18
Yahudi ra rtaha Yesus
Matius 26:47-56; Markus 14:43-50; Lukas 22:47-53
1 Ti ma Yesus naflurut munuk wean inyai, na irmunuk Ni tamata ovi rorang Ia rti oar Kidron ni lihir a. Vaꞌi zaitun isa nanaꞌa inyai, ba Yesus ovu Ni tamata ra rti vaꞌi yai ralan a.
2 Yudas i nfedi Yesus nkaꞌa vali vaꞌi yai, tevek Yesus baꞌi nasdovu Ia ovu Ni tamata ovi rorang Ia naꞌa inyai.
3 Ba Yudas nti wan yai. Ia novun Roma rira sidovung suldadu isa, ovu tamata ovi rwanar Yahudi rira Rahan Dawan Falurut a rti vali wan yai, ovu rtaha damar, faduk ovu rira mneran ra. Tamata Yahudi rira dawan mela falurut ra ovu tamata Yahudi ovi rtali sidovung Farisi rsinir ira ma rti.
4 Yesus nkaꞌa lahir afa ovi veka rkena Ia, ba ti nfaseri tamata avyai ma nfalak verin ira ne, “Mia mdyava iki?”
5 Ira rfalak ne, “Yesus i ntali Nazaret a.”
Ia nfalak verin ira ne, “Yaꞌa ini tamata i mdyava a.” Naꞌut inyai, na Yudas i nfedi Yesus ndiri vali ovu ira naꞌa inyai.
6 Naꞌut i Yesus nfalak verin ira ne, “Yaꞌa ini tamata i mdyava a,” na tamata avyai munuk rsuka ira ma rleka fatvelar ira rsuta lanun.
7 Ba Yesus norat ewal ira ne, “Mia mdyava iki?”
Ira rfalak ne, “Amdava Yesus i ntali Nazaret.”
8 Yesus nfalak ne, “Ufalak roak verin mia ne, Yaꞌa ini tamata i mdyava a. Ba wean i mdyava urun Yaꞌa, na msyiꞌik watan Ning tamata ra ma rti.”
9 Yesus nfalak wean inyai, boma nfakena afa ovi nfalak roak ne, “Tamata ovi mala roak ira verin Yaꞌa, na wol isa tali ira nmamu.”
10 Simon Petrus ntaha nahin blawat isa, ba ntavar nahin blawat yai ma nafat vatuk Mela Falurut Ilaꞌa ni tamata sansinir isa arun mela a. Sansinir yai naran Malkhus.
11 Ba Yesus nfalak verin Petrus ne, “Maꞌadoru ewal mu nahin blawat yai naꞌa ni tlanan a. Oa beta fwikir ne, wol utorung ma utuan susa i Yamang nfadoku roak ma musti utuan a?”
Yesus ndiri Hanas wahan ralan a
Matius 26:57-75; Markus 14:53-72; Lukas 22:54-71
12 Roma rira suldadu ra ovu rira dawan a, ovu vali tamata ovi rwanar Yahudi rira Rahan Dawan Falurut a, rtaha Yesus ma rkeak Ia.
13 Nata rovun Ia rti lan Kayafas memin i Hanas a. Taꞌun yai Kayafas neluk Yahudi rira Mela Falurut Ilaꞌa.
14 Kayafas nsurak lan roak dawan Yahudi ra ne, “Ni lolin a, tamata isa nmata verin tamata rivun.”
15 Simon Petrus ovu tamata isa vali tali Yesus Ni tamata ovi rorang Ia, rban-orang Yesus. Yahudi rira Mela Falurut Ilaꞌa nkaꞌa roak Yesus Ni tamata isa yai. Ba ia bisma norang Yesus ma nti Mela Falurut Ilaꞌa yai ni rahan ni lean a,
16 naꞌuk Petrus nanaban watan naꞌa balbelat ni falfolat murin a. Yesus Ni tamata yai newal ia nti murin ma nangrihi ovu vata i nwanar falfolat a, ma novun Petrus nti ralan.
17 Ba vata yai nfalak verin Petrus ne, “Betane oa morang vali tamata yai?”
Petrus nfalak ne, “Wahal!”
18 Naꞌut inyai na radridin urun, ba Mela Falurut Ilaꞌa ni tamata sansinir ra ovu tamata ovi baꞌi rwanar Yahudi rira Rahan Dawan Falurut a, rsidovuk yafu ma rdiri rafraran. Petrus nti vali ma irmunuk rafraran naꞌa inyai.
19 Mela Falurut Ilaꞌa yai norat Yesus naꞌa Ni tamata ovi rorang Ia ovu Ni afa ovi nair ra.
20 Yesus nfalak ne, “Yaꞌa baꞌi udiri tamata rivun waharira ralan ra ma ungrihi. Yaꞌa usiair lalawatan naꞌa rahan falurut ovu Rahan Dawan Falurut i tamata Yahudi ra munuk baꞌi rasdovu ira naꞌa. Yaꞌa wol mane ungrihi fanfonak watan.
