47
Garray ŋurruŋu buŋgawa bukmakku bäpurru'wu
47:1–9 (God is the Supreme Ruler)
1 Go walala yolŋu'‐yulŋu, goŋ‐ḻurr'‐ḻurryurrana walala,
märr‐yiŋgathiyana, ga manikaynha miyamala go!
Wokthurrana wirrkina yana rirrakaynydja buku‐warrwarthiyana.
2 Liŋgu Garray warray biyapulnydja‐wala wal'ŋu garrwarnydja,
ŋilimurru borrk‐beyaṉiyirri nhanŋu;
Ŋayi dhuwala buŋgawa ŋurruŋunydja,
ga bukmak dhuwala wäŋa nhanukala yukurra goŋŋura djingaryun.
3 Wiripu bäpurru' yolŋu miriŋuyina ŋilimurruŋgu,
yurru ŋilimurrunydja djuḻkmaraŋala walalanha Garraywalana ŋuriŋi ganydjarryu,
bala ŋayi nherrara dharraylili walalanhanydja ŋilimurruŋgalana.
4 Ŋayi djarr'yurruna ŋilimurruŋgu wäŋa nhinanharawu,
liŋgu wirrkina ŋayi yukurra märryu‐ḏapthunmarama ŋilimurrunha.
5 Godtja dhuwala liŋguna ŋurruŋuyina buŋgawayina,
ŋunha ŋayi nhinanydja yukurra djiwarr'ŋurana,
ga yolŋunydja walala girrirriyunna yukurra yiŋgathirrina,
wokthunna nhanŋu bena buku‐warrwaryuna rirrakayyu.
6 Go ŋilimurrunydja miyamanna, wokthundhi nhanŋu,
wokthunna ŋilimurru go ŋilimurruŋgalaŋuwu Garraywu Godkunydja,
liŋgu ŋayi ŋilimurruŋgu buŋgawa.
7 Yo, Gunhu' Waŋarrnydja buŋgawana bukmakku wäŋawu buku‐ḻiw'marama yana.
Wokthunna go nhanŋu,
manikaynha miyaman wokthunna manapan.
8 Yo, Gunhuny'tja ŋunha nhina yukurra nhanukalay wäŋaŋura djiwarr'ŋurana,
ŋayathama ŋayi yukurra yolŋu'‐yulŋunha bukmaknha, bäpurru'nha ga bäpurru'nha.
9 Mulku'‐mulkurunydja yolŋu walala marrtjina yurrum'thurrunana waŋgany‐manapanminana ŋanapurruŋgala,
waŋganyŋura ŋilimurru yukurra buku‐ŋal'yundja Garraywu;
Ga mariwuynydja girri' ŋunhinydja goŋŋuru yupthurrunana,
liŋgu ŋayi Gunhu' Waŋarr buŋgawa ŋurruŋunydja bukmakku bäpurru'wu,
bukmak dhuwala yolŋu'‐yulŋu nhanukala waŋganygala yukurra djingaryun goŋŋura.