49
Yakana yurru yolŋu walŋathirri be nhäyunydja nhanukalay ŋayi
49:1–20 (You can’t be saved by your own riches)
1 Yo nhuma yolŋu walala bukmak bäpurru', ŋäka walala,
mäkiri'‐witjurra nhuma yolŋu walala birrka'mirriŋura buku‐ḻiw'marama.
2 Nhuma ŋunhi be gal'ŋu wakinmirri bathalamirri, ga yumurrku',
ga nhuma ḻukunydjamirri ga ŋurruwuykmirri,
mäkiri'‐witjurra walala rrambaŋithiya.
3-4 Ŋarranydja yurru waŋa dhärukthu ḻiya‐djambatjthu warray,
ga ḻakaramanydja ŋarra yurru warraŋulkuma yana maḻŋ'marama,
märr yurru nhenydja dharaŋan ŋunhi mayaliny'tja.
5 Yakana ŋarra yurru barrarirrinydja ŋunhi yurru wäŋa marimirrinydja yukurra dhärra,
ŋunhi ŋayi yurru miriŋu marrtji ga ḻiw'marama ŋarranha.
6 Yo, ŋunhiyi dhuwurr‐yätjmirri yolŋu walala ŋuli ŋurr'yunmirri waŋanharamirri walalanhawuy walala,
yanapi ŋayi yurru ŋuriŋiyinydja ḻukunydjathinyarayunydja walalanha walŋakuma.
7 Yolŋunydja yurru yakana dhawaṯmaranharamirri ŋanyapinyay ŋayi ŋuliŋurunydja goŋŋuru ŋula yolkalanydja ŋuriŋi nhanukalay ŋayi be rrupiyayunydja.
Nhä dhika ŋayi yurru ŋuriŋi yolŋuyu wekama Godkunydja nhanŋunydja,
märr yurru ŋayi yukurra nhina walŋanydja?
8-9 Bäythi ŋayi ŋunhi be ḻukunydja wal'ŋu mirithirrinydja,
yurru yaka ŋunhiyi ganany'tja, märr yurru ŋayi ŋuriŋiyi bäyim walŋana,
märr yurru ŋayi yukurra nhina weyinŋumirri be wal'ŋu, ga yakana yurru rakunydhirrinydja.
10 Yo, bukmak yurru dhuwala yolŋunydja walala murrmurryun,
ŋunhiyi ḻiya‐djambatj gal'ŋu yolŋu, ga ŋunhi bawa'mirri yolŋu, ḻiya‐dhumuk ŋunhi,
märrma'yirrina walala yurru ŋunhi buwayakthirrinydja winya'yundja‐wala;
Bukmaknha yurru yana gonha'yun nhä walala yukurra ŋayathama ŋuli,
ga ŋuriŋina walalaŋgala yumurrku'yuna yurru yukurra märramanydja ŋunhi rrupiyanydja dhika nhänydja malanha.
11 Ga ŋunhiyinydja walala walalawuynydja yurru ŋorra marrtji moluŋurana,
ga ŋunhiyina bili yurru wäŋanydja walalaŋgu moluna yana gupaḏalŋuwuna nhinanharawu,
bäyyi ŋunhi walala ŋuli waŋanha marrtjinya wäŋanha ḻakaranha walalaŋguway.
12 Yo, bäyyi ŋayi ŋunhi yolŋu garrwar wal'ŋu be ŋayi bathala,
ŋunhiyinydjayi yolŋu yana ŋayi yurru rakunydhirrina‐wala,
bitjanna bitjan wäyin ŋuli ŋunhi rakunydhirri;
yakana ŋanya yurru walŋakuma ŋuriŋinydja be nhäyunydja malaŋuyu ŋunhi ŋayi yukurra ŋayathama.
13 Yo, yolŋunydja walala ŋuli yukurra märr‐ḏaw'yun ŋuriŋina be walalaŋgalay nhäyuna malaŋuyu.
Walala ŋuli guyaŋirri yanapi walala yurru ŋuriŋiyinydjayi nhina yukurra walŋana,
yurru yaka warray;
14 Walala yurru yana murrmurryunna bitjanna bitjan wäyin ŋunhi bembi,
ga ŋunhina bili yäkunydja Rakunynha yurru bitjan djäkamirrinydja walalaŋgu.
Dhunupana yana yurru walalaŋgu rumbalnydja ŋunhi winya'yunna‐wala yana ŋunhana moluŋurana,
buwayakthirrina yurru,
ga gupaḏalnha‐wala yanana ŋunhiyi walala yolŋunydja walala yurru yukurra nhina ŋunhilimina wäŋaŋura rakunymirriwalana.
15 Yurru Godthu warray ŋayipi yurru ŋarranhanydja walŋakuma,
ŋayi yurru ŋarranha märrama dhawaṯmarama warray ŋuliŋurunydja romŋuru rakunydhinyaramirriŋurunydja,
ga märramana‐wala yana ŋarranha yurru nhanukalaynha wäŋalili ŋunhana.
16 Yaka biyaka ŋayaŋu‐yätjthiyanydja ŋunhi ŋayi ŋuli yukurra yolŋu nhina ḻukunydja gal'ŋu,
ga bäyyi ŋunhi nhanŋu nhä malanha ŋayi ŋuli marrtji bukulili ŋal'‐ŋalmarama buku‐yattjatkuma.
17 Ŋunhi ŋayi yurru ŋunhiyi yolŋu rakunydhirrinydja, yakana ŋayi yurru ŋunhi djaw'yun galkinydja,
dhäparknha ŋayi yurru goŋnha yana marrtji ŋunhiwalanydja wäŋalili rakunydhinyaramirrililinydja.
18 Yo, ŋayaŋu‐djulŋithinya ŋayi ŋuli nhinanha be dhiyalanydja munatha'ŋuranydja,
ga yolŋunydja walala ŋanya ŋuli ḻakaranha goŋmirri‐ḻakaranhana, wokthunana nhanŋu,
yanapi ŋayi be wal'ŋu bathala yolŋu.
19 Yurru rakunydhirrinydja ŋayi yurru ŋunhi yolŋunydja,
ga ŋunhilina rakunymirriwalana wäŋaŋura ŋayi yurru nhinanydja yukurra ŋurruk‐manapanmirri märi'muwalana walalaŋgala dhambay,
yakana biyapulnydja walala yurru djarraṯawun'tja nhäma.
20 Yo, bäyyi ŋayi ŋunhi yolŋu garrwar wal'ŋu be mirithirri,
yanana ŋayi yurru rakunydhirrina‐wala bitjanna bitjan wäyin ŋuli ŋunhi rakunydhirri;
yakana ŋanya yurru walŋakuma ŋuriŋinydja be nhäyunydja ŋunhi ŋayi yukurra ŋayathama.