60
Djarraṯawun'tja dhuwala liŋguna maḻŋ'thurrunana
60:1–22 (The light has come)
1 Yo, Godtja waŋa yukurra bitjan, “Nhuma ŋarrakuway gal'ŋu ŋunhi yolŋu walala. Gaŋgathiyana ga wekaŋa djarraṯawun'nha ŋuruku wiripu‐guḻku'wunydja yolŋu'‐yulŋuwu, liŋgu ŋunhi nhuŋunydja djarraṯawun' liŋguna bunanana, ga ŋuriŋi nhanukala Garraywala ḻatju'yunydja wal'ŋu djeŋarra'yunydja yukurra ŋäkirrmaramana nhumalanha ḻiw'maramana.
2 Ŋunha wiripu‐guḻkuny'tja yolŋu walala miṯtji yurru yukurra nhina bukumunha'ŋura yana, yurru Garraywunydja djarraṯawun' ḻatjuny'tja ŋunhinydja yurru räkukumana walalanhanydja ŋuliwitjan nhumalaŋgalaŋukurruna.
3 Ŋunhinydja yurru wiripu‐guḻkuny'tja miṯtji yolŋu walala ga buŋgawamirri marrtji ŋunhiwalana nhumalaŋgalana djarraṯawun'lili; ga yuṯana ŋunhinydjayi walu yurru djaḏaw'yun walalaŋgunydja, liŋgu walala yurru maḻŋ'marama ga nhäma Garraywuna djarraṯawun' ḻatju'na dhika ŋanyana.
4 “Way Djurutjalam! Nhäŋa ya', ŋunhana nhumalaŋgunydja yolŋu'‐yulŋu marrtji yukurra lili wäŋa‐roŋiyirrina.
5 Yo, nhe yurru nhämanydja walalanha marrtjinyaranydja lili, bala nhuŋu yurru ŋayaŋunydja djulŋithirrina dhikana goŋmirriyirrina; walala yurru marrtjinydja beŋuru yana barrkuŋuru buku‐ḻiw'marama wäŋaŋurunydja, gämanydja yurru marrtji ḻatju'mirri ŋanya dhika mel‐wiḏi'na nhänydja malanha.
6 Walala yurru marrtjinydja ŋuriŋi yarraman'thu, gämanydja marrtji ŋunhiyi malanha garwarrwarr' ga buŋgan bäw', bitjan wokthunna yukurra Garraywu.
7 Wiripunydja yurru guḻku'yu mirithirri yolŋu'‐yulŋuyu gäma marrtji wäyin bembi bathanarawu mundhurr, buku‐ŋal'yunarawu nhanŋu Garraywu ŋunha Godkala Buṉbuŋura, ŋunhi yurru yukurra dhärra dhapirrkthirri dhika wal'ŋu.”
8 Nhä dhuwalanydja buṯthun yukurra waŋupini'kurrunydja, bitjandja bitjan wäyin buṯthun yukurra wäŋa‐roŋiyirri bala wäŋalili?
9 Ŋunhinydja Godkuna ŋunhi yolŋu'‐yulŋu, walala yukurra lili wäŋa‐roŋiyirrina. Yuwalk yana walala yukurra marrtjinydja wäŋa‐roŋiyirrinydja beŋuru barrkuŋuru wäŋaŋuru mitjiyayu ga dhika nhäyu, ga marrtjinydja walala yukurra goŋ‐dhawurrŋamirrina girri'mirri mel‐wiḏi'mirrina dhikana gäma yukurra, märr yurru walala yukurra märr‐ŋal'yun Godku ŋurikina wal'ŋu Yitjuralwalaŋuwuna Ḏarrtjalkkuna Waŋarrwu, liŋgu ŋayi yukurra Garraynydja märr‐ŋal'yun nhokala Djurutjalam wäŋa.
10 Yo, Garraynydja waŋana Djurutjalamgala wäŋawala bitjarra, “Yo, ŋuruŋu mulku'‐mulkuruyunydja yurru djäma ŋal'marama marrtji ḻoḻunydja gunganhamirriyama biyapul dhuwala wäŋanha ḻiw'marama, ga ŋuruŋu wiripuŋuwuyyunydja wäŋawuyyu ŋurru'‐ŋurruŋuyu yurru yukurra guŋga'yun nhumalanha. Liŋgu ŋäthilinydja ŋunhinydja ŋarra dhä‐ḏir'yurruna nhumalanha ŋuriŋi ŋarrakalay ŋarra ŋaramurryu, yurru dhiyaŋunydja‐wala ŋarra mel‐wuyurrunana nhumalaŋgu.
11 Yo, ŋunhi dhurrwaranydja ḻoḻu yurru yukurra dhärra ḻapthunara yana walupuy ga munhaku, yakana yurru dhaḻ'yun ŋunhiyi, märr yurru ŋuriŋi buŋgawayunydja wal'ŋu gäma nhuŋu mel‐wiḏiny'tja malanha girri'.
