52
A nianga tupas no tunotuno nong i kure ira ut na ninge: Devit ga pit iakan ra ninge. I hinhinawas utano pakana bung ing Doek me Edom gate haan tupas Sol, gaam hinawasei bia, “Devit i te haan tano hala tane Ahimelek.”
1 Warah gu latlaat ta ira sakena, augu no tamat na lualua?
Warah gu latlaat tano kidilona bung bakut,
augu nong a linge na hirhir ugu tano matmataan ta God?
2 No karamem i pingit hawaat ra hauhagawai.
I ngan hoing ra niani na resa,
augu nong u la gilgil hinarabota.
3 U kalak no saksakena ma u malok se no bilbilai.
U sip bia nu harabota ma pau manga tanga asa ing i takodas.
4 U sip ira kaba nianga na harangunngutaan,
augu nong a ut na harabota augu!
5 Tutun saakit, God na bul hasur ugu ma na bu bing hatikane ugu.
Na palim hadadas haut ugu ma na ras tapikane ugu tano num palpalih.
Na ragatane haut ugu mekaia ra hanuo gar ta ira lilona.
6 Ira ut na takodas diet na nes ma diet na ramramin.
Diet na kurus no ut na sakena ma diet na tange bia,
7 “Iakaiken um no tunotuno
nong pai nes bia God aie no auno dadas na barbarahit,
iesen ga so nurnuruan ta ira uno tamat na kinewa
ma ga hatamat no uno kinkinis na watong ing git halhaliare ira mes!”
8 Iesen, iau hoing tiga ina olip i kubur nunuhuan ram tano hala ta God.
Iau so hatikane tar no nugu nurnuruan tano tutun na harmarsai ta God nong pai la patpataam.
9 Iau ni pirlat ugu hathatika ta ira linge u gil tagu.
Iau ni nanaho ma ra nurnuruan tano hinsaam kanong i bilai no hinsaam.
Iau ni pirlat no hinsaam ra matmataan ta diet ing diet te tar tutun ira udiet nilon taam.