37
1 Ma Elihu e tsarigotoa,
“Mi kalina au morosia e mai na tulonga loki ma na kosuqu e butubutu anguangu sosongo.
2 Kamu rongomia igamu sui na tatangina na liona God,
e vaga moa na podaana na vivisa e rutsumai tana mangana.
3 Maia e moloa na angaanga ke kirapi taligu tana masaoka,
tû kesa tabana na barangengo me tsau bâ kesa tabana.
4 Mi muri me tangi loki na liona God e podamai tana quluqulu,
me viri kirapi bamai na angaanga.
5 Mi tana nina ketsa nogo God ti ara gini laba na omea ganataga sui,
na omea loki sosongo me tau tangomana vanigita ka padagadovigira.
6 Aia e ketsalia na snou ke puka me ke tsavua na barangengo popono,
me molomaia na tuqana na usa loki.
7 Mi kalina aia e nauvaganana ia, me utusiginigira na tinoni na nauana niqira aqo,
rongona e ngaoa na tinoni sui kara donaginia laka aia nogo e naua te e laba na omea vaga ia,
8 mara viri tsogoravi igira sui goto na omea tuavati atsi.
9 Na gugurina na tulonga loki e talu mai i ata,
ma na bisi loki e palamai i vava.
10 Ma na mamagona God e naua mara gini tavongani kakai buto lê na kô loki.
11 Aia e dangaliginigira na kô na usa na parako matolu,
ma na angaanga e kirapi bamai talu tana parako.
12 Ara vano bamai tana nina kili God vanigira,
mara muria pipi sui na omea aia e ketsaligira kara naua pipi nauna i laona na barangengo popono.
13 Mi kalina God e moloa na usa ke lesovia na barangengo,
me visana kalina aia e naua na mani kedeginiaqira na tinoni,
me visana kalina gana ke gini sauvulagia nina tobagoto vanigira.
14 “Ko rorongo igoe a Job mo ko totu mui talu sa tagu tetelo,
mo ko padavisugira na omea loki ganataga sui God e aqosigira.
15 ?Laka igoe o donaginia e naukoeguania God kalina aia e moloketsa vanigira na angaanga
mara gini kirapi mai talu tana parako?
16 ?Me laka igoe o donaginia e koegua ti igira na parako ara tsautsau lê tana masaoka,
igirani sui nina aqo nogo God e naugira tana sasagana loki?
17 Tagara goto, migoe o dona moa na gini rota lê na papara
kalina na guguri ni ata e gadovikakaia na momoru.
18 God e taporatsania na masaoka i gotu me bulukaea tana sasana, me gini totu kalavata i tana.
?Me laka igoe nogo o sangâ God na aqosiana?
19 E dou ti igoe ko tsaritutugu vanigami nagua kami tsarivania God;
rongona e ponopala lê na tobamami igami, mami tau saikesa dona nagua kami tsarigotoa.
20 “?Me ti vaga God ke dona laka au ngaoa na goko koluana,
me laka sauba aia ke ngaoa na goko koluaqu inau?
?Rongona gua ti inau kau gini nausautuna vania God na mani sekoliginiaqu?
21 “Reia bâ, na guguri e salamalea na masaoka, me gini sina maka na aso,
me utugana vanigita na moro bâ i konina.
22 Migita a morosia bâ kesa na marara milamila e datomai i vava,
ma na makana loki God e toravigita,
me gini utugana vanigita na moro bâ i konina.
23 Gana susuliga God e loki sosongo me gini utu vanigita na ba varangisiana;
mara gotolaka sui mara mana saikesa pipi sui nina votagoko e nauvanigira na tinoni.
24 Aia nogoria na rongona ti igira na tinoni sui lakalaka ara matagunia aia;
maia e tau lelê boeginigira igira ara koesegeniqira laka ara sasaga sosongo nogo.”