82
A ninge na lotu ta Asap.
1 God i lualua taar tano tamat na kinkinis hurlungai.
I tar no harkurai nalamin ta ira kaba god.
2 Ma i tange, “Na haruat hunanges ing muat na hok diet ing diet pai gil ira takodasuana magingin,
ma haruat um hunanges bia muat na tur taar tano palpal ta ira ut na sakena?
3 Muat na tur harahut ira maris ma ira tintana.
Muat na gil no magingin takodas ta ira maris ma ira malahahin.
4 Muat na harahut ira mahiuhiu na tunotuno ma diet ing diet mon sunupi.
Muat na halon diet sukun ira lima diet ira ut na sakena.
5 Diet pai nunure ta linge,
diet pai palai ta tiga linge.
Diet goota bia tano kankado.
Ira burena bakut no ula hanuo i gunagune.
6 Iau ga tange, ‘A god muat.’
Muat ira natine Nong i Naliu Harsakit.
7 Iesen muat na maat hoing ira tunotuno mon.
Muat na puko suur hoing ira kaba lualua bakut.”
8 God, tur hut, ma nu kure no ula hanuo,
kanong a num tus ira kantri bakut.