53
A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Mahalat”. Devit ga pit ie.
1 No ulba i tange narako tano kaatine,
“Taie ta God.”
Ira udiet nilon i mapus sakasaka ma da miliguruane ira udiet tintalen.
Taie tikai i gil no tahut.
2 God i nanaas suur meram ra mawe
ta diet ing a tunotuno mon diet,
wara nesnes ing bia tikai i palai
ma bia tikai i sisilih uta God.
3 Diet bakut diet te siel wiis laah.
Diet tika bakut, diet te hanuat sakena.
Taie tikai pai gil no tahut,
taie tunat tikai.
4 Hohe, pai tale bia ira ut na gil nironga diet na nunure tiga linge?
Diet ing diet harsirikane ira nugu matanaiabar hoing tikai i ien beret,
ma diet pai la sasaring uram ho God.
5 Diet ke, nora ramramin i manga ubal diet,
ing ga taie ta linge bia da burte menalua.
God ga bul harbasiane ira suru diet, ing diet ga harubu ma muat.
Muat ga gil hahirhir diet, kanong God ga malentakuane diet.
6 Maris, iau manga sip bia no harhalon ta ira Israel na hanuat me Saion!
Ing God na bul pukus habaling ira bilbilai taar ta ira uno matanaiabar,
i tahut bia ira bulumur te Iakop diet na guama. I bilai bia ira Israel diet na laro.