15
Balanyara dhuwala Godkunydja yolŋu'‐yulŋu
15:1–5 (This is what God’s people are like)
1 Yo, Garray, yol yurru dhika nhina yukurra nhokalanydja buṉbuŋura?
Yol yurru dhika buku‐ŋal'yun yukurra ŋunhala nhokalanydja bukuŋura Djäyandja wäŋaŋura?
2 Balanyara warray gam' yolŋu yurru nhina yukurra galkinydja gal'ŋu Godkalanydja,
ŋunhiyi ŋunhi ŋayi yurru dhäruk ŋanya märrama gal'ŋu warrpam'thun yana,
ga djäma ŋayi yurru bitjan liŋgu nhä ŋunhi ŋamakurru',
ga yuwalk ŋayi yurru waŋanydja yukurra yuwalkŋu yana dhäruktja, yaka bothinyarayŋu.
3 Yaka ŋayi yurru waŋa yätjkuma ŋunha wiripuŋunha yolŋunha,
ga yaka ŋayi yurru wiḏiyal‐gäma ŋuriŋi yolŋuyu;
Yaka ŋayi yurru ŋayaŋu‐yätjkuma nhanukalay ŋayi dhärukthu.
4 Ŋunhiyinydjayi yolŋu rom‐dhunupanydja gal'ŋu, yakana ŋayi yurru galkithirri ŋurikalanydja yolŋuwala ŋunhi ŋayi yaka ḏukṯuk Godku,
yana ŋayi yurru gananna ŋanya;
Yurru ŋayi märr‐ŋal'yundja yurru ŋurikalana yolŋuwala ŋunhi ŋayi yukurra rom‐wiyaṉiyirri Godku Garraywu,
ga dhäruk ŋanya märrama.
5 Ŋunhi ŋayi yurru ŋuriŋiyi yolŋuyu dhuwurr‐ŋamakurru'yu wekama yana guwarr,
ga märramanydja ŋayi yurru ŋunhi yana liŋgu nhä ŋayi wekaŋala ŋäthili,
ga yaka ŋayi yurru yukurra bothinyarayŋu dhäwu' ŋula nhä ḻakarama ŋurikala yolŋuwala mala‐yarr'yunaramirriwala yana ŋuriki rrupiyawu märranharawu.
Yo, balanyarayinydjayi yolŋu yurru yukurra dhärra wuṉḏaŋarrnha wal'ŋu yana,
yakana ŋanya yurru ŋula nhäyu galkinyamaramanydja,
liŋgu ŋayinydja ŋunhinydjayi yolŋu gunganharawuynha Garraywuŋunydja.