12
Djamiyulyu dhäruk buku‐ruŋinyamaraŋalana walalaŋgu
12:1–25 (Samuel’s message to the people)
12:1–12
Bala Djamiyulyu ḻakaraŋalana bukmakku ŋuriki yolŋu'‐yulŋuwu Yitjuralpuyŋuwunydja bitjarrana gam'. “Liŋguna ŋarra nhumalaŋgu wekaŋala ŋurruŋunhanydja, ga ŋayina yurru nhumalaŋgu buŋgawayirri. Ŋarranydja dhuwala worruŋuna. Garrayyu Waŋarryu nhumalanha yukurrana gäŋala ḻatju'kuŋala yana, gaḻmuŋala yukurrana nhumalaŋgu miriŋuwala, yurru nhumanydja gonha'yurruna warray Garraynha, yaka warray nhuma ḏukṯukthina nhanŋu Garraywu, ŋunhi ŋayinydja yurru buŋgawana wal'ŋu ŋurruŋuna nhanukalayŋuwu ŋayi yolŋu'‐yulŋuwuna. Nhumanydja waŋana ḏukṯukthina yolŋuwu warray ŋurruŋuyinyarawu, märr ŋayi yurru nhumalaŋgu dharray yukurra.
13 “Ga dhuwalana gay' ŋayi yulŋunydja, ŋunhi nhuma djarr'yurruna ŋanya. Nhuma ŋäŋ'thurruna ŋurruŋuwu buŋgawawu, bala yana Garrayyunydja nhumalaŋgu wekaŋalana yana dhuwalanhana gay'ḏarramunha.
14 Märr‐ŋal'yurra ga malthurra nhanŋuway Garraywu yana, ga ŋayipi yurru nhumalanha gämanydja ḻatju'kumana. Djämanydja nhanŋuway ga mäkiri'‐wekanharamiya Godku yana, ga malthurranydja nhanŋuway yana dhärukkunydja.
15 Ŋuli nhuma yurru yakanydja buthuru‐witjun nhanŋu Godku; ŋuli nhuma yurru bilyun gonha'yun ŋanya Godnha, ŋayinydja yurru yakayi yana nhumalanha guŋga'yun.
16 Dhärriya ga nhäŋa ŋunhi bathala djäma nhanukuŋu, ŋunhi ŋayi yurru Garrayyu nhumalaŋgu djäma.
17 Dhiyaŋunydja‐wala dhuwala rarranhdharr' muka waltjaṉmiriw ŋiniya, ga ŋarra yurru bukumirriyama Garraywala, ga ŋayinydja yurru djuy'yunlili waltjaṉ maykarraṉ', bala nhe yurru marŋgithirrina ŋunhi nhumanydja yätjmirri. Yätj dhuwala, yaka ŋamakurru' ŋunhi nhuma ŋäŋ'thurruna ŋurruŋuwu yolŋuwu.”
18 Bala yana Djamiyulnydja bukumirriyaŋalana, ga dhunupa waltjaṉdja bunanana, Godthuna djuy'yurruna ŋunhi waltjaṉ ga ŋutu'na dhikana maykarraṉ'.
19 Ga bukmaktja ŋunhi yolŋunydja walala barrarinana dhikana, bala waŋanana marrtjina Djamiyulnhana bitjarrana, “Bukumirriyaŋa ŋanapurruŋgu, märr yakaŋga yurru Godthu bumanydja ŋanapurrunha. Ŋanapurruway dhuwala yätjtja, yätjnha dhuwala ŋunhi ŋanapurru ŋäŋ'thurruna yolŋuwunydja buŋgawawu.”
20 Ga Djamiyulyunydja waŋana walalanha bitjarra, “Yaka walala barrariya. Djäma ŋamathaŋa yana, ga yuwalkkuŋana buku‐ŋal'yurra Garraywu.
21 Yakana buku‐ŋal'yurra ŋuruku wiripu‐guḻku'wunydja waŋarrwu walalaŋgu; yaka ŋunha walala yuwalkŋu, yakana walala nhumalanha yurru guŋga'yun yukurra ga walŋakuma.
22 Yakana ŋayi yurru nhumalanha ganan Godthunydja, liŋgu nhumanydja dhuwala nhanŋuway yana yolŋu walala.
23 Ŋarranydja yurru nhumalaŋgu mukthunna yukurra bitjanna liŋguna bukumirriyamana. Ŋunhi ŋarra yurru ḏaḏawyundja ga yakanydja ŋula bukumirriyama nhumalaŋgu yurru, ŋunhiyinydja ŋarra ŋuli ŋayaŋu‐yätjkuŋu Garraynhana. Ŋarranydja nhumalanha yurru yana marŋgikuma nhä ŋunhi ŋamakurru', märr yurru nhuma djämanydja ŋamathama yana, ga dhunupa.
24 Malthurranydja nhanŋuway Garraywu, ga djäma nhanŋuway yana. Märr‐ŋal'yurra nhanŋu yuwalkkuŋa. Guyaŋiya ŋanya Godnha, ga yaka meṉguŋa ŋurikiynydja ŋunhi ŋayi djäma ŋamathaŋala nhumalaŋgu marrtjina.
25 Ga ŋuli nhuma yurru mukthundja marrtji djäma yätjtja rom, nhuma dhuwala yolŋu walala, ga nhumalaŋgu ŋurruŋu buŋgawa, nhumanydja yurru rumbal‐winya'yunmirrina.”