tah langya la hoe lamtah he bal tah a huep la khoem,” ka ti nah.
7 Namah taengah khaw ka thui coeng.
8 Na taengah miknoek kan tueng soah na thinko hong lah. Mang te khaw na man coeng tih a thuingainah khaw na yaak coeng.
9 Hlanghing lakli lamloh nang n'loh saeh lamtah a tue a bawtnah hil, ka capa nen khaw, namah bangla aka om rhoek nen khaw khosa uh.
10 Camoe kah kum te a hma atah a patong tue ni a tong coeng.
11 Diklai tue he a boelnah hlainit la a paekboe tih, a boel pako tah khum coeng.
12 A boel parha te khaw rhakthuem coeng tih, a boel parha dongkah rhakthuem neh boel nit ni a om coeng.
13 Te dongah na imkhui te khaw khueh laeh, na pilnam te toel laeh. Amih khuikah tlayae rhoek te hloep laeh, aka cueih rhoek khaw thuituen laeh. Aka hmawn pawh hingnah te thui laeh.
14 Pumsa poeknah dul lamtah hlanghing kah hnorhih te namah lamloh voei laeh. Na coengnah kah vawtthoeknah te khaw hal laeh.
15 Na aka naan ngaih na poeknah khaw khat ben tla rhoe lamtah tahae tue lamloh a loe la nong laeh.
16 He lamkah tah na hmuk lakah aka nah ngaih yoethaenah tah hmuen a loh pawn ni.
17 Thahnoeng ham tah lunglai he phat patong hang coeng tih khosa boeih soah khaw boethae he ping hang coeng.
18 Oltak tah a hla la cet coeng tih laithae tah a yoei la ha pawk coeng. Te nih na mangthui dongah a loe la atha ha lo te na hmuh.
Cabu Cim Koep A Daek
19 Te vaengah ka doo tih, “Na mikhmuh ah ka thui mai eh Boeipa.
20 Kai nan uen bangla ka cet vetih pilnam aka hing pueng rhoek te ka toel ni. Tedae tahae lamkah a cun rhoek tah uh long a toel eh? Lunglai he hmaisuep la yalh tih khosa rhoek khaw hmaivang mueh la om uh.
21 Na olkhueng khaw a hoeh uh coeng tih, nang loh na saii tangtae neh na saii ham koi hno te aka ming khat khaw om voel pawh.
22 Na taengah kolonah ka dang atah ka khuiah cim mueihla han tueih lah. A tong cuek lamloh lunglai dongah aka thoeng te khaw, na olkhueng dongkah a daek olka te khaw ka daek pawn eh. Te daengah ni pilnam loh a caehlong a hmuh thai vetih a hnukkhueng ah hing aka ngaih rhoek long a vai uh eh,” ka ti nah.
23 Amah loh kai n'doo tih, “Cet lamtah pilnam te coi laeh, amih te thui pah lamtah khohni sawmli khuiah nang n'tlap uh boel saeh.
24 Namah hamla cadaek cabael muep tawn lamtah, na taengah Sarea, Dabria, Selemia, Ethanus neh Asiel te khuen. Amih panga loh a daek ham te hlinsai laeh.
25 He la koep na lo vaengah yakimingnah hmaithoi te na thinko ah kan tok bitni. Ca boeih na daek hil tekah kan thih mahpawh.
26 Boeih na daek vaengah hno rhakthuem te langya la khueh lamtah, rhakthuem tah yinhnuk ah hlangcueih taengah khuen uh. Cadaek ham te thangvuen khonoek he vaengah tong laeh,” a ti.
Pilnam ham Ol Hnukkhueng
27 Kai n'uen bangla ka cet tih pilnam te tun ka coi.
28 Te vaengah ah, “Israel aw olka he ya uh lah.
29 Lamhma ah a pa rhoek Egypt ah hlanglak bangla kho a sak uh tih te lamloh koep ana loeih uh.
30 Hingnah olkhueng a dang uh dae tuem uh paw, amih phoeiah khaw tekah te na poe uh bal.
31 Zion khohmuen ah na koerhang la nangmih te khohmuen m'paek bal. Tedae nangmih neh na pa rhoek long khaw boethae a saii uh tih Khohnin loh nangmih n'uen te khaw a longpuei bangla na tuem uh pawh.
32 Amah tah aka dueng laitloekung la a om dongah a tue a rhoek vaengah tah nangmih m'paek te khaw koep a lat.
33 Te dognah nangmih khaw, na pilnam khaw khorhi khuiah a hlahloei la na om uh coeng.
34 Tedae na lungbuei te na taem tih na thinko te na hlinsai atah nangmih te a hing la n'khoem vetih na dueknah hnukah khaw haidamnah na dang uh ni.
35 Dueknah hnukah tah laitloeknah ha pai ni. Mamih koep n'hing uh vaengah aka duengkah ming tah phoe ni. Khoboe lailak rhoek tah a bil pawn ni.
36 Tedae kai taengah la khat khaw ha lo uh boel lamtah hnin sawmli khuiah khat long khaw kai n'tlap uh boeh,” ka ti nah.
Cacim Koep A Daek
37 Kai n'uen bangla hlang panga ka khueh tih lohma la ka thoeih uh tih pahoi ka rhaeh uh.
38 A vuen ah ol pakhat loh kai n'khue tih, “Ezra na ka ang lamtah ok ham kam paek te o lah,” a ti.
39 Te dongah ka ka ka ang hatah kai te boengloeng a bae la m'paek. Te te tui bangla muep om dae a pangcik tah hmai bangla om.
40 Te te ka loh tih ka ok. Ka ok vaengah ka thinko te yakmingnah loh a bueih. Ka rhangsuk dongah cueihnah bae. Ka mueihla hamla poeknah phoe.
41 Te dongah ka ka ka ang te ka khuep voel pawh.
42 Hlang panga rhoek te khaw Khohni loh yakmingnah a paek. Te dongah a ciim la aka om te daek ham hoi uh. Me bang catham a hnonah khaw ming uh pawh. Hnin sawmli ngol uh tih khothaih ah a daek uh, khoyin daengla buh a caak uh.
43 Kamah ngawn tah khothaih ah ka thui tih khoyin ah khaw kam ka khuem pawh.
44 Te dongah cabu somko pali he khohnin sawmli ah ka daek uh.
45 Hnin sawmli a cup phoeaiah tah Khohni loh m'voek tih, “Na daek lamhma cau pakul pali te langya la khueh lamtah, amih te a tiing neh a tiing pawt khaw tae sak.
46 Tedae a hnuk la parhih na daek rhoek te tah khoem lamtah na pilnam khuikah aka cueih taengah pae.
47 A khuiah yakmingnah sokca, cueihnah tuisih, mingnah tuiva om lah ko,” a ti.
48 Te dongah a thui bangla ka saii van.