59
Yolŋu walala barrkuwatjkunhara yätjkuŋu Godkalaŋuŋuru
59:1–21 (People are separated from God by sin)
1-2 Yo, wiripunydja mak nhe ŋuli guyaŋirri Garraynha yanapi ŋayi ganydjarrmiriwnha ga mäkiri'miriwnha dhumuknha, liŋgu ŋayi ŋuli yakana nhuna guŋga'yun ga walŋakuma. Yaka ŋayinydja ŋunhi ganydjarrmiriw ga mäkiri'miriw, yurru ŋayi yurru yakana nhuna wekamanydja, ŋunhi nhe ŋuli ŋäŋ'thundja ŋanya ŋula nhäku, liŋgu nhokala ŋuriŋi yätjthunydja ganaŋ'maraŋalana nhuna ŋuliŋuru Godkalanydja. Marrtji warray nhe ŋuli ŋunhi buku‐ŋal'yunarawunydja, yurru yakana ŋayinydja yurru Garraynydja mäkiri'‐witjun nhuŋu. Liŋguna ŋayinydja buku‐yaw'yunminana ŋanyapinyay ŋayi, liŋgu nhe yukurra mukthun djäma yana ŋunhiyi yätjtja.
3 Nhenydja ŋuli ŋunhi buma yukurra yolŋunha ŋayaŋu‐yätjkuma, ga bitjan liŋgu nhe ŋuli bothirrinydja ḻakarama, ga djäma ŋula nhä malanha mirithirrina gal'ŋu djarrpi'na rom.
4 Yaka yana nhe ŋunhi yuwalktja ḏukṯuk nhäyinyara yuwalk ga ŋamakurru', ga ŋunhi nhe yurru mala‐yarr'yun ŋula yolnha yolŋunha djarr'yun, ŋunhiyinydja nhe ŋuli mäkiri'‐witjun ŋurikina bothinyamirriwuna yana, ga bitjandhiyi nhe yukurra guyaŋirri djarrpi' ŋula nhäna malanha ŋunhi nhe yurru djäma.
5-8 Ga ŋunhi nhe yurru marrtji ŋula wanhamala wäŋalili, walalanydja yolŋu'‐yulŋunydja ŋuli ŋayaŋu‐yätjthirrina ga rakunydhirrina, liŋgu ŋuriŋina nhokalana yätjthu ŋunhi nhe yukurra djäma. Yakana ŋula yol nhina yukurra ŋayaŋu‐yal'yunaraŋuranydja ŋunhi nhenydja ŋuli ŋunhiliyi galki, ga yakana nhe marŋgi nhä ŋamakurru' ga dhunupa ga yuwalk; yakana nhe ŋuli djäma rom‐waŋganydhirrinydja ŋunhi. Marrtjinydja nhe yukurra djarrpi'kurruna yana dhukarrkurrunydja, ga ŋunhi yurru ŋula yol nhuŋu yukurra malthundja, yakana ŋayi yurru nhina ŋayaŋu‐walŋathirrinydja.
9 Ga walala yolŋu'‐yulŋunydja waŋana bitjarra, “Yo, dhiyakuyina märrwu ŋunhi ŋayi Godthu ŋuli yakanydja guŋga'yun ŋanapurrunha. Liŋguna ŋilimurru marŋgina. Godthunydja yurru yakana ŋula yolnha dhä‐ḏir'yun, ŋunhi ŋayi ŋuli ŋuriŋiyi ŋanapurrunha ŋayaŋu‐yätjkumanydja. Ŋanapurrunydja yukurra gatjpu'yun marrtjinyarawunydja djarraṯawun'mirriwuna yana, yurru ŋuriŋi buku‐munha'yunydja ŋanapurrunha ḻiw'marama yukurra ŋäkirrmarama.
10 Ŋanapurrunydja dhuwala balanyarana yolŋu walala bitjan bamba'‐bambaynha, yakana ŋanapurru yukurra nhäma ŋamathama; ŋunhinydja walupuynydja wal'ŋu ŋanapurru yukurra marrtji dhä‐ŋal'ŋalyunna, galki'‐galkirrina marrtji.
11 Barrarirrina ŋanapurru yukurra ga galŋa‐yätjthirrina; ŋanapurrunydja ḏukṯukthirri yukurra ŋunhi ŋayi yurru Godthu ŋanapurrunha guŋga'yun, yurru yakana ŋayinydja ŋuli yukurra guŋga'yun ŋanapurrunha, liŋguna ŋayinydja ganarranana ŋanapurrunha, liŋgu ŋanapurru dhuwurr‐yätjmirrina wal'ŋu, yakana ŋamakurru.
12-13 Bitjanna liŋguna ŋanapurru yukurra bukulili ŋal'‐ŋalmaramanydja nhä malanha yätjtja. Garray, ŋanapurru marŋgi ŋanapurruŋgalaŋuwu gatjaḻwunydja ŋurikiyi, ŋunhi yätjnha yana mirithirrina, yurru yakana ŋanapurru ganarrana ŋunhiyinydja, ga yaka ŋanapurru malthurruna yuwalkkuŋala gal'ŋu nhuŋu, yana ŋanapurru ḏiltjina wekaŋala nhuŋu. Bitjanna liŋguna ŋanapurru yukurra djämanydja djarrpi'kumana yanana yätjnha wal'ŋu; liŋgu ŋanapurruŋgu guyaŋinyarawuy djarrpi'na yana, ga dhäruk ŋanapurruŋgu bothinyarayŋuna yana, yakana yuwalk.
