10
1 Ma Job e goko babâ moa me tsaria,
“Inau au qisi nogo na mauri.
Sauba kau tû moa ma kau adilabatigira na omea sui ara ngoliau.
2 God, inau au nongigo ko laka goto na kedeaqu lê.
Ko tsarimaidou vaniau laka na kibo gua au tsukia inau.
3 ?Me laka e goto vanigo igoe na rotasiana ma na pea sekoliana
kesa aia igoe segenimu nogo o aqosia?
Mi kalina o reia na omea ara naua igira na vanga tsutsukibo, me laka e goto vanigo ko kiaqumu lê vanigira moa?
4 ?Me laka nimu pede igoe e atsa kolua na pede ami naua igami na tinoni?
5 ?Me laka na maurimu igoe e kurikuri vaga goto na maurimami igami?
6 ?Me ti ke tau vaga ia, ma na matena gua ti igoe o ketse vulagigira pipi sui niqu sasi,
mo adikaegira pipi sui na omea seko au naugira?
7 Migoe o donagininogoa laka au tau tsukia sa sasi,
me laka e tagara goto sa tinoni tangomana ke laumaurisiau tania na limamu igoe.
8 “Na limamu nogo igoe o aqosiginia na koniqu, mo molovaniau na rereiqu,
mi kalina ia ma na limamu goto nogo igoe o sekoliginiau.
9 Mo ko padatugua laka igoe nogo o aqosiginiau na kao.
?Megua ti o ngaoa na rapasiaqu ma kau lia visutugua na kao?
10 Igoe nogo o aqosiau mau gini mauri i laona na tobana tinaqu.
11 Igoe nogo o molosaia na koniqu kolu velesi ma na ulaula tana suliqu,
mo tsavusaiginia na lasi ma na kokora.
12 Igoe nogo o galuveau ti o sauvaniau na mauri.
mo aragodouau te au gini mauri.
13 Mi kalina ia, inau au donaginia laka tana tagu popono ia
migoe o vorogokona popoi na sekoliaqu inau.
14 Igoe o totu matengana moa na tuvuiaqu laka ti vaga inau kau tsukia sa sasi,
mi tana ti igoe ko gini tamani rongona na sove na padale vaniaqu niqu sasi.
15 Mi kalina ti vaga inau kau puka tana sasi, mi tana migoe o tau kuti na kateli vaniaqu sailagi inau,
me ti vaga inau kau naua na omea e goto me dou i matamu igoe, me tau moa peluau sa omea.
Minau au paluvangamaqu mau totu sailagi moa tana rota.
16 Me ti vaga inau kau tangomana kesa tana omea,
migoe o tsoni lalavequ vaga moa na laeone kalina aia e lalavea kesa gana omea ke gania,
mo dona goto na gini aqo na valatsatsa na mani sekoliginiaqu inau.
17 Igoe o pabovaniau sailagi moa niqu rota;
ma nimu tobamomosa loki vaniau e dato me dato babâ,
mo tau kuti na voro manogati vaniaqu gaqu matemate.
18 “?Niqu God, matena gua ti o tamivaniau nogo mau gini botsa?
Ke dou bâ vaniau ti vaga kau mate nogo i tobana tinaqu, me ke tau goto reiau ke kesa.
19 Na talu i tobana tinaqu ma na vano saviliu tana qilu,
ke dou sosongo bâ, me ke vaga moa ti au tau nogo tuturiga na mauri.
20 God, igoe o dona nogo laka na mauriqu e tau nogo katsi.
Me vaga ia me dou ti ko mololeau ma kau mango tetelo talu
21 idavia kau mate ma kau vano tana nauna i tana e rodo pulipuli
me ke utu goto na visu,
22 tana vera na rodo ma na ungana na mate,
i tana e tau dona ke totugoto sa omea,
me ngiti mararana na rodo pulipuli moa.”