28
Devit ga pit iakan ra ninge.
1 Iau tataau uram ho ugu, Watong, no nugu Haatkis.
Waak bia u talingaro taar tagu,
kanong ing bia nu kis kunkun,
iau ni ngan hoing diet ing diet ga hansur ures tano lulur na minaat.
2 Hadade no nugu sunuah na sinasaring wara gaiena harmarsai
ing iau tataau tupas ugu wara harharahut,
ing mah iau tatik ira limagu uram
hono num halhaliana subaan harsakit.
3 Waak bia nu sal se iau tika ma ira ut na sakena,
diet ing diet gilgil magingin na haragahai,
ing mah diet la iangianga ma ra bilai na bala taar ta ira hinsaka diet,
iesen a sakena kenam narako ta ira kaati diet.
4 Balu pukus diet ta ira udiet mangana magingin
ma ta ira udiet sakana pinapalim.
Balu pukus diet ta ira linge ira lima diet gate pakile,
ma nu tar pukus tar ta diet asa ing i haruat ma ira udiet tintalen.
5 Diet pai nes kilam ira pinapalim tano Watong
ma asa ing ira limana i te gil.
Io kaik, aie na dure hasur diet
ma pa na hatur haut pukus habaling diet.
6 A pirharlat uram tano Watong,
kanong i te hadade ira nugu tintaau wara gaiena harmarsai.
7 No Watong, aie no nugu dadas ma no nugu bahbahit.
No kaatigu i nurnur narako tana, ma iau te kap harharahut.
No kaatigu i karuas ma ra gungunuama
ma iau ni tanga tahut tana ma ra ninge.
8 No Watong aie no dadas audiet ira uno matanaiabar,
ma no dadas na subaan na munmun waing nong no Watong ga gilamis ie na kap no harhalon kaia.
9 Halon ira num matanaiabar ma nu haidane diet ing diet ira pinlawem ta ira matanaiabar bakut.
Nu hanuat hoing ra ut na balaura sipsip ma nu kap hani diet hathatika.