13
1 A hnin rhih a poeng kah hlaem ah tah mang ka man bal.
2 Ka mang ah tuipuei lamkah khohli ha pawk tih tuiphu a huek khungdae te ka hmuh.
3 Ka sawt vaengah tuipuei tuilung lamkah aka thoeng te khohli loh hlang muei bangla a saii. Hlang te vaan khomai neh a ding te khaw ka hmuh. A maelhmai sawt hamla a mael vaengah a hamitangnah boeih te tah thuen uh.
4 A ka lamkah ol a huel vaengah aka ya boeih te hmai loh khoirhat a kaeng vaengkah bangla boeih tlae.
5 Koep ka sawt vaengah pilnam hlangping te toeklekna pawt la ka hmuh. Amih te vaan khohli loh a coi tun tih tupuei lamkah aka thoeng hlang te vathoh thil hamla pai uh.
6 Ka sawt bal vaengah mol puei pakhat phuel uh tih a soah a kah te ka hmuh.
7 Mol aka phuel uh te melamkah nim tila a hmuen a hma te ka sawt dae ka hmu pawh.
8 Te phoeiah ka sawt hatah amah taengkah aka tingtun boeih loh amah taengah caem la thoo uh. Mueirhih neh khuk bae ngawn dae yong ham huem uh pawh.
9 Hlangping kah a huk a cuuk tea hmuh vaengah khaw a kut thueng pawt tih, caai neh caemtloeknah caemboh khaw muk pawh.
10 Tedae a ka lamloh hmai tuiva bangla, a hmuilai lamloh hmai hu bangla, a lai dong lamloh hmaidi konglong bangla a hlah te ka hmuh.
11 He hmai tuiva neh hmaihu khaw, hlipuei khohli khaw tun hol uh tih a hmuh vaengah tah hlangping khaw yong hamla dae amih te boeih ung. Te dongah hlangping taelekna pawt te bang hma tih laivai hmai phu neh hmaikhu bo bueng la dawk cul. Ka sawt vaengah ka ngaihmang coeng.
12 Te phoeiah tlang lamkah hlang pakhat ha suntlak thuk te ka hmuh. Amah loh a tloe hlangping taengah rhoepnah la khue uh.
13 Te phoeiah anih taengla hlang hlang muep ha pawk, hlangvang omngaih tih hlangvang a kothae uh, hlangvang tah a khih uh tih, hlangvang loh a tloe te nawnnah la a khuen uh. .
Mathui kah Thuingaihnah
Ka haenghang vaengah mueirhih a lenkoek om tih Khohni taengla ka thangthui
14 Te vaengah, “A tongnah lamloh na sal taengah khobae rhambae khaw nan tueng coeng. Ka thangthuinah na yaak ham ni a tingtawk la kai nan cawh.
15 Mang kah a thuingaihnah khaw kan nan tueng bal coeng he.
16 Ka lungbuei ah tah ka boelh het coeng. Anunae te a hlun rhoek ham aih te.
17 Amih te kothae la hlun mahpawt nim?
18 Amih tah a hnukkhueng khohnin hamla a khueh hno te a yakming uh dae amih ah doe uh pawh.
19 Anunae a hlun rhoek aih te, poeknah khaw om coeng. Amih te mueihrhih a len khaw, ngaihhlih a tloh khaw, na mang kah a tueng bangla a hmuh uh ni.
20 He rhoek hno khuila la a kun ham khaw then mai coeng. Tlohthae loh tlak thil sitoe cakhaw lunglai lamloh khomong bangla cing vetih, khohnin hnukkhueng ah aka thoeng ham te hmu pawt nim?” ka ti.
Amah loh kai n'doo tih,
21 “Mangthui kah thuingaihnah kan thui vetih nang kan thuinuet hno te nang ham kan thuicaih bitni.
22 Na thui bangla aka suvaih rhoek kah a kawng te khaw, aka suvaih pawt kah a kawng khaw a thuingaihnah tah he pawn ni.
23 Te vaengah tue ah puenthae aka khuen loh puenthae khuila ka tla rhoek khaw a tungaep ni. Amih tloengkhoelh taengah bibi neh tangnah aka khhueh rhoek te tah.
24 Te dongah a hlun rhoek tah aka duek rhoek lakah a yoethen ngai tila yakiming .
25 Mangthui kah a thuingaihnah te he pawn ni. Tuipuei lamkah aka luei hlang na hmuh lah ko.
26 Anih tah Khohni Pathen loh dieklai tue te yet a khoem hlang yueng pawn ni. A suentae hlahkung la amah om vetih a hlun rhoek te khaw a hoihaeng ni.
27 Na hmuh bangla a ka lamloh khohli, hmai neh hlipuei thoeng lahko.
28 Caai khaw coemtloenah pumcum khaw pom pawt dae, anih ta hamla hlangping loh a cuk thil vaengah amih te a thup, he a thuingaihnah coeng ni.
