27
Devit ga pit iakan ra ninge.
1 No Watong aie no nugu lulungo ma no nugu harhalon.
Iau ni burte sige?
No Watong aie no nugu dadas na sibaan na barbarahit.
Iau ni ramramin um ta sige?
2 Bia ing ira sakana tunotuno diet haan tultul iau wara hagahe no palatamaigu,
ma bia ing ira nugu ebar ma ira agu suk diet harubu ma iau,
diet na laleka ma diet na puko.
3 Ing mah bia tiga matana ubane na hanuat luhutane iau,
no kaatigu pa na burut.
Ing mah bia a tamat na hinarubu na tahuat tupas iau,
iau ni balaraan taar at.
4 Tiga linge iau saring tano Watong.
Iakan nong iau silsilihei, ma i hoken:
bia iau ni lon narako tano hala tano Watong
ta ira bungbung bakut tano nugu nilon,
wara matmate no minamar tano Watong
ma wara lilik murmur ie narako tano uno hala na lotu,
5 kanong tano bung na saksakena
aie na balaure timaan iau narako tano ngasiana,
aie na suhe iau ma iau ni barahit narako tano uno hala na lotu,
ma na hakisi iau aram naliu saakit tiga haatkis.
6 Io, da nes haut iau
naliu ta ira ebar ing diet tur luhutane iau.
Iau ni tun hartabar ma ra kunup na gungunuama kaia tano uno hala na lotu.
Iau ni inge na pirharlat tupas no Watong.
7 Watong, hadade no ingagu ing iau tataau.
Nu marse iau ma nu taram iau.
8 No kaatigu i tange utaam, “Silihe no uno matmataan!”
Watong, iau ni silihe no num matmataan.
9 Waak u suhe no num matmataan tagu.
Waak bia nu tule se no num tultulai ma ra ngalngaluan.
U te harahut haitne iau.
Waak u malentakuane iau ma bia nu waak kapis iau,
God, nugu Ut na Harhalon.
10 Ing mah bia no agu sus ma no pawasigu dir waak kapis iau,
no Watong na palim leh iau.
11 Watong, hausur iau ta ira num tintalen.
Lue iau narako tiga takodas na ngaas,
kanong warah, burena ta diet ing diet wara hagahe iau.
12 Waak u tar iau ta ira lima diet ira nugu ebar bia diet na gil tagu haruat ma ira udiet sinisip,
kanong ira ut na harabota diet tur huat ma diet tung bia iau,
diet mang iau.
13 Iau nurnur taar at ta iakan,
bia iau ni nes no bilbilai tano Watong
ing at iau lon taar ta iakan ra pise.
14 Kis kawase no Watong.
Nu dadas ma nu balaraan taar.
Masa, nu kis kawase no Watong.