19
1 Pilatus nangrihi munuk verin tamata Yahudi ra, beti nsinir ni suldadu ra ma rasveva Yesus.
2 Suldadu avyai ranan aa anan ovi imarira ra ma naꞌa sabeꞌu ma rfadoku naꞌa Yesus ulun a. Ira rala ravit blawat ungu isa ma raꞌadoru naꞌa Ia,
3 beti rsikati ira ti rfaseri Yesus ma rfalak ne, “Yahudi rira raja verin Oa, ba fara nam a blawat!” Nata, rtafitil wahan a.
4 Pilatus nti murin ewal ma nfalak verin tamata rivun avyai ne, “Eka msyiꞌik, yaꞌa ovun roak Ia nma verin mia, boma mkyaꞌa ne, wol utuan sala akataka naꞌa Ia.”
5 Ba rovun Yesus nti murin. Ia naklulu roak sabeꞌu iman yai, ovu noru roak ravit blawat ungu yai. Pilatus nfalak verin ira ne, “Eka msyiꞌik tamata ini!”
6 Ti ma Yahudi rira dawan mela falurut ra ovu tamata ovi rwanar Yahudi rira Rahan Dawan Falurut a rsiꞌik Yesus, na rafwak ma rfalak ne, “Bwaku Ia naꞌa aa walwalur! Bwaku Ia naꞌa aa walwalur!”
Pilatus nfalak verin ira ne, “Mia kaꞌi myala Ia ma byaku Ia naꞌa aa walwalur, tevek yaꞌa wol utuan lahir sala akataka naꞌa Ia.”
7 Tamata Yahudi avyai rfalak verin Pilatus ne, “Ami mami inukun vali, ovu naꞌa mami inukun a nfadoku ne, Ia musti nmata, tevek nfalak ne, Ubu Yanan Ia.”
8 Naꞌut i Pilatus nrenar i rfalak wean inyai, na ia ntafal ma nbobar.
9 Ba Pilatus newal ia nti ni rahan fareta dawan ralan a. Ti ma rovun roak Yesus nti rahan yai ralan, na norat Yesus ne, “Oa mtali ahu inba?” Naꞌuk Yesus wol nvalat ia.
10 Pilatus norat ewal Ia ne, “Oa mufena ma mungrihi nulu yaꞌa? Oa wol mkaꞌa ne, ning ngrebat ma ufatalik Oa, ovu ning ngrebat ma ufalak ma rbaku Oa naꞌa aa walwalur?”
11 Yesus nfalak ne, “Wean i Ubu wol nala ngrebat yai verin oa, na oa wol mu ngrebat akataka ma fwareta Yaꞌa. Ba tamata i nala Yaꞌa verin oa, ni salasilan a veran rahi mu salasilan.”
12 Naꞌut i Pilatus nrenar afa i Yesus nfalak yai, na ndava lingaꞌan mane nfatalik Ia. Naꞌuk tamata Yahudi avyai rafwak ewal ma rfalak ne, “Wean i fwatalik Ia, na oa veka wol motu kida roak ovu Kaisar. Tamata iki watan ntorung ne notu raja, na ia nangal roak Kaisar.”
13 Naꞌut i Pilatus nrenar i tamata Yahudi ra rfalak wean inyai, na nsinir ma rovun Yesus nti murin, na ia ndoku kadera i baꞌi ndoku ma nfaleka inukun verin tamata ra. Wan yai naran Lantai Vatu, naꞌa vai Ibrani rfanara ia ne Gabata.
14 Naꞌut inyai, na kaꞌa bi lera ndirlola. Amar yai, na tamata Yahudi ra rasusan warira ma ilyan, na rotu rira amar dawan Paskah. Pilatus nfalak verin tamata avyai ne, “Ini bira raja a!”
15 Tamata avyai rafwak ma rfalak ne, “Fwedan Ia! Fwedan Ia! Bwaku Ia naꞌa aa walwalur!”
Pilatus norat ira ne, “Yaꞌa musti utorung ma rbaku bira raja a naꞌa aa walwalur?”
Yahudi rira dawan mela falurut ra rfalak ne, “Ami wol mami raja. Kaisar aꞌuk saꞌi notu raja verin ami!”
16a Ba Pilatus nala Yesus verin ira, ma ti rbaku Ia naꞌa aa walwalur.
Roma rira suldadu ra rbaku Yesus naꞌa aa walwalur
Matius 27:32-44; Markus 15:21-32; Lukas 23:26-43
16b Ba rala Yesus ma rovun Ia rti.
17 Yesus kaꞌi nvara Ni aa walwalur a, ma nti wan i naran Kalkulun Wan. Naꞌa vai Ibrani rfanara ia ne, Golgota.
18 Naꞌa wan yai, na rbaku Ia naꞌa aa walwalur. Ira rbaku vali tamata irua ovu Ia, ma isa naꞌa Ni lihir mela, na isa naꞌa Ni lihir balit, na Yesus naꞌa fruarira ra.
19 Pilatus nsinir ira ma rtulis naꞌa kba etal isa, beti rbaku kba etal yai naꞌa aa walwalur ni tutul a. Vaivatul avyai ngoarira ne, “Yesus ntali Nasaret, Yahudi rira Raja verin Ia.”
20 Tamata Yahudi rivun rbas roak vaivatul avyai, tevek wan i rbaku Yesus naꞌa aa walwalur yai nfaseri kota. Vaivatul avyai rtulis naꞌa vai Ibrani, vai Latin ovu vai Yunani.
