31
I Miisiri iri nga kiti kyoꞌmwerezi
1 Ikyanya tukahisa imyaka ikumi na muguma tutwazirwi imbohe mu mahanga, mu lusiku luguma lwoꞌmwezi gwa kashatu, Nahano anashubi mbwiraga kwokuno:
2 «E mwana woꞌmundu, ubwire mwami weꞌMiisiri kuguma naꞌbandu baage kwokuno:
“Ewe! Si ulyagagi mukulu bweneene! Ndaaye gundi úgweti úgakuyigera.
3 Ee ma! Uli nga kiti kiija kyoꞌmwerezi gweꞌLebanooni.
Amatavi gaawe gabuyahiri bweneene,
ganali mu kizi leeta ikimbehwa mu kishuka.
Unashuumiri halinde mu bibungu.
4 Yikyo kiti, bwo kyâli byazirwi ha kadota kaꞌmiiji mingi,
kyanadeha bweneene.
Inyiiji zâli kizi lenga mu matambi gaakyo,
iri zinahingira mu bindi biti bya mu kishuka.
5 Yikyo kiti kyanalahuuka ukuhima ibindi byoshi bya mu kishuka.
Na bwaꞌmiiji mingi gâli kizi nywerera mu mizi,
kyanakaviiriza ukutavika.
6 Utunyuni twoshi, twâli kizi yiji yubaka ingisha mu matavi gaakyo.
Kiri neꞌnyamiishwa zâli kizi butira mwiꞌdako lyakyo.
Abandu ba mu mahanga gooshi bâli kizi yiji vwagarara mu kimbehwa kyakyo.
7 Yikyo kiti kyâli riiri kihamu, kyanâli buyahiri ngana-ngana!
Amatavi gaakyo, gâli mala-mala.
Imizi yakyo, yâli yisiri hala bweneene mwiꞌdaho,
halinde yanayikira áhali amiiji mingi.
8 Kiri na mu biti byeꞌmyerezi ya mu ndalo ya Rurema,
ndaakyo kindi íkyangakiyigera.
Amatavi gaakyo, kiri naꞌmatavi geꞌbiti byeꞌshindano gatagashushiri.
Kiri neꞌbiti íbiri mu detwa misunobari, bitâli hiiti mwene yago matavi.
Ee! Mu ndalo ya Rurema, ndaakyo kiti, íkibuyahiri nga kyo.
9 Mukuba, nꞌgakibuyahiisa bweneene,
mu kukiheereza amatavi mingi.
Ibindi byoshi bya mu ndalo ya Rurema, byanakiyuvwirwa uluugi.”
10 «Ku yukwo, nie Rurema Nahamwinyu nadetaga kwokuno: Si yikyo kiti kiija kyoꞌmwerezi gweꞌLebanooni kyâli kizi yikangaata, mbu kyo kilahuusiri bweneene ukuhima ibyabo, na mbu kyo kishuumiri halinde ku bibungu!
11 Aaho! Bwo kikoli bihuusiragi, keera nakijanda. Na ngola ngakibiika mu maboko geꞌbihagarusi byeꞌmahanga, bikihane nga kwo bikikwiriiri.
12 «Abasirikaani balangi bweneene ukulyoka i mahanga bagakikubira haashi, banakisige haaho. Amatavi gaakyo, maguma gagagwira ku mugazi, naꞌgandi hooshi mu ndekeera, kiri na mu tubanda twoshi. Abandu booshi ábashubi bwatiiri mu kimbehwa kyakyo, bagalyoka yaho, banakisige kyonyene.
13 Utunyuni twa mu kyanyaanya, tunayiji twa ku matavi gaakyo. Neꞌnyamiishwa zinakizi yiji gafina kwo.
14 «Ikiti, kundu kyangalonga amiiji mingi, ndaakyo íkigashubi laaha kwokwo, halinde kinahike ku bibungu. Kundu kwokwo, hagaatama, byoshi bigaafwa, binalindimukire i kuzimu nga bandu.
15 «Nie Rurema Nahamwinyu nadetaga kwokuno: Kirya kiti, ulusiku kikalindimukiraga i kuzimu, haaho-haaho, hanaba ikigandaaro. Nanayami dagira utudota. Nanayumya neꞌnyiiji, halinde amiiji ganakama. Nanayambika Lebanooni imirondo miiru, mu kuyerekana umwizingeerwe. Neꞌbiti byoshi bya mu kishuka, byanayuma.
16 «Yikyo kiti, ikyanya kikayibudika haashi, buu! Nanayami kilindimulira i kuzimu. Ikyanya kikalindimukiraga yo, izu lyakyo lyanayami teera ibinyamahanga ikyoba. Haliko, ibiti byoshi byeꞌHedeni kuguma na birya biti biija byeꞌLebanooni, kwo byâli kizi nywisibwa, byoshi byanaholobezibwa i kuzimu, imunda abafwiri batuuziri.
17 «Yibyo bindi biti íbyâli kizi kitabaala, nabyo byanalindimukira yo, byanagendi beera kuguma na ábâli bwatiiri mu kimbehwa kyakyo kihamu.
18 «Kwokwo, e Miisiri! Mu biti byoshi bya mu ndalo yeꞌHedeni, ndaakyo íkiri nga we, ku bukalage bwawe, na ku bulangashane bwawe. Kundu kwokwo, naawe ulyagagi nga yibyo biti. Mukuba, naawe ugagendi lambama mu bafwiri, balya ábatatwaziizi Rurema, banayitwe mwiꞌzibo. Bigaanaba kwokwo kiri neꞌmwa mwami weꞌMiisiri, naꞌbandu baage booshi. Kwokwo, kwo nie Rurema Nahamwinyu ndesiri.»