11
Yolŋu'‐yulŋu mirithinana gumurr‐ŋamathina Djolwunydja walalaŋgalayŋuwu buŋgawawunydja
11:1–15 (The people welcomed Saul as their king)
11:1–11
Ŋaḻindi djuḻkthurruna, bala miriŋuna Wamanbuyŋuna mala bunana walalaŋgu, ŋayan'‐dharrana Yitjuralpuyŋuwu, ga walalanydja Yitjuralpuyŋunydja mirithinana beyaṉiyina. Yurru Garraywu Garrkuḻuk Birrimbirr monyguŋala ŋanya Djolnha ganydjarr‐wekaŋala, bala yana ŋayi malanydja märraŋala dhaŋaŋnha biyapulnha dhikana, bena miṯtji miriŋunydja nhanŋu; walala marrtjinana‐wala yana malthurrunana Djolwunydja, ŋayi ŋurru‐warryurruna Djolyunydja walalanha marililina. Walala bunana Wamanbuyŋuwunydja, bala yana bumarana marrtjina, ga warrpam'nha djuḻkthunmaraŋalana walalanha.
12 Yolŋunydja walala wirrkina galŋa‐ŋamathina nhanukala Djolwala, ga waŋananydja walala yukurrana bitjarrana, “Ḻatju'na dhuwalanydja buŋgawa ŋiniya, ŋurruŋu ŋilimurruŋgu ḏälnha dhika ganydjarr‐ḏumurruna. Wanhaka dhika ŋunhinydja walala yolŋu'‐yulŋu ŋunhi walala yaka ḏukṯuk Djolwu? Ŋilimurru walalanha bumana go?”
13 Yurru ŋayi ŋunhi Djolyunydja waŋana walalanha, “Yaka walalanha buŋa,” bitjarrana. “Godthu dhuwala guŋga'yurruna gäthuranydja ŋilimurrunha; ŋayipi dhuwala Godthu walŋakuŋala Yitjuralpuyŋunhanydja.”
14 Ga ŋayi Djamiyulnydja waŋana bitjarra, “Gul' ŋilimurru marrtji bala Gilkallili, ga ŋunhala ŋilimurru yurru Djolnhanydja ŋurruŋukumana.”
15 Bala yana walala marrtjinana ŋunha Gilkallilina, ga ŋunhalana walala ŋurruŋukuŋala Djolnhanydja. Ga ŋuliŋurunydja dhäŋuru walala buku‐ŋal'yurrunana Garraywuna, ga wekaŋala manapara mundhurrnha bathara Godku, Djolyu ga bukmakthu ŋuriŋi yolŋuyu walalay.