21 Yahudi rira dawan mela falurut ra rfalak verin Pilatus ne, “Deka mtulis ne, ‘Yahudi rira Raja verin Ia.’ Naꞌuk mtulis ne, ‘Ia nfalak ne Yahudi rira Raja verin Yaꞌa.’ ”
22 Naꞌuk Pilatus nfalak ne, “Afa i ufalak ma rtulis roak yai, wol bisma rkati.”
23 Ti ma suldadu avyai rbaku roak Yesus naꞌa aa walwalur, beti rala Ni kadaravit ra ma rsiduk naꞌut ifaꞌat, ma sasan lokat ira. Ira rala vali Ni ravit blawat. Ravit blawat yai wol roar ia, naꞌuk redu falolang watan ia ma naꞌa near isa.
24 Ba suldadu avyai rsifalak afa verin ira ne, “Deka tkamsat ravit blawat yai, naꞌuk totu undi ma tkaꞌa ne, iki veka nia ravit blawat yai.” Wean inyai, boma nfakena afa ovi rtulis roak naꞌa Surat Ralan ne,
“Ira rsiduk Ning kadaravit ra lokat ira,
ovu rotu undi naꞌa Ning ravit blawat a.”
Ba suldadu avyai rotu wean inyai.
25 Yesus renan a, ovu Yesus renan warin a, ovu Maria i awan verin Klopas, ovu Maria Magdalena rdir-ebang aa walwalur i rbaku Yesus naꞌa.
26 Naꞌut i Yesus nsiꞌik Ni tamata i norang Ia ovu nlobang urun ia ndiri inyai ovu renan a, na nfalak verin renan a ne, “Mama, inyai yanam a!”
27 Nata Yesus nfalak verin Ni tamata i norang Ia yai ne, “Inyai renam a!” Tali amar yai, na Ni tamata yai ntorung ma nala Yesus renan a ma nanaꞌa ni rahan a.
Yesus nmata
Matius 27:45-56; Markus 15:33-41; Lukas 23:44-49
28 Yesus nkaꞌa ne, fiang ini Ia notu munuk roak karya ovi Ubu nala verin Ia. Ba nfalak ne, “Yaꞌa ubroa.” Nfalak wean inyai ma nfakena afa ovi rtulis roak naꞌa Surat Ralan.
29 Naꞌa wan yai, na moko isa nngora ovu anggur i nakbia a. Ba rala spons etal isa ma rsovu naꞌa anggur yai, ma rngatan teri spons yai naꞌa aa etal isa ni tutul a, ma rlauk rata nkena Yesus sumarn a.
30 Ti ma Yesus nbuk roak anggur yai, na nfalak ne, “Roak rok.” Ba nsoak wahan a, na nan a nakbosal.
Roma rira suldadu ra rsungu Yesus nelan a
31 Naꞌut inyai, na tamata Yahudi ra rasusan warira ma ilyan, na ryari ira. Ira rira adat notu teri ma tamata ovi rbaku roak ira naꞌa aa walwalur, wol bisma rakloꞌi watan naꞌa amar i ryari ira. Nlia tali inyai, na amar i ryari ira yai neluk amar dawan verin ira. Ba dawan Yahudi ra rera verin Pilatus ma nsinir suldadu ra ma rkametal tamata ovi rbaku ira yai earira ra, ma rfasuka ira tali aa walwalur ra.
32 Nata suldadu avyai rti ma rkametal lan tamata irua i rbaku ira ovu Yesus, earira ra.
33 Naꞌuk ti ma rfaseri Yesus, ma rsiꞌik na nmata roak, ba wol rkametal ean a.
34 Naꞌuk suldadu isa nsungu Yesus nelan ovu vunut, ma laran a ovu wear nvoat lahir.
35 Tamata i nsiꞌik afa yai kaꞌi nfamalik afa i nsiꞌik yai. Ia nkaꞌa ne, afa ovi nfalak ra kena ma nfamalik afa avyai, boma myorang vali.
36 Suldadu avyai wol rkametal Yesus ean a, boma nfakena afa ovi rtulis roak naꞌa Surat Ralan ne, “Tali lurin ra, na wol isa vali nametal.”
37 Rtulis vali roak naꞌa Surat Ralan wean ini, “Tamata ra veka rsiꞌik Ia naꞌut i rsungu roak Ia.”
Yusuf i ntali ahu Arimatea nala Yesus tenan ma nfanuba Ia naꞌa van matmatan isa ralan a
Matius 27:57-61; Markus 15:42-47; Lukas 23:50-56
38 Afa avyai roak munuk roak, beti tamata isa naran Yusuf ntali ahu Arimatea nti ma ntuan Pilatus ma nera verin ia ma nala Yesus tenan a. Yusuf norang vali Yesus, naꞌuk norang fanfonak Ia, tevek nbobar dawan Yahudi ra. Pilatus ntorung afa i Yusuf nfalak a, ba Yusuf nti ma nfasuka Yesus tenan a.
39 Nikodemus i lan a ti ntuan roak Yesus naꞌut ovan a, novu vali Yusuf. Ia ntaha ngul ovi voarira lolin urun a nararira mur ovu gaharu. Rsileti roak ngul avyai, ma kaꞌa bi kil vututelu.
40 Ira rala Yesus tenan a ma rkuma Ia ovu maloli ngangiar, ovu raslofi ngul ovi voarira lolin avyai ma rot-orang Yahudi rira adat a verin tamata matmatan ra.
41 Naꞌa wan i rbaku Yesus naꞌa aa walwalur, na vaꞌi isa nfaseri inyai. Naꞌa vaꞌi yai, na van matmatan isa nanaꞌa. Van yai ngorvaꞌan obin, tevek wol rfanuba matmatan ra naꞌa obin.
42 Naꞌut inyai, na tamata Yahudi ra rasusan warira ma rsaꞌa amar i mane ryari ira. Ba Yusuf irua Nikodemus rti ma rfanuba Yesus tenan a naꞌa van yai ralan a, tevek nfaseri inyai.