14
Ḻakarama yukurra rom‐yätjmirrinha yolŋu'‐yulŋunha
14:1–7 (Telling about foolish men)
1 Nyalmirinydja ŋunhinydja yolŋu ŋuli waŋa bitjanna gam'.
“Wanhaka dhika ŋayi Godtja be? . . .
bäyŋu warray dhika Godtja.”
Yo, bukmak yolŋu walala djarrpi'mirrinydja yana wal'ŋu;
Djämanydja walala ŋuli mirithirrina dhika yätjnha romdja,
yakana ŋula yol waŋgany yolŋu ŋayi yurru djäma ŋamathama.
2 Yo, Garrayyunydja marrtji nhäma ŋulaŋuru djiwarr'ŋurunydja,
lili djipmarama dhipala munatha'lilinydja wäŋalili,
nhäma'‐nhama ŋayi marrtji bitjan yolŋu'‐yulŋunha ŋilimurrunha;
Nhämanydja ŋayi ŋunhi marrtji ḻarrumanydja ŋuriki yolŋuwu ŋunhi ŋayi ŋuli djäma ḻiya‐djambatjthu gal'ŋu yana,
ŋuriki wal'ŋu ŋunhi ŋayi yuwalkkuma yukurra djälthirri malthunarawu Godku.
3 Liŋgu bukmak yolŋunydja walala bilyurruna yukurrana ŋulaŋurunydja Godkalanydja,
bukmakthinana gatjpaḻ'yurrunana dhuwurr‐djarrpi'yinana;
Yakana ŋula waŋgany rom‐ŋamakurru'thinanydja Godkala maŋutjiŋura.
4 Ga ŋayi Garraynydja yukurra waŋa bitjan, “Nhä ŋunhanydja dhuwurr‐yätjmirrinydja yolŋu'‐yulŋu? . . . dhuŋamirri?
Yakana ŋunha walala marŋginydja?
Balanyarana ŋunha walala yätjmirrinydja ŋunhinydja yolŋu'‐yulŋu,
bitjan walala marrtji bumana ŋarrakunydja ŋunhi yolŋu'‐yulŋunha,
ga yakana walala ŋuli bukumirriyama ŋarrakalanydja.”
5 Yuwalk yana yurru ŋunhiyi dhuwurr‐yätjmirrinydja walala barrarirri dhika wal'ŋu,
liŋgu Godtja galki yana wal'ŋu ŋurikalanydja walalaŋgala ŋunhi walala dhäruk‐märranharamirri walala nhanŋu.
6 Ŋuriŋi dhuwurr‐yätjmirriyunydja warku'yun yukurra ŋunhinydja rom‐dharraḏamirrinhanydja yolŋu'‐yulŋunha,
yurru Godtja dhuwala balanyara bitjan ŋayi ŋurrwu'na ŋurikinydja yolŋu'‐yulŋuwu ŋurruwuykmirriwunydja gal'ŋu,
ŋayi ŋunhiyinydjayi gunganhamirriyama yukurra walalanha.
7 Garray, ŋarranydja yukurra ŋäŋ'thun, ŋunhi nhe nhina yukurra ŋunha gay' bukuŋura Djäyan,
nhe yurru walŋakuma Yitjuralnhanydja miṯtjinha,
dhawaṯmarama walalanha beŋuru miriŋuwalanydja goŋŋuru yurru.
Nhäna ŋunhiyinydjayi djulŋithinyaramirri yurru walu ŋuriki Yitjuralwunydja miṯtjiwu,
ŋunhi nhe yurru Garray nhuŋuwaynha yolŋu'‐yulŋunha gämana lili, wäŋa‐roŋinyamaramana yurru walalanha.