8
1 Ndee xekyvy va'e rire, xexy omokambu va'ekue ae!
Ha'e rami va'e rire tape rupi rovaexĩ vy
xee roayvu 'rãgue avave rei xejou vai e'ỹ re.
2 Xee rogueraa vy rogueroike 'rãgue xexy ropy.
Ha'e gui ndee xembo'e 'rãgue.
Ha'e rã ndevy ame'ẽ 'rãgue rey'u aguã vinho iporãve va'e regua,
ha'e xe yvyra'a rykue.
3 Ndeaxua regua oĩ 'rãgue xeakã guýry,
ha'e rã reiporu kuaa regua ma xekuavã 'rãgue.
4 Jerusalém memby kuery, ajerure pẽvy:
pemomyĩ eme rojoayvua, tove toke ranhe,
ha'e ae ovyxe e'ỹa ja.
Irũ kuery ijayvuague
5 Mava'e tu peva'e, tekoa e'ỹa katy gui oẽ ouvy vy
guembiayvu reve joe ojeko jogueruvy va'e?
Ime ijayvuague
Maçã'y rembypy guy py xee romomyĩ.
Ha'e py ae ndexy nderereko'i raka'e.
Ha'e py ae ju nekuavãare oendu raka'e haxy va'e.
6 Emoĩ xerery nekuraxõ re imbojaarã rami, ndejyva re guive.
Mba'eta jajoayvua ma manoa rami ipo'aka.
Ha'e rã takãte'ỹ ma yvyra rupa rami nda'evei ete va'e.
Ha'e va'e regua tapyĩ ma hendy revegua,
tata rami okai oiny va'e.
7 Yy tuvixa va'e teĩ nomboguei 'rã jajoayvua,
yakã ikuai va'e ndojao'i 'rã.
Joayvua repyrã amongue oguereko va'e ha'e javi ome'ẽ teĩ mba'everã ndovarei.
Irũ kuery ijayvuague
8 Ore kuery orereindy roguereko ikã e'ỹ teri va'e.
Mba'e tu rojapo 'rã ixupe gua'yxyrã re ojerurea ramo?
9 Tetã kora ha'e oiko va'e rire
ixupe rojapo 'rãgue peteĩ torre prata guigua.
Ha'e rã okẽ va'e rire
ronhovã 'rãgue yvyrape yary guigua py.
Ta'yxy ijayvuague
10 Xee ma tetã kora, ha'e rã xekã ma torre rami oĩ.
Ha'e rami rã xerembiayvu xerexa vy xererovy'a 'rã.
Irũ kuery ijayvuague
11 Baal-Hamom py Salomão oguereko peteĩ uvaty.
Ha'e va'e omboaxa raka'e opena va'erã kuery pe.
Ha'e ramo hi'a rekovia peteĩ-teĩ ogueru ixupe mil hatã'i va'e prata guigua.
Ta'yxy ijayvuague
12 Ha'e rã xe uvaty ma xereve ae oĩ xee aipotaa rami areko aguã.
Ha'e gui ndee Salomão, eju ejopy mil hatã'i va'e,
ha'e hi'a re opena va'e kuery ju duzentos 'rã ojopy.
Ime ijayvuague
13 Ndee yvotyty rupi reiko va'e,
nhaneirũ kuery oenduxe okuapy ndeayvua.
Xee voi taendu.
Ta'yxy ijayvuague
14 Xerembiayvu, eju pojava!
Enha ejuvy guaxu e'ỹ vy guaxu ra'y
yvyty heakuã va'e áry rupi opo-opo ouvy va'e rami.