15
1 Ga ŋarrakalana ŋayi Garraynydja waŋana bitjarra, “Yakana ŋarra yurru mel‐wuyun walalaŋgu, yana djuy'yurrana walalanha.
2-5 Wiripu‐guḻkuny'tja yurru murrmurryunna marrtji mariyuna, ga wiripu‐guḻkuny'tja yurru murrmurryun rerriyu ga marrya'yinyarayu dhika nhäyu malaŋuyu, ga wiripu‐guḻku'nhanydja yurru djaw'‐djawyunna bena‐wala barrkulilina wäŋalili,
6-9 liŋgu walala gonha'yurruna ŋarranha, ŋuyulkthina ŋarraku ŋapa‐wekaŋala. Weyinŋumirri yana ŋarra yukurrana galkurrunanydja walalaŋgu roŋiyinyarawunydja, ga bitjarrayi liŋgu ŋarra weyinŋumirri yana gulmaraŋala ŋarrakuway ŋarra ŋaramurrnydja yukurrana, ga dhiyakuyinayi märrwu ŋunhi miriŋuyunydja walalay yurru baḏuwaḏuyunna yana buma dhawar'maramana walalanha; walala yurru bukmakthirrina murrmurryundja, liŋgu ŋuriŋi walalaŋgalay yätjthu.” Ga bitjarra ŋayi Garray waŋananydja.
10 Ga ŋarranydja buku‐wakmaraŋala waŋana bitjarra, “Ŋarranydja dhuwala galŋa‐yätjthina mirithinana. Ye‐e‐e, ŋarra bini ŋunhi rakunydhinya muka, ŋunhi muka yana ŋunhi ŋarra yothu' yana. Yakana ŋarraku ŋula yol märr‐ŋamathirrinydja yukurra, liŋgu bitjanna liŋgu ŋarra ŋuli yukurra ḻakaramanydja walalaŋgu yolŋu'‐yulŋuwunydja, dhä‐ḏälthirri yana ḻakarama wuṉḏaŋarryu wal'ŋu dhärukthu bilmaranharawu walalaŋgu ŋuliŋuru yätjŋurunydja. Yaka ŋarra manaŋinanydja ŋula yolkala, yurru bukmak yolŋu yukurra ŋarraku ŋuyulkthirrinydja ga ŋaramurryirrinydja.
11-12 Garray, nhe marŋgi ŋarrakunydja ŋunhi ŋarra ŋuli djäma ḻatju'kuma marrtji dhika nhuŋu, ga bitjan liŋgu ŋarra ŋuli bukumirriyamayi ŋurikiyi miriŋuwunydja ŋarrakalaŋuwu ŋunhi walala mariŋura.”
13-14 Ga ŋayi Garraynydja waŋana ŋarrakala bitjarra, “Märr‐yuwalk yurru miriŋunydja marrtjina lili, bala walala yurru djaw'‐djawyunna yukurra girri' malanha ŋunhi dhapirrkmirrinydja, ga mel‐wiḏiny'tja, ga bitjandhi liŋgu walala yurru djaw'‐djawyundhi yolŋunha walalanha be‐wala yana wal'ŋu barrkulilina. Ga ŋuliwitjandhiyina ŋarra yurru dhä‐ḏir'yundja walalanha ŋunhi yolŋu'‐yulŋunhanydja, liŋgu ŋuriŋi walalaŋgalay yätjthu; walala yurru yukurra djämanydja ŋunhana mulkuruwuna yolŋuwu, miriŋuwuna wal'ŋu ŋurikina. Liŋgu ŋarrakunydja ŋaramurr balanyarana bitjan gurtha ŋunhi nhära yukurra yurru bitjan liŋgu.”
15 Ga ŋarranydja waŋana bitjarra, “Garray guyaŋiya ŋarranha, ga guŋga'yurra ŋarranha yukirriya. Walŋakuŋa ŋarranha ŋuliŋuruyi walalaŋgala goŋŋurunydja. Yakana walalaŋgu mel‐wuyurranydja, yana walalanha ŋayaŋu‐yätjkuŋana ŋuriŋi nhokalay buku‐ruŋinyamaranharawuyyunydja. Nhenydja marŋgi ŋunhi ŋarranha walala yukurra ŋayaŋu‐yätjkuma, liŋgu ŋarra ŋuli yukurra waŋa nhokala yäkuyu.
16 Garray, nhuŋunydja dhäruk bitjan ŋatha ŋarraku; ŋarra ŋuli ḻukanydja ŋunhi nhuŋu dhäruktja marrtji rärru‐ŋupan yana wal'ŋu. Ŋuriŋi nhokala dhärukthu ŋarranha ŋuli marrtji ŋayaŋunydja bitjan djulŋikumana, liŋgu ŋarranydja dhuwala nhuŋuway yana yolŋu.
17 Yo, yaka ŋarranydja ŋuli ḻayḻayyuna ŋula nhäŋura, yana walu warrkuḻunha wakalŋuranydja; ŋarra ŋuli nhina yukurra ŋarrapi gäna, liŋgu nhokalay goŋdhu ŋarranhanydja ganaŋ'maraŋala. Ŋarra yukurra nyinyaŋdhunna ŋapa‐nherraṉmirrina ŋuriki yätjkunydja ŋunhi walala ŋuli djäma yukurra.
18 Nhäku ŋarra yurru mukthundja galŋa‐yätjthirri yukurra nhina? Nhämirri nhe ŋuli walŋakuŋunydja ŋarranha dhipuŋuruyi malaŋuŋuru romŋuru? Wiripunydja nhe ŋuli guŋga'yun ŋarranha, ga wiripunydja bäyŋu.” Bitjarra ŋarranydja waŋana Garraywala.
19 Ga ŋayinydja waŋana Garraynydja bitjarra, “Yaka yukirriya waŋiya biyaka nhäŋiniŋ'tja dhäruk. Ŋuli nhe yurru bilyun, ga gumurr‐roŋiyirri yurru ŋarrakala, bala ŋarranydja yurru nhuna märramayi, ga nhenydja yurru ŋarraku biyapul djämamirriyirriyi. Ŋuli nhe yurru ḏaḏawyun ŋuliŋuruyi dhärukŋuru nhäŋiniŋ'ŋurunydja waŋanharaŋuru, ga waŋiya yukirriya ŋunhi liŋgu dhäruk mayali'mirri wal'ŋu yuwalkŋu, ga biyapul ŋarrapinydja yurru waŋana nhokala yukurra dhärukkurru. Yaka roŋiyiya walalaŋgalanydja gali'lili wapthurra biyapulnydja; walala yurru yana wapthun nhokalanydja gali'lili, roŋiyirri yurru nhokalana.
20 Yo, nhenydja yurru yana dhärra wuṉḏaŋarryirri wal'ŋu, yakana nhe yurru giṯthun ḏur'‐ḏuryunaranydja walalaŋguŋu. Walala yurru yolŋu'‐yulŋunydja bitjan ŋurruŋu‐yuḻkthun nhuŋu, yurru yakana walala yurru djuḻkmarama nhunanydja. Liŋgu ŋarranydja ŋunha nhokala warray galki gali'ŋura; ga ŋarra nhunanydja yurru gunganhamirriyama ga walŋakuma.
21 Märr‐yuwalk yana ŋarra yurru walŋakumanydja nhuna beŋuruyi dhuwurr‐yätjmirriwalanydja yolŋu'‐yulŋuwala; ga ŋarra yurru nhuna dhawaṯmaramanydja warryun walalaŋgala goŋŋurunydja.” Ga bitjarra ŋayi Garray waŋananydja.