22
1 Umundu, ikyanya ali mu shaagwa mu baabo, kwo kukulu, ho angalonga ubugale bwingi.
Yulwo lushaagwa, luli naꞌkamaro ukuhima iharija neꞌnooro.
2 Abagale naꞌbakeni, bo baguma,
bwo Nahano ye kababumba booshi.
3 Umwitegeereza ali mu gwanwa abona amakayu, anagayiyeke.
Si ikizeeze kyohe, kiri mu yigendera naaho, kinagendi yifunda mu nguuke.
4 Ikyanya umundu ali mutuudu, anabe asimbahiri Nahano,
biri mu múleetera ubugale, noꞌlushaagwa, noꞌbulamu.
5 Mu njira za banangora-mabi, muli imigenge neꞌmitego.
Ngiisi úloziizi ukuyilanga, akwaniini akizi biyiyeka.
6 Ikyanya umwana akiri mwanuke, ukizi múyereka ngiisi kwo angatuula ku njira nyiija.
Iyo njira, kiri neꞌkyanya angaba akola mushaaja, atagagijanda.
7 Umugale ali mu twala umukeni.
Na úli mu mwenda gwoꞌwabo, ali mu ba muja wage.
8 Ngiisi úli mu byala amabi, ali mu yimbula amalibu.
Na kundu âli kizi twala ku bulangi, bugaahera.
9 Ikyanya umundu ali mu haana, yenyene ali mu kizi gashaanirwa.
Mukuba, ali mu kizi shangiira ibyokulya byage naꞌbakeni.
10 Ikyanya uli mu yimula akagayirizo, kiri neꞌmilongwe igaamala.
Kiri noꞌkuhambanwa, neꞌbitusi, nabyo bigaahera.
11 Ngiisi úli mu yeruusa imitono yage, anabe ali mu kizi deta ku shagayo,
uyo, agaaba mwira wa mwami.
12 Umundu úsobanukiirwi, amasu ga Nahano gali mu kizi múlanga.
Si ishungi zaꞌbalyalya, zoohe, ali mu zihongola.
13 Umwolo ali mu deta, ti: «Ha mbuga hali indare.
Iri nangakoli huluka, iganyitira mu njira!»
14 Amagambo goꞌmukazi mushule, kiri kirimbi-rimbi kila bweneene.
Ngiisi ye Nahano arakariiri, agakitibukira mwo.
15 Umutima gwoꞌmwana guyamiri guli mwoꞌbuhwija.
Si iri wangamúhana, yubwo buhwija bugaamala.
16 Ngiisi úli mu tindimaza umukeni, mbu lyo agala,
na úli mu tuula abagale, bombi, bagahambiri kena.
Amagambo ágali mwoꞌbwitegeereze
17 Ikyanya abitegeereza bali mu deta, ukizi batega amatwiri! Na ngiisi go ngweti ngakuyigiriza, ukizi gakania.
18 Iri wangabisingula mu mutima gwawe, unabe uli ibiringiini ukubideta, lyo bigasimiisa abandi.
19 Zeene buno, we ndoziizi ukuyigiriza, gira Nahano abe ye ugakizi biika kwoꞌmulangaaliro.
20 Lolaga! Nakuyandikira imigani makumi gashatu. Iyo migani, iri ya kukuhanuula, noꞌkukuheereza ubumenyi.
21 Inakizi kuyigiriza amagambo goꞌkuli, ágangakizi yemeerwa. Kwokwo, ngiisi úgakizi kubuuza ikibuuzo, ugakizi longa ukumúshuvya bwija.
22 Utakizi lyalyania umukeni, mbu bwo atahiiti ubushobozi. Neꞌkyanya ugakizi twa ulubaaja lwaꞌbakeni, utakizi bafina-fina kwo.
23 Mukuba, Nahano yenyene ye gababulanira. Na ngiisi ábagweti bagabanyaga ibindu, nabo agabanyaga byo.
24 Utakomeerane noꞌmundu woꞌkukizi yami raakara. Utanakizi gendanwa noꞌmundu úli mu yagalwa duba.
25 Si hali ikyanya ugamúyigira kwoꞌmugani! Noꞌbuzinda, unakengeere walonga ubuhanya.
26 Ikyanya umundu ayingira mu mwenda gwoꞌwabo, utakizi yigira shinga wagwo.
27 Mukuba, iri wangabula hyoꞌkuguyishula, bangakengeera bakunyaga kiri neꞌngingo yawe.
28 Ibuye lyo bashokuluza bakabiika mu kuyerekana ulubibi lwiꞌtongo, hatagire úgalityeza.
29 Ka hali umundu úli noꞌbulenga mu mukolwa gwage? Uyo mundu, agakizi kolera abaami. Si atagakizi kolera abagunda naaho.