28
Ubuleevi hiꞌgulu lya mwami weꞌTiiro
1 Nahano anashubi mbwiraga kwokuno:
2 «E mwana woꞌmundu, ubwire mwami weꞌTiiro kwo nie Rurema Nahamwabo nadetaga kwokuno:
“Si ugweti ugayikangaata bweneene, iri unayihaya, ti: ‘Niehe nie woꞌkuyikumbwa!
Ngoli bwatiiri ku kitumbi kya íbiri mu yikumbwa, kinali ha kati keꞌnyaaja.’
Kundu ugweti ugayidundulika kwo we woꞌkuyikumbwa,
si ulyagagi mundu ngana, utanali wa kunyigereera.
3 Ugweti ugayitoneesa kwo we hiiti ubwitegeereze ukuhima Danyeri.
Unatoniragi kwo we yiji ubumbishwa bwoshi-bwoshi,
4 mbu ku bwitegeereze bwawe, na ku bwenge bwawe wayigaza,
wanayikumaniza inooro neꞌharija, wanabilunda mu bihinda byawe.
5 Mbu na ku njira yoꞌkumenya ukudandaza, ukayilugiza ubugale bwawe.
Ehee! Si bwobwo bugale, bwo butumiri ukola mu yikangaata bweneene!
6 «“Ku yukwo, nie Rurema Nahamwinyu nadetaga kwokuno:
Bwo wayibona kwo ukola mwitegeereza nga Rurema,
7 kyo kitumiri ngola ngakuleetera ibinyamahanga,
banali balangi ukuhima igindi milala yoshi.
Bagayomola ingooti zaabo mu kyubati,
banakushereegeze byoshi byo ugaaba walonga ku bwitegeereze bwawe, na ku bulenga bwawe.
8 Bagakulindimulira mu kuzimu,
unafwire buligo mu kalingi keꞌnyaaja.
9 Aahago! Ikyanya bagaaba bakoli gweti bagakuyita,
ka ugashubi yihaya, mu kudeta kwo uli woꞌkuyikumbwa?
Ikyanya bagayiji kuyita,
ugayibona kwo uli mundu ngana, utanakwiriiri ukuyikumbwa!
10 Ukufwa kwawe, ugaafwa nga kabwa mu maboko geꞌbinyamahanga.
Kwokwo, kwo nie Rurema Nahamwinyu ndesiri.”»
11 Nahano anashubi mbwiraga kwokuno:
12 «E mwana woꞌmundu, uyimbire mwami weꞌTiiro ulwimbo lweꞌkigandaaro. Unamúbwire kwo nie Rurema Nahamwinyu nadetaga kwokuno:
“Ushubi hiiti íbiri biija ngana,
wanayijula ubwitegeereze bwoshi,
unashubi nonosiri ngana-ngana!
13 Wâli jeberiiri bweneene, nga bandu ábâli i Hedeni, mwiꞌrya ndalo ya Rurema.
Wâli limbisiibwi na ngiisi mabuye geꞌkishingo,
ngiꞌbuye lyeꞌsaridwane, na lyeꞌtopaazi, na lyeꞌdyama, na lyeꞌkirisolite, na lyeꞌyasipi, na lyeꞌhonikisi, na lyeꞌsafiiri, na lyeꞌharija, na lyeꞌsikaribukile.
Ubungeni-ngeni bwawe bwâli tuzirwi mu nooro naaho-naaho.
Yibyo byoshi, bikagirwa hiꞌgulu lyawe ku lulya lusiku lwo ukalemwa kwo.
14 Nꞌgakubiikira makerubi, gira akizi kulanga,
wanaramba ku mugazi gwani mweru,
wanakizi zaatira mu mabuye ágakeyengiini nga muliro.
15 Wâli rambiri ku njira ítungiini ukulyokera ku lusiku lwo ukabumbwa kwo,
halinde ku kyanya ukatondeera ukugira amabi.
16 Iri ukabonaga kweꞌbindu byawe byakugaza bweneene,
wanatondeera ukulangama, halinde wanayifunda mu byaha.
Na bwo wâli kola mubi, nanakuyimula ku mugazi gwani mweru.
Noꞌlya makerubi úwâli kizi kulanga, naye anakuyimula mu yago mabuye ágakeyengiini nga muliro.
17 Emwe! Wâli buyahiri ngana-ngana, kyanatuma ugatondeera ukukizi yikangaata.
Na bwo wâli mukulu, wanashereeza ubwitegeereze bwawe.
Kwokwo, nanakunyanyaga haashi,
halinde abandu baani banakuyigira kwo.
18 Wâli kizi gira ibyaha bweneene, kiri noꞌkugungana,
halinde wanayulubaza ngiisi ho wâli kizi yikumbira.
Kwokwo, ngiisi ho wâli tuuziri, nanahayakiza umuliro,
halinde gwanahajigiivya.
Nanakuhindula ube munyota-kiiko mu masu gaꞌbandu booshi.
19 Ngiisi binyamahanga íbyâli kuyiji,
bigweti bigasoomerwa hiꞌgulu lyawe.
Ukumala kwawe, kwâli riiri kubi bweneene,
utanâye shubi boneka halinde imyaka neꞌmyakuula!”»
Ubuleevi hiꞌgulu lyeꞌSidooni
20 Nahano anashubi mbwiraga kwokuno:
21 «E mwana woꞌmundu, ulangiizagye uluhande lweꞌSidooni, unagitangire ubuleevi, mu kumenyeesa kwo
22 nie Rurema Nahamwabo nadetaga kwokuno:
“E bandu beꞌSidooni! Ngolaga mugoma winyu!
Neꞌkyanya ngamùhana, lyo ngamùyerekana mwoꞌbulangashane bwani,
lyo nganayerekana na kwo ndi mweru.
Kwokwo, abandu bagaamenya ku kasiisa kwo nie Nahano.
23 Ngamùlungikira amalwazi, halinde imiko mingi inagolombe mu njira zaawe.
Ugateerwa neꞌngooti imbande zooshi,
halinde abandu baawe banaminikwe.
Kwokwo, lyo mugaamenya kwo nie Nahano.”»
Abahisiraheeri bagagashaanirwa
24 Nahano agweti agaadeta kwokuno: «Ibinyamahanga, balya ábatuuziri hoofi-hoofi naꞌBahisiraheeri, bâli kizi balibuza ngeꞌmishuugi, neꞌmigunga. Kundu kwokwo, batâye ki shubi balibuza. Haaho, lyo bagayiji menya kwo nie Rurema Nahamwabo.
25 «Nie Rurema Nahamwinyu nadetaga kwokuno: Yabo Bahisiraheeri, kundu bâli shabusiri, haliko ngashubi bakuumania booshi. Kwokwo, mango birya binyamahanga byabonaga ngiisi kwo ngagirira abandu baani, lyo bigaamenya kwo ndi mweru. Yabo Bahisiraheeri bagashubi tuula mu kihugo kyabo, kirya kyo nꞌgaheereza Yakobo, umukozi wani.
26 Bagakituula mwo mu kati koꞌmutuula, banashubi yubaka inyumba, iri banabyale neꞌmizabibu. Ee ma! Yibyo binyamahanga byo babibikiinwi, kundu bibashombiragi, haliko ngaki bihana byoshi, halinde Abahisiraheeri banashubi tuula mu mutuula. Haaho, lyo bagayiji menya kwo nie Rurema Nahamwabo.»