62
ፅዮነ ኦራꬃ ሱንꬃ
1 ፅዮነ ግሾ፥ ታኒ ስእ ጊከ፤
የሩሳላመ ፅሎተꬃይ ፖኦዳ፥
እ አቶተꬃይ ዎንታ ፃልቀዳ ከያና ጋካናዉ
ታኒ ስእ ጊከ።
2 ካዎተꬃት ነ ፅሎተꬃ፥
ካዎት ኡባይ ነ ቦንቹዋ በአና።
ጎዳይ ሱንꬅያ ኦራꬃ ሱንꬃን
ኔኒ ፄገታና።
3 ኔኒ ጎዳ ኩሸን ሎእዳ
ካዎተꬃ ካላቻ ግዳና።
4 ኔኒ፥ “ዶገትዳሮ” ጌተታካ፤
ነ ቢትያ፥ “ꬎንꬁ” ጌተቱኩ።
ሽን ኔኒ፥ “ታ ኡፋይሳይ እን ደእያሮ”፥
ነ ቢትያ፥ “አዝና ገልዳሮ” ጌተታና።
ጎዳይ ነናን ኡፋይታና፤
ነ ቢትያካ አዝን ደእያሮ ግዳና።
5 ፓንꬅ ጌላኦ ኤከይሳዳ፥
ነ ናይት ነና ማቻና።
ኤከይስ ገልያርን ኡፋይተይሳዳ፥
ነ ፆሳይ ነናን ኡፋይታና።
6 ነኖ የሩሳላመ፥ ነ ድርሳ ግምብያ ቦላ
ዎቸይሳታ ታኒ ዎꬃስ፤
ኤንቲ ጋላስነ ቃማ ስእ ጎኮና።
7 ህንተኖ፥ ጎዳ ቆፍሰይሳቶ፥
እ፥ የሩሳላመ ኬፃና ጋካናዉነ
ቢታ ኡባን ናሸትዳ ካታማ ኦꬃና ጋካናዉ
ህንተካ ሸምፖፕተ፤ እያካ ሸምፕሶፕተ።
8 ጎዳይ ባ ኡሻቻ ኩሽያንነ
ባ ዎልቃማ ቀስያን ሀይሳዳ ያግድ ጫቅስ፦
“ታኒ ናምአንꬆ ህንተ ካꬃ
ህንተ ሞርከት ማና መላ ኦꬅከ።
ህንተ ዳቡርዳ ህንተ ዎይነ ኡሻ
አላጋት ኡዮኮና።
9 ሽን ባንታ ካꬃ ጫክዳይሳት
ምድ ጎዳ ጋላታና፤
ዎይነ ማፀይሳት ታ ኬꬃ ዳባባን ኡያና።
10 አꬍተ! ፐንገራ ከይድ ቢተ!
አሳስ ኦገ ጊግስተ! ዎጋ ኦገ ከስተ።
ሹቻ ድግተ፤
ካዎተꬃት ኦግያ ደማና መላ ማላ ኤስተ።
11 ጎዳይ ሳአ ጋፃስ
ሀይሳዳ ያግድ አዋጅስ:
‘ፅዮነ አሳስ ሀይሳዳ ያግተ፤
ሄኮ፥ ህንተና አሸይስ ጋክስ!
እያ ጋተይ እያራ ደኤስ፤
እ እምያ ዎይቶይ እያ ስንꬃን ደኤስ’
ያግተ።
12 ህንተ፥ ‘ጎዳይ ዎዝዳ ጌሻ አሳታ’
ጌተትድ ፄገታና።
የሩሳላመይ፥ ‘ኮየትያሮነ
የገታ አታቦና ካታምዉ’ ” ጌተታና።