102
Tiga sinasaring ta tiga tunotuno a tinirih i ubal ie. I maalum ira tamaine ma i suah uram tano Watong uta ira uno purpuruan.
1 Watong, taram ira nugu sinasaring.
Haut leh no nugu sunuah wara gaena harharahut bia na haan tupas ugu.
2 Waak u suhsuhe no matmataan taam tagu
tano pakana bung bia iau kis taar ra tinirih.
Sa talingaam ukai ho iau.
Tano pakana bung iau tataau, taram hagasiaan iau.
3 Ira bungugu i patpataam bia hoing ra mis.
Ira surugu i iaiaan hoing ira lakit na iaah.
4 Di te papasuane no nugu lon ma i te mahiawa hoing ra huro.
Iau luban um bia ni ien ira agu nian.
5 Iau kinkin ma no tinirih ma iau suah.
Iau te sur sen um.
6 Iau ngan hoing tiga kurkur ma ra hanuo bia,
hoing tiga kurkur aram ra mahol na taman.
7 Iau noh taar ma iau pai kubaba.
Iau te ngan hoing tiga maan aie sen i kis taar naliu tiga ula hala.
8 Tano kidilona bung bakut, ira nugu ebar diet mang iau.
Diet ing diet kukutur tagu, diet kilam no hinsagu wara timtibe haliare ira mes.
9 Iau ien tahuna iaah hoing ra agu nian,
ma iau mame ira agu taah tika ma ra luur na matagu,
10 kanong tano num tamat na ngalngaluan.
Hokaiken um, u te kap haut iau ma u te gulumane se iau.
11 Ira bungugu i panim gasien hoing ira ududuh na melsur.
Iau mahiawa hanahaan hoing ira huro.
12 Iesen augu, Watong, no num kinkinis na harkurai pana le pataam.
Ira bulumur ing diet na lon namur, diet na lik kawase tar no hinhinawas utaam.
13 Nu tut hut ma nu marse no pise na hala Saion,
kanong a pakana bung wara hamines no balaam tana.
No bung u ga pilak hanalue tar i te hanuat.
14 Kanong warah, ira num tultulai diet manga kalak ira haat ta ira uno balo.
Ma ira kut na haat ta ira balo i tamadure taar, i hatatik ira bala diet bia na marmaris.
15 Ira kantri diet na urur tano hinsana no Watong,
ma ira tamat na ut na gil harkurai bakut diet na ru no minamarim,
16 kanong no Watong na hatut habaling ira balo ta Saion
ma na harapuasa ma ira minamarine.
17 Na taram ira maris,
ma pa na malok se ira udiet sinasaring.
18 I tahut bia da pakat kaiken ra nianga ta ira bulumur ing pa di kaha baak diet,
bia diet ing diet pai tahuat baak diet na pirlat no Watong.
19 Da hinawase diet bia no Watong ga nanaas suur meram tano uno halhaliana katon.
Meram ra mawe ga nes bakut tar no ula hanuo,
20 wara hadade ira kunup na ngunngutaan ta diet ing diet ga kis taar ra hala na harpidanau,
ma wara palpalas ise diet ing di ga tibe bingbing tar diet wara minaat.
21 Io, da hinawas palai tano hinsana no Watong ram Saion
ma da pirlat ie aram Ierusalem
22 ing ira matanaiabar ma ira kingdom
diet na kis hurlungai wara lotu tupas no Watong.
23 Ing a sigar tunotuno baak iau, no Watong i hapataam no nugu dadas.
I puo hakumkum no nugu nilon.
24 Io huo, iau tange bia, “Nugu God, waak baak u kutus kotne no nugu nilon.
U lon hathatika.
25 Mekaia tano hamhaburen u ga hakisi no ula hanuo,
ma u ga gil no mawe ma ira limaam tus.
26 No mawe ma no ula hanuo dir na panim iesen u kis taar at.
Dir na tutuarain ho ira maal.
Nu kios dir hoing da kios ise ira lawalawa,
ma da se dir.
27 Ma sen bia augu, pau la kikios
ma no num nilon pa na pataam.
28 Ira nati mehet ira num tultulai diet na lon ra matmataan taam,
ma ira nudiet bulumur diet na barahit taam.