14
1 «Umundu yeshi úli mu butwa noꞌmukazi,
ali wa kuramba isiku niini naaho,
anali mu zilonga mwaꞌmakuba.
2 Ali mu yasa bwija nga kaaso, haliko haaho, anashubi bogama.
Ali mu lenga nga kimbehwa, anayami nyerera.
3 E Rurema, kituma kiki ugweti ugambenekera?
Na kituma kikagi uli mu ndwira ulubaaja imbere lyawe?
4 «Umundu iri angaba akoli yulubiiri, nyandagi úwangaki múyeruusa?
Si ndaaye úwangahasha!
5 Umundu, isiku zaage zoꞌkuramba, keera ukazigereereza.
Unakoli yiji umuharuuro gweꞌmyezi yage.
Atanahangwirwi ukutalusa kiri neꞌhinyerere hiniini.
6 Umúlekage, maashi! Alonge ukutee luhuuka hiniini.
Bwo ali mukozi naaho, ulekage ayuse imikolwa yage mu kati koꞌmutuula.
7 «Ikiti, kundu kyangatemwa, haliko hakiri umulangaaliro,
kwo kigaki shubi mina.
8 Kundu imizi yakyo yangaba keera yashaaja mwiꞌdaho,
niꞌsina lyakyo linabe likoli fwifwitiiri,
9 haliko, iri yangahuma naaho ku miiji, kinayami shubi mina,
ibitombo byakyo binahinduke matavi.
10 «Haliko umundu yehe, ikyanya ali mu fwa, kwoshi kwokwo.
Amagala gaage gali mu yami ziikwa.
Iri ali mu yisa umuuka gweꞌmbeka, ndaakwo kundi.
11 Nga kwaꞌmiiji gali mu kama mu nyaaja,
noꞌlwiji lunayumaguke mu kikamo,
12 kwo na kwokwo ikyanya ali mu fwa,
atakiri mu vyuka.
Atâye ki vyuke, atanâye ki sisimuke,
halinde ku kyanya igulu ligayiji nyerera.
13 Bwangabiiri bwija utee mbisha i kuzimu,
halinde uburaakari bwawe butee hooha.
Ha nyuma kandi, unabiike ulusiku lwoꞌkushubi ngengeera.
14 Umundu, iri angaba akoli fwiri, ka angaki shubi tuula ho?
Isiku zaani zooshi, ngweti ngalibuuka.
Si nangalindirira halinde njwekuulwe mu lufu.
15 Lyoki, wangambamagala, na nyitabe,
unabe usiimiri bweneene ukumbona, nie kiremwa kyawe.
16 «Haaho, ugashubi gaaja indambo zaani,
si utangashubi loleekeza ibyaha byani.
17 Yibyo byaha byani binabe bikoli hambirwi mu ludaha,
noꞌbubi bwani bunabe bukoli bwikiirwi.
18 «Amalambo gagweti gagayihongoleka.
Naꞌmabuye gagweti gagakuulika ahandu haago.
19 Ishalalo zaꞌmiiji zigweti zigahokoorora amabuye.
Neꞌnvula igweti igamoola idaho.
Kwo na kwokwo, naawe, uli mu hebuuza abandu umulangaaliro.
20 Uli mu shemya umundu, anayami nyerera imyakuula.
Unahindule amalanga gaage, unamúkabulire hala.
21 Uyo mundu atangaki menya iri abaana baage bagingikwa,
kandi iri bali mu kizi shokoorwa.
22 Yaho i nakwere, ali mu yuvwa naaho ubulyanirwe mu magala gaage,
anabe ali mu yiganyira yenyene.»