14-15 Yakana ŋula waŋganydhu djäma rom‐waŋganydhinanydja, ga yakana ŋula waŋgany ḏukṯukthina yuwalkku nhinanharawu. Ga ŋunhi ŋayi ŋula yol ḏaḏawyun yurru djämaŋuru yätjŋurunydja, ga ŋayinydja ŋuli wiripuŋuyunydja yolŋuyu ŋuyulkthirrina nhäma ŋanya, nyamir'yunna. Ga yuwalk yana ŋanapurru dhuwala rom‐yätjmirrinydja wal'ŋu yolŋu'‐yulŋu.”
Yo, Garrayyunydja ŋunhi nhäŋala ŋunhimalayi yätjlili, bala ŋayi yakana ŋula waŋganydhu djäma yukurrana rom‐dhunupanydja wal'ŋu.
16 Nhäŋa'‐nhaŋalanydja ŋayi marrtjina ŋuriki ḻarruŋalanydja yolŋuwu waŋganygu ŋunhi ŋayi yukurra yurru djingaryun ṉapuŋga' wal'ŋu, bitjan waŋgany‐manapan yurru yolŋunha ga Godnha ŋuliwitjan bukumirriyanharakurruna. Ḻarruŋalanydja ŋayi, ga bäyŋu, yakana ŋula waŋgany yolŋu yukurrana ṉapuŋgany'tja nhinana. Bala ŋayipina marrtjina lilinydja, bala ŋayi walŋakuŋalanydja ŋilimurrunha ŋayipina ŋuriŋiyi nhanukalay ŋayi rom‐dhunupayunydja.
17 Ŋayi djämanydja bitjarra yana liŋgu rom‐dhunupayina, ga ŋayaŋu‐dhunupayunydja ŋuriŋinydja ŋanya bitjarra gunganhamirriyaŋalana, bitjarrana bitjan ŋuli girri' gumurrwuy djambaka'yinyara, ga muḻkurr ŋanya gunganhamirriyaŋala bitjarra yana liŋgu walŋakunharamirriyunydja. Yuwalk yana ŋayi djälnydja bal'maranhamina djälwu Godkalaŋu, bumara marrtjina buku‐ruŋinyamaraŋalanydja Godku miriŋunhanydja.
18 Yo, yuwalk yana ŋayi yurru buku‐ruŋinyamarama yolŋu'‐yulŋunha ŋupanayŋuwuyyi yana walalaŋgalaŋuwuy walala djämawuy, yana ŋayi yurru bumanydja ŋunhinhanydja walalanha ŋunhi walala yukurra djäma yätj, ŋunhinhanydja ŋunhi walala yukurra ŋuyulkthirri ŋapa‐nherraṉmirri nhanŋu Godku, bäythi walala ŋunhiyinydja ŋunhi walala yukurra nhina be‐wala barrku wäŋaŋura, ŋunhiyi malanha rom‐djarrpi'mirrinhanydja yurru baḏuwaḏuyunna ŋuriŋina Godkalana ŋaramurryu.
19 Yo, ŋuriŋi dhä‐yawar'yunarayunydja yolŋu'‐yulŋuyunydja yurru nhäma dharaŋana wal'ŋu birrka'mirriŋuranydja wäŋaŋura, bala walala yurru rom‐wiyaṉiyirrina Godkunydja, walala yurru nyinyaŋdhunna ŋuriki yätjkunydja ŋapa‐nherraṉmirrina, bala waḏutjana yana dhäruktja märrama Godnha, ḻatju'‐ḻakaramana yurru ŋanya yäkunydja. Liŋgu ŋayinydja yurru marrtji bitjanna bitjan ŋuli gapu ŋurruthinyara, ŋunhi yurru ŋanya gäma ŋunhiyinhayi wuṉḏaŋarryu watayu, ḏur'yun yurru, ga ŋunhiyinydjayi watanydja bitjan nhanŋu Garraywu ŋir'nha, ŋir'yunna ŋayi yurru.
20 Yuwalk yana ŋayi yurru marrtjinydja lili, ŋurikimirri nhanukalayŋumirrinydja yolŋu'‐yulŋuwalaŋumirri, bala walŋakumana ŋayi yurru ŋunhinhanydja walalanha ŋunhi walala liŋgu ŋanydjaḻa'yurruna bilyurruna, ga gonha'yurrunana ŋunhi yätjnhanydja.
21 Yo, bitjarra ŋayi Garray waŋananydja, “Dhuwala ŋarra dhawu'‐nherraṉdja yukurra gam'. Liŋguna ŋarra nherrara ŋarrakuwaynydja ŋunhi Garrkuḻuknhanydja Walŋanha nhokalana, ga ŋarraku dhäruktja ŋarra nherrara ŋäṉarrlilina nhokala; bitjanna liŋgu gupaḏalkumana nhe yurru yukurra waŋanydja ŋarraku dhäruktja. Yo, nhepi ga nhuŋu yumurrku' ga ŋunhana‐wala nhokuŋu ŋunhi mala‐wunharawuynha, gupaḏalnha‐wala nhuma yurru yukurra nhina walŋanydja ŋarrakalana ŋuriŋiyi dhärukthu.” Ga bitjarra ŋayi Garray waŋananydja.