Ikitolo kya kabiri kyeꞌMiganuulo
15
(15.1–21.34)
Amagambo ga kabiri ga Herifaazi
1 Ha nyuma, Herifaazi weꞌTemaani anashuvya kwokuno:
2 «Umwitegeereza atangaravwanga kwoku, buzira kuyisaliza.
Si ugweti ugaadeta naaho amagambo goꞌbusha-busha!
3 Umwitegeereza yehe, atali mu deta-deta amagambo mwene yago.
Aahago! Yago magambo gali naꞌkamaro kaki?
4 Si utayobohiri Rurema!
Unagweti ugahangirira abandi, mbu nabo batamúkulikire.
5 «Ngiisi go ugweti ugaadeta, gali mu leetwa naꞌmabi gaawe.
Si uyamiri uli mu lyalyania!
6 Amagambo gaawe wenyene, go gali mu kutwira ulubaaja, si ndali niehe.
Íbiri mu lyoka mu kanwa kaawe, byo biri mu kulega.
7 «Aahago! Ka we katangi butwa, imbere lyaꞌbiinyu booshi? Nanga, maashi!
Ka we hiiti imyaka mingi ukuhima utugangazi?
8 Ka we wâli kizi hanuusania na Rurema?
Kandi iri, ka wehe naaho we mwitegeereza?
9 «Wehe, ndaabyo uyiji ukutuhima.
Kiri na byo usobanukiirwi kwo, bitasumbiri ibyeꞌmwitu.
10 Si ha kati kiitu, hali abashaaja, naꞌbitegeereza.
Banakoli hiiti imyaka mingi ukuhima yisho.
11 Kundu Rurema agweti agakuholeeza, si utamútwaziizi!
Kundu ali mu kuganuuza ku bwitonde, si utamúsiimiri.
12 «Aahago! Biki íbyakuraakaza?
Na kituma kiki ugweti ugafutulira Rurema amasu?
13 Kituma kiki ugweti ugamúrakarira ku magambo mwene yago?
Na kituma kiki gali mu folomboka mu kanwa kaawe?
14 «Aaho! Koꞌmundu angakoli yeruusibwa lwoshi? Nanga, maashi!
Bwo ali mu butwa noꞌmukazi, ka angaba akwaniini?
15 Si kiri naꞌbaganda, Rurema atabayemiiri.
Kiri na íbiri mwiꞌgulu, bitayerusiibwi imbere lyage.
16 Aahago! Ka itali yo haahe kwoꞌmundu atali mweru?
Si akoli bihuusiri, anagweti agaakola buligo nga kwo ali mu kizi nywa amagaloovi!
17 «Ewe! Unyuvwirize bwija, gira nguyereke.
Ngakubwira ngiisi byo nienyene nꞌgabona.
18 Yaga magambo, abitegeereza bo bakagabwirwa.
Kiri na bayishe banababwira gaago-gaago.
Ndaanalyo igambo lyo bakababisha.
19 (Kirya kihugo, bo bâli kihaabirwi,
ku kyanya ndaakyo kinyamahanga íkikabalenga mwo.)
20 «Yabo banangora-mabi, bagaahisa isiku zaabo zooshi, bali mu lyanirwa.
Bwo bali banangora-mabi, bagakizi libuzibwa imyaka yoshi.
21 Amatwiri gaabo, gali mu kanguka neꞌbihuume.
Kiri neꞌkyanya babwinagi kwo bagweti bagagenduukirwa,
abanyazi bali mu yami bateera.
22 Yabo banangora-mabi, batali mu gira mbu batoloboke mu kihulu.
Mukuba bakoli yobohiri kwo bagayitwa ku ngooti.
23 Bali mu jeba-jeba, mu kulooza byo bagaalya.
Banayiji-yiji kwoꞌlwabo keera lwayegerera.
24 Yulwo lusiku, luli mu bahumaaza.
Bakoli shengusiri ngoꞌmwami úkola úgayingira mwiꞌzibo.
25 Bagweti bagatigalika ibifune imbere lya Rurema,
gira bakizi hagana na Rurema woꞌbushobozi bwoshi.
26 «Ehee! Bagira mbu bamúteerage neꞌsiribo ngomu.
27 Yabo banakuhambwa, amalanga gaabo gali mu yaga-yaga naꞌmavuta.
Kiri neꞌbibuno byabo, bikoli jeziri bweneene.
28 Kundu kwokwo, utwaya twabo tugaashaka.
Banakola bagatuula mu nyumba ízikasigwa naꞌbandi, zinakola zigayihongoleka haashi.
29 «Yabo bandu, kundu bakiri bagale, si ubugale bwabo bugaasira.
Ibindu byabo, kundu bikiri kanyabungaka, si bitagaki yama ho.
30 Bagakizi beera i kuzimu, áhali ikihulu naaho, buzira kufuuka yo.
Imbigi zoꞌmuliro zigayumya ulukeme-keme lwabo.
Noꞌmuuka gwa Nahano gugabashereeza.
31 «Batakwaniini ukukizi yiteba, mu kulangaalira ibikoboola.
Iri bangabibiika kwoꞌmulangaaliro, ndaabyo bagalonga.
32 Yibyo bigakoleka ku kyanya batazi fwa,
kiri naꞌbaana baabo, batagalegama.
33 Bagahomba ngoꞌmuzabibu úgugweti gugaholola imizabibu mibishi,
banabe nga muzehituuni úguli mu bula ibitumbwe,
gunali mu tibula akaaso kaagwo.
34 «Bwo batali mu simbaha Rurema, booshi bagagumba ngana.
Na bwo bayamiri bali mu lya ikitulire, umuliro gugajigiivya inyumba zaabo.
35 Bagweti bagashungika amakuba naaho, naꞌmabi.
Bali mu yitoneesa naaho, ngiisi kwo bagalyalyania abaabo.»