29 Khohnin ha pai vetih Khohni loh diklai dongkah rhoek te a loeih sak pawn ni.
30 Diklai khosa rhoek taengah lungbuei cikcoknah pai ni.
31 Khat neh khaw, khopuei neh khopuei, hmuen khat neh hmuen khaw, pilnam neh pilnam, ram neh ram caemtloeknah om ni.
32 Hekah hno loh hmuen a loh hlanah ni lamhma la nang miknoek kan tueng. Ka Capa khaw ha thoeng pawn ni. Anih te tuipuei lamkah aka thoeng hlang la na hmuh coeng.
33 Namtom boeih loh a ol a yaak vaengah, namtom boeih loh amah khohmuen khaw, khat neh khat taengkah rhalthohnah te khaw a toeng ni.
34 Toekleknah mueh hlangping te huek tingtun vetih na hmuh bangla, cae ham neh anih ta ham te a ngaih uh ni.
35 Tedae amah te Zion som tung ah pai ni.
36 Zion te ha pai vetih pilnam boeih taengah a phoenah te a khueh ni. Rhuengphong tih a sak coeng, na hmuh vangbangla kut a om mueh la tlang khundun lah ko.
37 Ka capa amah loh namtom kah a lailaknah dongah a coi te a toel ham te hlipuei minoek la tueng coeng.
38 A boethae bangla a maelhmai ah a tlung vetih phaepnah neh amih a kolh te miknoeknah la hmai om coeng. Olkhueng kah a thuingaihnah dongah a tlungmu pawt dongah amih a thup ham te miknoeknah la hmai a tueng sak coeng.
39 A taengah ngaimong la hlangping a coi bal te khaw na hmuh coeng.
40 Amih te manghai Hoshae tue vaengah a kho lamloh vangsawn la a khuen koca pako rhoek ni. Amih te Assyria manghai Shalmaneser loh saldong la a khueh. Amih te tuiva a kat puei tih khohmuen tloe la a khuen.
41 Tedae amamih hamla mangtaengnah a khueh, namtom hlangping te caeh tak tih khohla ngai la caeh hamla. Te hmuen ah tah hlang hing loh kho a sak noek moenih.
42 Tedaengah ni amah khohmuen ah a tuem uh pawt a oltloek te a tuem uh eh.
43 Amih te Perath tuiva kah solong a caeknah longah cet uh.
44 Te khohnin lamkah tah Khohni loh amih ham miknoek a tueng sak. Bawt a kat uh hil tuiva kah tuilong te a kueng pah.
45 Khohmuen pingpang te a caeh long khaw sen tih, a yincaehnah te kumkhat neh tintan lo. Tekah khohmuen tah Arzareth la a khue.
46 Te phoeiah a tue hnukkhueng hil kho a sak uh. Amih te khaw koep halo tom coeng.
47 Khohni loh tuiva kah tuilong te koep a kueng bal ni. Tedaengah ni tuiva te a kat uh thai eh. Te dongah hlangpin loh ngaimong la hueng a tingtun uh te na hmuh.
48 Tedae na pilnam a hlun rhoek te tah ka khorhi cim ah phoe uh tih daem uh ni.
49 Te dongah huek aka tingtun namtom te a thup vaengah aka sueng rhoek tah amah loh a tungaep ni.
50 Amih te kopoekrhai muep a tueng ni.
51 “Tloengkhoelh Boeipa aw kai hamla han thuicaih la saw, balae tih tupuei tuilung lamkah hlang a luei te ka hmuh,” ka ti.
52 Kai taengah, “Tuipuei kah a dungnah he a phuelh neh aka ming he khat khaw a om pawt bangla, tahae khohnin kah mueh tah ka Capa khaw a khuikah aka om rhoek khaw aka hmu thai he diklai ah khat khaw om pawh.
53 Mang na hmuh kah a thuingaihnah tah he ni.
54 Na longpuei te na hnoo tih na pum te kai ham la na khueh dongah ka olkueng khaw na khe coeng.
55 Na hingnah khaw cueihnah dongah na tlungmu tih yakmingnah te na nu la na khue.
56 Te dongah hekah hno he nang kan tueng coeng. Na thapang ngawn tah Khohni taengah a khueh coeng. Hnin thum a poeng phoeiah tah ol a tloe kan thui pueng ni. Nang taengah dumlai aka rhih neh, kopoekrhai te ka thuicaih pueng ni,” a ti.
57 Te phoeiah ka thoo tih lohma li ah ka pongpa, a hnin, hnin ah Khohni loh kopoekrhai a saii dongah thangpomnah neh koehnah a lenkoek ka paek.
58 Amah loh a tue neh amah khoning a poeng hil aka thoeng hno boeih te a uktaem. Te phoeiah hnin thum pahoi ka om pueng.