80
A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Ira Puspuspal tano Kunubus.” A ninge na lotu ta Asap.
1 Hadade mehet, augu no Ut na Harbalaurai ta Israel.
Augu ing u lue Iosep hoing ra kaba sipsip.
Augu ing u kis tano num kinkinis na king nalamin ta ira iruo kerubim, het saring ugu bia nu rarang
2 nalua ta ira huntunaan na Epraim, Beniamin ma Manase.
Hamines ta mehet ira num dadas.
Mai, ma nu halon mehet.
3 God, nu hasigarine habaling het.
No matmataan taam na rarang naliu ta mehet,
waing mehet naga langalanga sukun ira numehet tinirih.
4 Watong, augu no God Nong i Dadas Harsakit,
na haruat hunanges no num bala mamahien taar ta ira sinasaring ta ira num matanaiabar?
5 U te tabar diet, ma diet iaan tika ma ra polo na mata diet.
U te hamamo diet ma ra tamat na polo na maata.
6 U te gil bia ira tunotuno diet kis hutet ta mehet, diet na harubu pane ira numehet pise,
ma ira numehet ebar, diet kukutur ta mehet.
7 God Nong u Dadas Harsakit, nu hasigarine habaling het.
No matmataan taam na rarang naliu ta mehet,
waing mehet naga langalanga sukun ira numehet tinirih.
8 U ga rau tiga ina wain ma Isip.
U ga pasak hasur ira huntunaan bakut ta ira nudiet pise ma u gaam so ie.
9 U ga sasare no pise utana,
ma i ga mon boline ma i ga burung no pise.
10 No maguruh tana ga kasar ira uladih.
Ira katena ga kasar ira tamat na taltalona daha.
11 Ira singarena i haan saakit ures na tes.
Ira boline i haan tapaka saakit ukaia tano taah Iuperetis.
12 Warah u dure hasur no wer nong i la long bat tar ie,
kaik diet ing diet hanahaan saakit ta iakano ra ngaas, diet gi dik ira hunena?
13 Ira bore maram ra tingena malit, diet haliarei,
ma ira rakaia na wawaguai diet iaan tana.
14 God Nong u Dadas Harsakit, tapukus ukai ta mehet.
Nanaas suur maram ra mawe ma nes het.
Nes mur iakan ra ina wain.
15 No kata na limaam gate so no boline.
Aie no bulu nong u te halon hatamat leh ie wara num at.
16 No num ina wain di te buruh ie, ma di te hakarat ie.
Ira num matanaiabar diet hiruo na minaat kanong u gate boor diet.
17 I tahut bia nu hadadas no tunotuno i tur taar tano kata na limaam,
iakano tunotuno nong u ga gilamis leh ie wara num at.
18 Io huo, mehet pa na tur talur ugu.
Hanunuhuan mehet, ma mehet na tataau utano hinsaam.
19 Watong, augu no God Nong i Dadas Harsakit, nu hasigarine habaling het.
No matmataan taam na rarang naliu ta mehet,
waing mehet naga langalanga sukun ira numehet tinirih.