21 Afakinimi morat Yaꞌa? Morat watan tamata ovi rarenar roak afa ovi air ra. Ira rkaꞌa urun afa ovi ufalak roak a.”
22 Naꞌut i Yesus nfalak wean inyai, na tamata isa tali tamata ovi baꞌi rwanar Yahudi rira Rahan Dawan Falurut a, ntafitil Yesus ma nfalak ne, “Mubrahi urun ma mungrihi wean inyai verin Mela Falurut Ilaꞌa!”
23 Ba Yesus nfalak ne, “Wean i afa i ufalak yai sala, na eka fwalak Ning sala a, naꞌuk wean i afa i ufalak yai kena, na afakinimi mtafitil Yaꞌa?”
24 Nata Hanas nsinir ma rovun Yesus nti verin Kayafas i neluk Mela Falurut Ilaꞌa yai. Yesus liman a natkeak obin.
25 Simon Petrus nafraran obin, ba tamata ovi rnaꞌa inyai rfalak verin ia ne, “Betane oa morang vali Ia?”
26 Simon Petrus nalak ia ma nfalak ne, “Wahal.”
Ba Mela Falurut Ilaꞌa ni tamata sansinir i lan a Petrus nafat vatuk arun a, ni tiniman isa nfalak ne, “Inlangin a, urea roak oa mimunuk Yesus mnyaꞌa vaꞌi yai.”
27 Petrus nalak ewal ia ma nfalak ne, “Wahal.” Naꞌut inyai, na manut isa nkukuwai lahir.
Dawan Yahudi ra rovun Yesus nti verin Gubernur Pilatus
Matius 27:1-2,11-14; Markus 15:1-5; Lukas 23:1-5
28 Varverak sumatan obin, na dawan Yahudi ra rovun roak Yesus tali Kayafas ni rahan a rti Gubernur ni rahan a. Naꞌuk dawan Yahudi avyai wol rti Gubernur ni rahan ralan a, tevek wol mane rfangra tenarira ra, wean rira adat nfalak a. Rotu wean inyai, tevek ira mane rovu ma rafnaꞌan naꞌa rira amar dawan Paskah.
29 Ba Gubernur Pilatus nti murin ma norat ira ne, “Mia myangadu tamata ini, tevek Ni sala aka?”
30 Ira rfalak ne, “Wean i wol Ni sala, na wol amovun Ia nma verin oa!”
31 Pilatus nfalak verin ira ne, “Myala Ia miti ma kaꞌi fyaleka inukun verin Ia, ma inovan ovu bira inukun a.”
Naꞌuk tamata Yahudi avyai rfalak ne, “Ami wol mami ngrebat ma amfaleka inukun matmatan verin tamata.”
32 Afa yai nvotuk, boma nfakena afa ovi Yesus nfalak roak naꞌa Ni matmatan a.
33 Pilatus newal ia nti ni rahan ralan a, nata nera Yesus ma norat Ia ne, “Yahudi rira raja verin Oa?”
34 Yesus nfalak ne, “Morat Yaꞌa wean inyai, na ntali ralam a, te tamata liak boku rfamalik roak Yaꞌa verin oa?”
35 Pilatus nfalak ne, “Oa fwikir ne, yaꞌa ini tamata Yahudi yaꞌa? Tamata ovi rovun Oa mwa verin yaꞌa ini, inyai Mu tamata Yahudi ra, ovu Mu dawan mela falurut ra. Motu sala aka ma rovun Oa mwa ini?”
36 Yesus nfalak ne, “Ning fareta wol ntali lanit ivavan a. Wean i Ning fareta ntali lanit ivavan a, na Ning tamata ra veka rotu ma vangoa-vanga, boma deka rala Yaꞌa verin tamata Yahudi ra. Naꞌuk Ning fareta a wol ntali lanit ivavan a.”
37 Ba Pilatus nfalak verin Ia ne, “Oa ini raja Oa?”
Yesus nfalak ne, “Oa kaꞌi fwalak ne, Yaꞌa ini raja Yaꞌa. Rarali Yaꞌa naꞌa lanit ivavan ini, boma ufamalik afa ovi kena ra. Tamata iki watan ndava lalawatan afa ovi kena ra, na ia nrenar roak afa ovi ufalak ra.”
38a Pilatus norat Ia ne, “Afa ovi kena ra, ihin aka?”
Pilatus nala Yesus verin Roma rira suldadu ra ma rbaku Ia naꞌa aa walwalur
Matius 27:15-31; Markus 15:6-20; Lukas 23:13-25
38b Pilatus nfalak munuk wean inyai, na nti murin ewal ma nfalak verin tamata Yahudi ra ne, “Yaꞌa wol utuan sala akataka naꞌa Ia.
39 Naꞌuk mia baꞌi myera verin yaꞌa, ma lokat varat naꞌut amar dawan Paskah, na ufatalik tamata isa tali buꞌi ralan. Ba mtyorung ma ufatalik Yahudi rira raja ini verin mia?”
40 Ira rafwak ma rfalak ne, “Deka fwatalik Ia, naꞌuk fwatalik Barabas!” Barabas yai nwi-nwa tamata ra ma nbori rira metan ra.