79
A ninge na lotu ta Asap.
1 God, ira matanaiabar ta ira kantri ing diet pai Iudeia diet te laka tano num pise.
Diet te hamamagune no num halhaliana hala na lotu,
ma diet te dure hasur Ierusalem ma kana i noh haliara taar.
2 Diet te waak kapis tar ira palatamai diet ira num tultulai
waing na hanuat nian adiet ira maan tano hurmauhuo,
ma ira tamtabe diet ing diet tar tutun ira udiet nilon taam, bia a nian adiet ira rakaia.
3 Diet te hurange ira de diet haruat ma ra taah
tano kidilona taman Ierusalem,
ma taie um tikai kaia bia na bus kaike ra minaat.
4 Mehet haruat ma ra linge na tangtange hagahe wara audiet ira matanaiabar ta ira hanuo hutet ta mehet
ma hoing mah ra linge na hinasakit ma hinelar wara udiet ira tunotuno diet kis luhutane tar mehet.
5 Watong, na haruat um hunanges? U lik bia nu be ngalngaluan hatika taar at um?
Na haruat hunanges no num bala mamahien nong i iaiaan hoing ra iaah?
6 Hurange hasur tar no num tamat na nginangahien naliu ta ira kantri ing diet pai la ruru ugu.
Hurange hasur mah ie naliu ta ira matanaiabar ing diet pai la tataau no hinsaam.
7 Kanong diet te kanam kidilon se Israel
ma diet te hagahe se mah no numehet taman tus.
8 Waak u lik hararoot tar ta mehet ira sakana magingin audiet ira hintubu mehet.
Mehet saring no num harmarsai be na hanuat gasien wara harharahut mehet,
kanong mehet te kis taar narakoman ra tamat na sunupi.
9 God, a numehet Ut na Harhalon, harahut mehet,
waing daga urur taam.
Kap leh mehet sukun diet ing diet haliare mehet, ma lik luban se ira numehet magingin sakena,
wara utano hinsaam.
10 Wara bih bia ira hunhuntunaan ta ira mes na hanuo diet na tange,
“Ie he no udiet God?”
Mehet sip bia het na nes ing nu balu kaike ira kantri
uta ira de diet ira num tultulai ing ga saal.
11 Hadade diet ing diet kis taar ra tamat na harpidanau ma diet susuah tupas ugu.
Diet ing di te kure tar bia diet na maat,
i tahut bia nu halon diet ma no dadas na limaam waing diet pa naga maat.
12 Watong, ta ira tunotuno diet kis hutet ta mehet, nu balu pukus diet ta liman ma iruo na pakaan
uta ira nianga na harhuli diet gate se tar taam.
13 Io, mehet no num matanaiabar, ira sipsip narako tano num longlong,
mehet na tanga tahut taam hathatikai.
Ma ta ira tunotuno diet lon katin ma na hanahaan,
diet na pirlat ugu.