30
Rurema agaahana ikihugo kyeꞌMiisiri
1 Nahano anashubi mbwiraga kwokuno:
2 «E mwana woꞌmundu, utange ubuleevi, mu kumenyeesa kwo nie Rurema Nahamwinyu nadetaga kwokuno:
“Mulire ku kimombo, iri munadeta, ti: Lulya lusiku, lugaaba lwa kuhumirana ngana!
3 Ee! Yulwo lusiku keera lwayegerera.
Nie Nahano ngola ngatwira abandu ulubaaja.
Ku yulwo lusiku, ibibungu bigazinga,
neꞌbinyamahanga binashenguke.
4 Umugoma agayiji teera ikihugo kyeꞌMiisiri.
Yabo Bamiisiri, ikyanya bagayitwa, ibindu byabo bigashahulwa,
neꞌndaliro zoꞌtwaya twabo zinahongolwe.
Haaho, Abahendyopiya bagajuguma neꞌkyoba.
5 Abahendyopiya, naꞌbandu beꞌPuuti, naꞌbeꞌLuudi, naꞌbeꞌBuharaabu, naꞌbeꞌLibiya,
kundu bakayibiika ku Bamiisiri, booshi bagayitirwa kuguma.”
6 «Nie Nahano nadetaga kwokuno:
“Ngiisi ábagweti bagashigikira Abamiisiri, bagaminikwa.
Na kundu bâli riiri bihagange, bagayitwa mwiꞌzibo.
Abamiisiri booshi bagayitwa, ukulyokera i Migidoli halinde i Sewene.
Kwokwo, kwo nie Rurema Nahamwinyu ndesiri.
7 Ikihugo kyeꞌMiisiri kigasigala ishamba limaata ukuhima ibindi bihugo byoshi.
Kiri noꞌtwaya twamwo tugaasiba ngana-ngana!
8 Yikyo kyanya, ngajigiivya i Miisiri ku muliro,
na nvungule-vungule abatabaazi baabo booshi.
Haaho, lyo bagaamenya ku kasiisa kwo nie Nahano.
9 Ku yikyo kyanya, ngalungika indumwa, zigendi kanga Abahendyopiya.
Kundu bagweti bagayihenda, kwo baki tuuziri mu kati koꞌmutuula,
haliko ikyanya Abamiisiri bagaminikwa, nabo bagalenga mwoꞌmusisi.
Ee! Yulwo lusiku, ukuhika, lugaahika ngana!”
10 «Nie Rurema Nahamwinyu nadetaga kwokuno:
“Ngakoleesa mwami Nebukandeneza weꞌBabeeri,
mu kumala abandu katundu mu kihugo kyeꞌMiisiri.
11 Uyo Nebukandeneza, naꞌbandu baage,
ndaabo ábali balangi ukubahima mu mahanga gooshi.
Bagaleetwa, gira bagendi shereeza i Miisiri.
Bagayomolaga ingooti zaabo, banayite Abamiisiri,
halinde ikihugo kyabo kinayijule mweꞌbirunda.
12 Lulya lwiji Niire, ngaluyumya.
Neꞌkihugo íkiri ha butambi lyalwo, ngakiheereza abandu babi.
Kyoshi, ngakoleesa ibinyamahanga,
gira bikishereeze kuguma na ngiisi íbikiri mwo.
Kwokwo, kwo nie Nahano ndesiri.”»
13 Rurema Nahamwitu adetaga kwokuno:
«Ngashereeza imigisi yeꞌMiisiri, kiri neꞌya mu kaaya keꞌMefiisi.
Mu kihugo kyoshi kyeꞌMiisiri, ndaaye úgaki ba mutwali.
Nganabiika mweꞌkyoba kingi.
14 Ngashereeza akaaya keꞌPaturo.
Naꞌkaaya keꞌSowani, ngakajiviivya ku muliro.
Nganahana akaaya keꞌTebeesi.
15 Akaaya keꞌSiini, kundu ko kazitire mu Miisiri yoshi,
ngakahaniiriza ku buraakari bwani,
na nzimiize naꞌbandu katundu ba mu kaaya keꞌNo.
16 Ee! Ngajigiivya ikihugo kyoshi kyeꞌMiisiri.
Abandu beꞌSiini bagateerwa neꞌkyoba kingi bweneene.
Inzitiro zeꞌMefiisi zigahongolwa.
Naꞌbandu baayo, bagakizi shenguka.
17 Imisore mitabana yeꞌHoni na yeꞌPibeseeti, igayitwa ku ngooti.
Na ábagasigala, bagatwalwa imbohe mu mahanga.
18 Ikyanya ngayiji maliiriza ubushobozi bweꞌMiisiri,
lyeꞌkihulu kigabwikira i Tapaneshi, gunali mwiꞌzuuba.
Ikihugo kyeꞌMiisiri kigayidika mweꞌkihulu,
abandu mu twaya twakyo banagwatwe imbira,
banatwalwe i mahanga.
Haaho, lyaꞌbandu beꞌMiisiri batagaki yikangaata hiꞌgulu lyoꞌbushobozi bwabo.
19 Kwokwo, kwo ngaahana ikihugo kyeꞌMiisiri,
halinde abandu baamwo bamenye kwo nie Nahano.»
Abandu beꞌMiisiri batakiri bihagange
20 Ikyanya tukahisa imyaka ikumi na muguma tutwazirwi imbohe mu mahanga, mu lusiku lwa kalinda lwoꞌmwezi gwa mbere, Nahano anashubi mbwiraga kwokuno:
21 «E mwana woꞌmundu, kundu ukuboko kwa mwami weꞌMiisiri kushuba noꞌbushobozi, haliko keera nakuvuna. Yukwo kuboko, ndaaye úkakubuka, ndaanaye úkakushweka ulushange. Kwokwo, kutâye longe ukukira, kutanâye ki fumbate ingooti.
22 «Kwokwo, nie Rurema Nahamwinyu nadetaga kwokuno: Ngola mugoma wa mwami weꞌMiisiri. Ngaavuna amaboko gaage gombi, kulya úkukiri kugumaana, noꞌkwabo keera úkukavunika. Kwokwo, irya ngooti yo ashubi fumbiiti mu kuboko kwage, igamútibuka.
23 «Yabo Bamiisiri, ngabashabulira mu mahanga gooshi.
24 Ngasikamya amaboko ga mwami weꞌBabeeri, ninamúfumbadike ingooti yani. Haliko, amaboko ga mwami weꞌMiisiri yehe, ngagavungula. Neꞌkyanya agaaba imbere lyoꞌyo mwami, agagongeera ngana, ngoꞌmundu úkola úgaafwa.
25 Ee! Ngasikamya amaboko ga mwami weꞌBabeeri. Haliko, amaboko goꞌwabo weꞌMiisiri, goohe gagalebera. Mukuba, mango nafundaga irya ngooti yani mu kuboko kwa mwami weꞌBabeeri, anabe akola mu gikoleesa mu kulwisa ikihugo kyeꞌMiisiri, lyaꞌbandu bagaamenya ku kasiisa kwo nie Nahano.
26 «Yabo Bamiisiri, ngayami bashabulira mu mahanga, halinde banashabukire hooshi-hooshi. Haaho, lyaꞌbandu bagaamenya kwo nie Nahano.»