7
Ime ijayvuague
1 Huvixa rajy, ndepy regua reve reguataa ma iporã meme.
Neretyma ku'a ma mbo'y hembiapo kuaa va'e rembiapo rami iporã.
2 Nepuru'ã ma karo ojere va'e vinho oĩ riaea rami.
Ndeku'a ma trigo omboaty pyre yvoty ombojerepy rami.
3 Nekã mokoĩve ma guaxu ta'y'iague meme rami.
4 Ndeaju'y ma torre marfim guigua rami iporã.
Nderexa ma yy omboty pyre Hesbom py, Bete-Rabim rokẽ yvy'iry oĩ va'e rami.
Nexĩ ma Líbano yvy re torre Damasco katy ooa py hi'aĩ va'e rami.
5 Neakã ma Carmelo yvyty rami.
Nde'a ma púrpura rami iporã.
Huvixave ojejopy uka nde'a reipopẽ va'ekue re.
6 Ndee ma neporã ha'e arovy'a vaipa,
xembovy'a ete xerayvua py.
7 Nde'yvia ma pindo rami,
ha'e rã nekã ma guapytã rami.
8 Xee aipoa'e: “Ajeupi rã pindo re,
ajopy 'rã ixã rapo re”, ha'e.
Nekã toĩ xevy uva arupỹ xã rami,
nepytuẽa taeakuã porã maçã rami.
9 Xerayvua ma vinho iporã va'e rami.
Ta'yxy ijayvuague
Ha'e va'e vinho ma xerembiayvu toy'u tema,
toxyry ovy ijuru ha'e haĩ rupi.
10 Xee ma xerembiayvu mba'e,
ha'e rã ha'e xepota.
11 Eju xerembiayvu, jaa nhuũndy rupi jaiko,
pytũ jaaxa aguã tekoa'i rupi.
12 Ko'ẽmba'i ramove javy voi vy jaa uvaty re nhama'ẽ vy.
Jaexa uva poty ojepe'a ma paa,
ha'e yvyra hi'a va'e henhoĩ paa.
Ha'e py ma xee aexa uka 'rã roayvu etea.
13 Mandrágora reakuã nhaetũ,
ha'e nhanerokẽ rupi ikuai yvyra'a iporãgueve,
ipyau ha'e yma guare guive.
Xerembiayvu, ha'e nunga ha'e javi xee amoĩ porã ndevy peguarã.