38
Na Taovia e Gokovisu Vania a Job
1 Mi kalina e goko sui a Elihu, ma na Taovia e gokomai vania a Job i laona na guguri loki me tsaria,
2 “?Asei gana lakana igoe a Job ti o labuginia nimu tsaqina goko kobakoba lê tau sasaga na omea inau au ngaoa na nauana?
3 Ko tû mo ko goko mala mane,
mo ko vangaraua na tuguvisuana na goko inau sauba kau veisuaginigo.
4 ?Laka iava nogo o totu igoe kalina inau au vusâ na barangengo?
Me ti vaga igoe o sasaga sosongo, me dou ti ko tsarimai vaniau laka au nau koeguania kalina au vusâ.
5 ?Masei nomoa e pedea ke koegua vaga na lokina?
?Masei e tatakatsinia na itai na totovo me tovo taligutiginia?
?Me laka o dona ginia igoe?
6 ?Ma nagua e tabedatogira na tuguru vatu ara tangoli kakaia na barangengo?
?Masei e pakâ na tsutsuvatuna?
7 Mi kalina ara reivaganana ia, migira na veitugu ara gini magemage mara linge kolu,
migira sui goto na angelo i gotu ara gudato tana magemage.
8 “?Ko tsarimai vaniau igoe laka asei nogo e vongo kapusia na matsapana na tasi loki,
kalina e botsa dato tana tuturigana na barangengo?
9 Inau nogo au tsavu kapusiginia na tasi na parako,
mau poropoiginia na rodo pulipuli.
10 Mau vorovotâ na votavota vania na tasi, vaga moa ti na bara e bara kaputia,
11 mau tsarivania na tasi, ‘I tana nogo ko vosa. !Mo ko laka goto na liusiana!
Mieni nogo kara vosa na kararana na panumu susuliga.’
12 “?Migoe a Job, laka i laona na maurimu popono igoe,
o dona na ketsaliana me ke vovomai na dani?
13 ?Me laka igoe nogo e raiginia na dani male ke mararasia na barangengo,
ma kara gini totu malemale igira na vanga tsutsukibo ara taopoi tana rodo?
14 Na mararana na aso tana matsaraka e naua mara gini totu malemale na omea sui,
mara gini labamaka na vungavunga ma na poiatsa.
15 Na rodona na bongi e dou sosongo vanigira na vanga tsutsukibo i tana ara gini tangomana na nauana niqira aqo seko,
ma na mararana na dani male e utusiginigira na nauana niqira aqo seko.
16 “?Me laka o ba tsau nogo igoe tana vuravura i laona na maorodo na tasi?
?Me laka o ba sanga liu nogo igoe tana pakokana na kema?
17 ?Me laka ke kesa nogo ke tusuvulagi vanigo igira na matsapakapu
ara vongo kapusiginia na barangengo na mate?
18 ?Me laka igoe o donaginia e koegua na lokina na barangengo?
Ko tsarimai vaniau ti vaga igoe ko dona.
19 “?Me laka o dona igoe iava e talumai na marara,
miava na uluna na rodo pulipuli?
20 ?Tangomana igoe ko tusuvulagia iava ka niqira votavota kaira,
se ko molovisukaira tugua i tana ara ka pukugamai?
21 !E utu igoe ko voginia matena igoe o tuqatuqa nogo,
mo totu nogo i tana kalina inau au vusâ na barangengo!
22 “?Me laka o ba sage nogo igoe i laona na voki
i tana inau au mololakagira na snou ma na kakoluna na usa kakai?
23 Inau nogo au molo vangaraugira i tana, agana tana tagu kalina ke laba na rota ma na vailabu loki.
24 ?Megua laka igoe o ba tsau nogo i tana e datomai na aso,
se tana nauna i tana e bisimai na guguri votu?
25 “?Asei nomoa e tsaia na mangamanga i tana e liu tsunamai na usa loki,
me malesi vania nina sautu na angaanga te e poda na vivisa?
26 ?Masei e moloa na usa ke tumu i tana e tau totu sa tinoni?
27 ?Masei e porisigira na kao mamatsa ma na kao makede ara kilia na malobu
ti kara gini rudu vaolu tugua na buruburu?
28 ?E tau utu ngatsu ti kara ka tamani ka tamaqira na usa ma na kolobu?
29 ?Me laka asei ka tinaqira na bisi loki ma na kolobuna na usa kakai,
30 te ara gini kakai vaga na vatu na kô tatave,
me gini kakai buto lê na kelana na tasi?
31 “?Me laka tangomana igoe ko sorisaigira kesa na palatete na veitugu
ma kara totu saisai kesa moa tana nauna i gotu tana masaoka?
?Se ko nusigira kesa na palatete na veitugu ma kara viri totu votavota bamai?
32 ?Me tangomana igoe ko mataligira na veitugu,
mo ko pedevanigira iava tana kara totu, me ngisa kara laba, i laona kesa na uvi?
33 ?Me laka o donaginia igoe na vovorona agana na mani tagaoviginiaqira na omea ara totu tana masaoka,
mo ko titivanigira na aqo gua kara nauvania na barangengo?
34 “?Tangomana igoe ko gudato mo ko ketsalia ke tû na parako na usa,
me ke tumu tsunamai na usa me ke porisigo?
35 ?Me ti vaga igoe ko ketsalia na angaanga ke tarari tana masaoka,
me laka aia ke tû me ke tsarivanigo, ‘E dou moa taovia’?
36 ?Masei nogo e tsarivulagi vania na komeo ti e gini dona laka sauba ke tave na obo?
?Se asei nogo e tsarivania na kiukiu ti e dona laka sauba ke tumu na usa?
37 ?Masei nogo bâ e sasaga sosongo me tugu ke tsokoraegira na parako,
me ke qeogira me ke gini tareo tsunamai na usa,
38 aia e dona ke kakaisia na papasa me ke gini pakoka?
39 “?Laka igoe nogo o tsodoa na mutsa kara gania igira na laeone,
ma kara gini masu tania niqira vitoa igira na dalena laeone,
40 kalina ara totu popoi i laona na pokopoko,
mara kenavia gaqira omea kara gania?
41 ?Me laka asei nogo e palagira na kaokao na mutsa
kalina igira ara lovo bamai vitoa lê,
ma na daleqira ara ngangaidato vaniau laka kau palagira?”