61
አቶተꬃ ምሽራቾ
1 ኡባ ሃርያ ጎዳ አያናይ ታ ቦላ ደኤስ፤
ማንቆታስ ሎኦባ ኦዳና መላ ጎዳይ ታና ትይስ።
ዎዛን መቅዳይሳታ ኮላና መላ፥
ድኤትዳይሳታ ላአ ከሳና መላነ
ቃሸትዳይሳታ ብላና መላ ጎዳይ ታና ኪትስ።
2 ዶሰትዳ ጎዳ ላይꬃ ኦዳና መላ፥
ኑ ፆሳይ ሀሎ ከያና ጋላሳ አዋጃና መላ፥
አዛነይሳታ ኡባ ምንꬃና መላ ታና ኪትስ።
3 ፅዮነን ካዮተይሳታስ፥ ብዶ ግሾ ካላቻ፥
ዬሆ ግሾ ኡፋይሳ ዛይተ፥
አዛኖ ግሾ ጋላታ ማኦ እማና መላ ታና ኪትስ።
ኤንቲ ጎዳይ ባ ቦንቹዋስ
ቶክዳ ፅሎ ምꬃ ጌተትድ ፄገታና።
4 ኤንቲ በን ላለትዳ በሳታ ዛሪድ ኬፃና፤
በን ኩንድዳ በሳታ ዛሪድ ኤሳና።
ኤንቲ ዳሮ የለተꬃፈ ካሰ ላለትድ
ኦንዳ ካታማታ ዛሪድ ኬፃና።
5 አላጋ አሳት ህንተ ዶርሳ ዉድያ ሄማና፤
እማꬃት ህንተ ጋድያ ጎያና
ኤንቲ ህንተ ዎይነ ጋድያ ናጋና።
6 አሳይ ህንተና፥ “ጎዳ ካህነታነ
ኑ ፆሳ ኦሳንቾታ” ያግድ ፄጋና።
ህንተ ካዎተꬃታ ዱረተꬃ ማና፤
ኤንታ ሻሉዋን ህንተ ናሸታና።
7 ታ አሳይ ባንታ ዬላ ግሾ ናምኡ ኩሸ ኤካና፤
ባንታ ካዉሻ ግሾ ላታን ኡፋይታና።
ሄሳ ግሾ፥ ህንተ ኤንታ ቢታን ዳኮ ላታና፤
ህንተ ኡፋይሳይ መርና ኡፋይስ ግዳና።
8 “ታኒ፥ ጎዳይ ሱረ ፕርዳ ዶሳይስ፤
ቦንቀነ ኢታ ኦሶ እፃይስ።
ታኒ ቱማ ኤንታ ኦሱዋ ጋትያ ቃንፃና፤
ታኒ ኤንታራ መርናዉ ጫቃና።
9 ኤንታ ኮቻት ካዎተꬃታ ግዶን፥
ኤንታ ናይት ደረታ ግዶን ኤረታና፤
ኤንታ በእዳ ኡባይ ታኒ፥ ጎዳይ፥
ኤንታ አንጅዳ አስ ግደይሳ ኤራና።”
10 ታኒ ጎዳን ዳሮ ኡፋይታይስ፤
ታ ሸምፕያ ታ ፆሳን ሀሹ ጋዉሱ።
ኤከይስ ባ ሁጰን ካላቻ ዎይሳዳ፥
ገልያራ ባና አሌቅሰይሳዳ፥
እ ታና አቶተꬃ ማኦ ማይዝስ፤
ፅሎተꬅ አፍላ ቦላራ ጉጅስ።
11 ቢታፈ ምꬅ ማት ዶለይሳዳ፥
ጋደይ ቶክዳባ ድቸይሳዳ፥
ኡባ ሃርያ ጎዳይ ፅሎተꬅነ
ጋላታ ካዎተꬃ ኡባ ስንꬃን ፑርጭሳና።