103
Devit ga pit iakan ra ninge.
1 I tahut bia iau ni pirlat no Watong ma no nugu kidilona nilon.
Ma i bilai bia iau ni pirlat no halhaliana hinsana ma no balagu bakut mah.
2 I tahut bia iau ni pirlat no Watong ma no nugu kidilona nilon,
ma iau ni lik kawase ira uno haraidaan bakut.
3 Aie nong i la liklik luban se ira num magingin sakena bakut
ma i la halangalanga ugu ta ira num minaset bakut.
4 Aie nong i kul pukus leh no num lon bia kabu haan taar tano minaat
ma i haidane ugu ma no uno harmarsai ma i manga kalak ugu.
5 Aie nong i banot ira num masmasingan ma ira bilai na linge,
kaik nugu hanuat baling hoing tiga marawaan ma nugu dadas hoing tiga malaba.
6 No Watong auno no dadas wara bul ira takodasiana harkurai
wara harharahut ira tunotuno ing di ubal diet.
7 Ga hapuasne tar ira uno tintalen taar ta Moses,
ma ira uno gingilaan taar ta ira matanaiabar me Israel.
8 No Watong i tar bia mon no uno harmarsai,
i matien wara ngalngaluan, ma i hung ma tiga mangana harmarsai nong pana le pataam.
9 Pai tale bia na hartutung hait,
ma pai tale bia na lik hatikane tar no uno ngalngaluan.
10 Pai la hapidanau het haruat ma ira nuhet magingin sakena
ma pai balu pukus het haruat ma ira numehet sakana tintalen.
11 Kanong warah, hoing no mawe i naliu saakit tano pise,
no uno harmarsai i manga tamat mah taar ta diet ing diet ru ie.
12 Hoing i tapaka merau hono kasakes i la tutut hut mekaia ukai hono kasakes i la sungsuguh kaia,
io huo, i kap ise ira nudahat magingin sakena tapaka saakit talur dahat.
13 Hoing tiga tata i la marmarse ira natine,
huo mah no Watong i la marmarse diet ing diet ru ie,
14 kanong i nunure tar ing dahat ga tahuat huo,
ma i lik leh bia a kaabus mon dahat.
15 Ma dahat ira tunotuno, ira udahat bung na nilon i haruat ma ra huro.
Dahat kubur nunuhuan hoing tiga purpur.
16 Iesen no dadaip i puuh isei,
ma no katon nong ga kubur kaia pai nes habalin um ie.
17 Iesen no harmarsai tano Watong tupas diet ing diet ru ie i kis hathatikai,
ma ira uno takodasiana magingin i kis hatika taar ta ira udiet bulumur.
18 I kis hatika taar ta diet ing diet mur no uno kunubus,
diet at ing diet lik kawase tar ira uno hartula ma diet gil haruatne.
19 No Watong i te hakisi no uno kinkinis na king aram ra mawe,
ma no ula hanuo bakut i kis menapu tano uno harkurai.
20 Muat ira uno angelo, i tahut bia muat na pirlat no Watong,
muat at ira ut na baso ing muat gil haruatne ira uno nianga
ma muat la murmur asa ing i tange.
21 Muat bakut ira uno umri kenam ra mawe, muat na pirlat no Watong,
muat at ira uno tultulai ing muat la gilgil haruatne ira uno sinisip.
22 I bilai bia ira uno pakpakilai bakut
ta ira kaba katon bakut tano uno harbalaurai, diet na pirlat no Watong.
I tahut bia iau ni pirlat no Watong ma no nugu kidilona nilon.