83
A ninge, a ninge na lotu ta Asap iakan.
1 God, waak u kis matien.
Waak u kis kunkun, God. Nu taman tut.
2 Nes ira num ebar bia diet tut na kamahar,
ma diet ing diet malentakuane ugu diet hatamat habaling diet.
3 Diet keskes wara tangtange ira nianga kumaan uta diet ira num matanaiabar,
ma diet harpingit bia diet na hagahe diet ing u kalak tar.
4 Diet tange, “Mai, dahat gi haliare diet no kidilona huntunaan Israel,
waing daga lik luban hatikane no hinsang Israel.”
5 Diet harpingit tika ma tiga lilik.
Diet tur tika pane ugu,
6 diet me Edom ma ira Ismael,
ira Moab, no huntunaan ta Hagar,
7 ira Gebal, ira Ammon, ma ira Amalek,
no huntunaan ta Pilistia, ma ira matanaiabar me Taia.
8 Ma ira Asiria mah i te tur tika ma diet
wara harharahut ira Ammon ma ira Amalek, ira iruo huntunaan na bulumur tane Lot.
9 Gil ta diet hoing u ga gil ta ira Midian,
ma hoing u ga gil tane Sisera ma Jabin kaia tano taah Kison,
10 ing dir ga maat ares Endor.
Ma ira palatamai diet ira udir umri ga marsang tano pise.
11 Bu bing ira udiet lualua hoing u ga gil ta Oreb ma Seeb,
ma ira udiet kabinsit hoing u ga gil ta Seba ma Salmuna,
12 ing dal ga tange, “Dahat gi kap leh no bilai na pise tane God wara udahat.”
13 Nugu God, se harbasiane diet hoing ira kaabus,
ma hoing ira pala wit no dadaip i puuh se tar.
14 Hoing ra iaah i iaan tano malit,
bia hoing tiga karamena iaah i hakarat ira uladih,
15 io, pasak mur diet ma no num tamat na dadaip
ma nu haramramin diet ma no num dadas na baiangin.
16 Watong, hamalahuan diet,
waing ira tunotuno diet naga silihe ugu.
17 I tahut be diet naga hirhir ma diet naga tapunuk hathatika.
I tahut be diet na maat ma ra hartakun,
18 waing diet naga nunure be augu, nong no hinsaam no Watong,
bia augu sen mon Nong i Naliu Harsakit tano ula hanuo bakut.