12 Liŋgu ŋunhinydja walala miṯtji yolŋu walala ŋunhi walala yaka yurru nhumalanha guŋga'yun, ŋunhiyinydja walalanha yurru baḏuwaḏuyunna warrpam'thunna.
13 Yo, bukmakthunydja yolŋuyu walalay yurru gäma ḻatju' ŋanya dhika lanapu, bala walala yurru dhuḻ'yunna yukurra ŋarraku Buṉbunhanydja dhapirrkkumana dhikana.
14 Ga ŋunhinydja walala ŋunhi walala ŋuli yukurranha nyinyaŋdhuna ga ŋayaŋu‐yätjkunha nhumalanha, walalanydja yurru marrtji ga buku‐ŋal'yunna dhiyalayi. Ga dhuwalayi wäŋa Djurutjalamdja yurru yäku ‘Garraywuna Wäŋa,’ ga wiripunydja ŋayi yäku yurru ‘Djäyannha Wäŋa, Yitjuralwalaŋuwuna Waŋarrwu Ḏarrtjalkkuna Wal'ŋu Djeŋarra'wuna Godku.’
15 “Yo, yolŋu walala yurru yaka biyapulnydja mel‐ŋorra ga nyinyaŋdhun nhumalaŋgu, ga yakana biyapulnydja nhe yurru dhuwalayi wäŋa djingaryun yolŋumiriw. Ŋarranydja yurru nhuna djäma dhapirrkkumana dhikana wal'ŋu, ga bitjanna liŋgu gupaḏalnha‐wala yurru yolŋu walala nhina yukurra galŋa‐djulŋithirrina dhikana dhiyalanydja wäŋaŋura.
16 Yolŋuyu walalay buŋgawamirriyunydja yurru gäma nhumalaŋgu biyapulnha wal'ŋu ḻatju'mirrina ŋanyana mel‐wiḏi'mirrina girri', bala nhumanydja yurru yana dharaŋanna ŋunhi ŋarrapi Garray nhumalaŋgu walŋakunharamirrinydja God, Yitjuralwu biyapul wal'ŋu ganydjarr‐ḏumurru Waŋarr, ŋunhi ŋarra nhumalanha yänana dhawaṯmaraŋala beŋuru miriŋuwalanydja goŋŋuru.
17-18 Yo, nhumalaŋgu ŋurru'‐ŋurruŋunydja yurru goŋ‐nherraṉmirri gurrum'thunna dhikana, rom‐waŋganydhirrina yurru, ga dhiyalanydja gay' yolŋu walala yurru nhina yukurra ŋayaŋu‐wurrkurrum'thirrina; yakana biyapul yurru yolŋu walala bunharamirri yukurra, liŋgu ŋunhiyinydja rom‐bunharamirrinydja yurru winya'yunna‐wala yana buwayakthirrina. Ŋarranydja yurru nhumalanha gunganhamirriyama warray, bala bukmaknha yolŋunydja walala yurru wokthunna yukurra ŋarraku, nhumalaŋgalaŋuwu Garraywu Walŋakunharamirriwunydja.
19 Yo, ŋarrapi yana Garrayyu Godthu yurru yukurra räkukumanydja dhuwala wäŋanhanydja, liŋgu ŋarranydja dhuwala yukurra yurru djarraṯawun'thirrina nhumalaŋgala warrpam'nha.
20 Yakana yurru djarraṯawun' gärri buku‐munha'yirrinydja, ga yakana biyapul yurru nhuma yukurra nyä'yunmirri ŋuriŋi warwuyunydja.
21 Bukmakthu nhuma yurru yolŋu'‐yulŋuyunydja djäma yukurra ŋayaŋu‐yunupana, ga dhuwalanydja gay' wäŋa yurru nhumalaŋguwaynha gupaḏalnha‐wala yana. Nhuma yurru ŋuthandja yukurra bitjanna bitjan dharpa dholkunhara ḻämu‐nherraṉara ŋarrakuŋu; ḻatju'thirrina dhika nhuma yurru dhapirrkthirrina ŋuthandja, bala walala yurru yolŋu'‐yulŋuyunydja nhämana, bala wokthunna yurru ŋarraku.
22 Ŋäthilinydja ŋunhinydja nhuma yolŋu walala miṯtji märr‐ḻurrkun' yana, yurru nhuma ŋunhi ŋuthandja yurru marrtji ganydjarrmirrina wal'ŋu yana, dhaŋaŋnha yurru yolŋu walala. Yo, Godthunydja djarr'yurruna ga nherrara walu dhiyakuyinydjayi, ŋunhi yurru ŋayi maḻŋ'thun, ga ŋunhi yurru ŋayi walu ŋunhi bunanydja, ŋarranydja yurru waḏutjana yana djämanydja, maḻŋ'thundja yurru waḏutjana yana.” Bitjarra ŋayi Garray waŋananydja.