21
1 Umutima gwa mwami, guli mu maboko ga Nahano.
Ali mu kizi gurongoora nga lwiji, ngiisi ho aloziizi.
2 Ngiisi byoꞌmundu ali mu kola, ali mu bona kwo bikwaniini.
Si Nahano, ye mu gera íbiri mu mutima gwage.
3 Ikyanya abandu bali mu gira íbikwaniini, neꞌbyoꞌkuli,
bali mu simiisa Nahano, ukuhima ikyanya bali mu tanga ituulo.
4 Amasu goꞌbwikangaate, noꞌmutima gwoꞌbwihemye,
neꞌmikolezi mibi, byoshi biri mu yerekana ibyaha.
5 Umundu woꞌmwete, ishungi zaage ziri mu múgaza.
Si ngiisi úli mu kola naꞌkahimwe-himwe, ali mu yingira mu bukeni.
6 Ngiisi úli mu longa ibindu mu kulyalyania, yibyo bindu, biri mu sira nga luuta,
binali mutego gwoꞌkumúfunda mu lufu.
7 Banangora-mabi, ubulangi bwabo buli mu basherebeza.
Mukuba batali mu looza ukugira íbikwaniini.
8 Umundu mubi, imikolezi yage iri mu yama ihengamiri.
Si imikolezi yoꞌmundu útungiini yohe, iri mu yama igolosiri.
9 Ho umundu angatuula mu nyumba noꞌmukazi weꞌmilongwe,
ukutuula ku kashongya keꞌnyumba, kwo kukulu!
10 Nangora-mabi ali mu yifwija ukukizi gira amabi.
Atali mu kejeerera kiri noꞌmutuulani wage.
11 Umundu woꞌkuhonyolezania, ikyanya ali mu hanwa, ibizeeze biri mu longa ubwitegeereze.
Umwitegeereza, ikyanya ali mu hanuulwa, ali mu longa ubumenyi.
12 Ku kasiisa, umundu úkwaniini ayiji-yiji íbiri mu koleka mu nyumba za banangora-mabi.
Noꞌbuzinda, yabo banangora-mabi banashereezibwe.
13 Ikyanya umundu atali mu tabaala umukeni,
naye, ikyanya agagoorwa, atagalonga ubutabaazi.
14 Ikyanya umundu araakara, analonge indengu ku bumbishwa, ali mu hooha.
Kiri neꞌbindu íbyatangwa ku bumbishwa, biri mu hoohya uburaakari.
15 Ikyanya abandu bakulikira íbikwaniini, abandu boꞌkuli bali mu kizi shambaala.
Si banangora-mabi, boohe, bali mu shenguka.
16 Ngiisi úgweti úgakulikira ubwitegeereze, anashubi buhabuka mwo,
ali mu yiji kengeera akola mu bafwiri.
17 Ngiisi úkuuziri naaho ukuyisimiisa, ubuzinda agaaba mukeni.
Na ngiisi úkuuziri ukuvwagarara áhali idivaayi naꞌmavuta goꞌmuhongolo mwija, atâye gale.
18 Banangora-mabi, bo bagaahanwa ahandu ha ábakwaniini.
Ee! Ábatali mu yemeerana, bo bagalibuzibwa, ahandu haꞌbandu boꞌkuli.
19 Buli bwija, umundu agendi tuula yenyene mwiꞌshamba,
ho angatuula noꞌmukazi woꞌkukizi longoola, noꞌkukizi shomborozania.
20 Umwitegeereza, mu nyumba yage muli musingule ibyokulya biija, kuguma naꞌmavuta.
Si umuhwija ali mu gendi shahuliisa byoshi byo ahiiti.
21 Ngiisi úloziizi ukugira íbikwaniini, noꞌkukundana,
agalonga ubugumaana, noꞌlushaagwa, anakizi genduukirwa.
22 Umwitegeereza ali mu gendi teera akaaya keꞌbihagange.
Na kundu babiisiri umulangaaliro ku kaaya kaabo kazitire, ali mu kahongola.
23 Ngiisi úli mu deta ku bwitonde,
ali mu ba ayiyeka amakayu.
24 Ngiisi úli mu yiheemya noꞌkuyidundulika, iziina lyage ye Kagayirizo.
Uyo Kagayirizo, ku ngiisi byo ali mu gira, ali mu kizi yihaya naaho.
25 Umwolo, amaboko gaage gali mu lahira ukukola.
Ali mu kizi yifwija ibindu bingi, anahambiri fwa.
26 Ee! Ali mu shiiba agweti agayifwija ibyeꞌngingwe.
Si abandu biija boohe, bali mu kizi haana ku mutima úgushenguusiri.
27 Banangora-mabi, ituulo lyabo liri kyagaza,
neꞌngingwe, ku kyanya liri mu tangwa neꞌshungi mbi!
28 Akamasi keꞌbibeesha, kagashereera.
Si ngiisi úli mu tanga ubumasi bwoꞌkuli, yehe, agahanguulwa kwo adete.
29 Nangora-mabi ali mu yigira nga mundu mwija.
Si umundu mwija yehe, ali mu kizi yitoneesa ku byo agaagira.
30 Buba bwitegeereze, kandi iri kusobanukirwa,
kandi iri shungi, byoshi, ndaabyo íbyangahimana na Nahano.
31 Kundu ifwarasi ziri mu biikwa mwiꞌzibo,
si ubuhimi buli mu lyoka imwa Nahano.