11
1 Ma Sopar, aia na mane ni Naama, e rongomia kalina a Job e goko, maia e tû me tsarivania,
2-3 “?Igoe a Job o tsonigira danga sosongo na goko,
mi tana nauvaganana ia o pada ngatsua laka ke naua
migami kami gini padâ laka igoe o mane dou sosongo me goto nimu sasaga?
?O padâ igoe laka tana nimu tsaqina goko peapea o tsonia ke naua migami kami gini tau tangomana na tsariana sa omea, ne?
Minau moa e utu lele goto kau totu mui. Sauba nomoa kau tuguvisugira nimu goko.
4 Migoe o tsaria laka na omea sui o tsarigira ara mana;
me laka igoe o totumale saviliu i matana God.
5 !Ke dou sosongo manana ti vaga God ke tuguvisu vanigo nimu goko igoe!
6 Mi tana ti aia ke sauvulagi vanigo laka ara danga sosongo na tabana na sasaga loki;
me laka ara totu popoi goto na omea danga ara aotsau vania nina dona na tinoni lê.
Me dou ti ko dona laka na kede God e kedeginigo e tau loki atsa kolua na sasi igoe o naua.
7 “?Me laka e tugugo igoe na tsodovulagiana i tana e vosâ gana loki ma gana susuliga God?
8 Maia e dato ao liusia na baragata,
me utu sosongo vanigo igoe na tsauliana.
Maia e tsuna ao liusia na barangengo na mate,
me utu sosongo goto vanigo na donaginiana.
9 Gana Loki God e katsi liusia na barangengo,
me dama liusia na tasi.
10 ?Ti vaga God ke tangolia kesa me ke raqa bâ tana pede, masei tangomana ke tongo vania?
11 God e donaginigira rago laka asei gira na vanga tangopeke;
me morosigotoa pipi sui na omea seko ara naua.
12 E utu ko reia sa asi atsi ke vasua kesa na dalena tinoni,
me atsa vaga goto e utu ko reia kesa na tinoni bule ke lia na tinoni sasaga.
13 “A Job igoe, ko pilo gotosia na tobamu, mo ko nongia God ke galuvego me ke sangago.
14 Me ti vaga igoe o naua sa omea ke sasi, me dou ti ko mololea na nauana,
mo ko laka goto na tamivaniana na sasaga tabaru ke totu tana valemu.
15 Me ti vaga ko nauvaganana ia, me sauba ke goto dou tugua na tobamu, mo ko dona na magemage,
mo ko totu raviravi dou, me utu goto ko matagunia sa omea.
16 Mi tana ti ko padalegira pipi sui na omea ara ngoligo kalina ia,
vaga moa igira na obo loki ara tatari votu i sau,
mara vano putsi me tau nogo padatugua ke kesa.
17 Ma na maurimu sauba ke maka liusia na mararana na aso tana niaso vota,
migira sui na rota o vatsangia vaga moa ti o totu i laona na rodo tana bongi,
sauba igira sui kara oli, ma kara maka vaga moa ti i laona na dani male.
18-19 Ma God sauba ke reitutugugo dou. Migoe sauba ko totu raviravi dou tana mo ko noru sailaginia aia.
Mi kalina ti ko maturu me sauba ko maturu dou rongona e tagara goto sa omea ko matagunia.
Ma na tinoni danga sauba kara mai i konimu ma kara nongigo ko sangagira.
20 Me sauba igira na vanga tsutsukibo kara lalavea iava tana kara ba taopoi tania na korena God,
me utu lelê kara ba tsodoa sa nauna.
Mi tana igira kara totu pitua moa na mate.”