27
Ikimombo hiꞌgulu lyaꞌkaaya keꞌTiiro
1 Nahano anashubi mbwiraga kwokuno:
2 «E mwana woꞌmundu, buno uyimbage ulwimbo lwoꞌkugandaara akaaya keꞌTiiro.
3 Yako kaaya, kali ku ngombe yeꞌnyaaja, hanali heꞌbinyamahanga bingi biri mu yiji dandaliza. Yako kaaya, ukabwire kwo nie Rurema Nahamwabo nadetaga kwokuno:
“E Tiiro! Si wâli kizi yikangaata kwo uli mwija ngana-ngana!
4 Ukayami tabika halinde mu kati keꞌnyaaja,
wanayiyuvwa bweneene, mbu bwo ukayubakwa ubuyahiri ngana-ngana!
5 Uyubasirwi nga mashuba mahamu malingaanie mu biti byeꞌshindano ukulyoka i Seniiri.
Banagalingaaniza inguliro yaꞌmatanga,
mu biti byeꞌmyerezi yeꞌLebanooni.
6 Banagatwira ibiti byeꞌmyalooni ukulyoka i Bashaani,
bakizi gashooja mwo.
Banabereesa neꞌmbahwa mu biti byeꞌshindano za mu kalira keꞌKipuro,
banazilingaania mweꞌbitumbi byoꞌkubwatala kwo,
banabilimbiisa naꞌmahembe geꞌnjovu.
7 Banakuhangira itanga mu mirondo yeꞌkitaani ukulyoka i Miisiri,
yanakizi tuma ugalangiika ku hala.
Wanakizi siikirwa noꞌmulondo gwiꞌbara lyeꞌkituku-tuku neꞌlidukula, ukulyoka mu tulira tweꞌKipuro.
8 Wanaleeta abashooji ukulyoka mu kaaya keꞌSidooni naꞌkeꞌHarwadi.
Na ábâli kizi rongoora amashuba, bâli lyosiri i Tiiro yonyene.
9 Wâli kizi koleesa ibikalage byaꞌbashosi ukulyoka i Gebaali, kuguma na banaluganda baabo boꞌkuziba amatule gaꞌmashuba.
Naꞌba mu mashuba gooshi ga mu nyaaja, imwawe yo munda bali mu yiji dandaliza.
10 Abasirikaani baawe, wâli balyosiizi i Perisiya, neꞌLuudi, neꞌPuuti.
Isiribo zaabo, neꞌngofeera banayiji bimanika mu mwawe.
Kwokwo, kwo bakakugingika.
11 Inzitiro zaawe zooshi zâli kizi langwa naꞌbandu ukulyoka i Harwadi, kuguma naꞌbasirikaani baawe. NaꞌbeꞌGamadi bâli kizi langa inyingo zaawe. Hooshi ku nzitiro zaawe, bâli kizi shasha heꞌsiribo, halinde banakubuyahiisa ngana-ngana!
12 «“Na bwo wâli riiri mugale bweneene, wâli kizi dandaza naꞌbandu beꞌTarasisi. Bâli kizi kuleetera iharija, neꞌbyuma, naꞌmanjanja, neꞌbyuma byoꞌlusasi.
13 Ikyanya abandu beꞌYavaani, naꞌbeꞌTubaali, naꞌbeꞌMesheki, bâli kizi yiji dandaza, bâli kizi kuleetera abaja, na íbikatulwa mu miringa.
14 Abadandaza beꞌBeeti-Togarima, nabo bâli kizi kuleetera ifwarasi zoꞌkuheeka imiteekerwa, na zoꞌkugenda mwiꞌzibo, neꞌngamiya, neꞌbiiza bya bapunda.
15 Abadandaza beꞌDedaani, nabo bâli kizi yiji dandaza. Kiri naꞌbandi bandu bingi ukulyoka mu tundi tulira, bâli kizi yiji dandaza, banakuleetere amahembe geꞌnjovu, neꞌbiti biija-biija íbiri mu detwa: hebeene.
16 Abaharaamu nabo, banakizi yiji gula ibindu byawe bingi-bingi, banakizi kuleetera amabuye geꞌkishingo neꞌmirondo ítyeriiri, mihange mu nuzi zeꞌkitaani, inali kweꞌbirimbiiso byaꞌmabuye miija ágadukumbusiri, naꞌgandi mabuye madukula.
17 Abadandaza beꞌBuyuda naꞌbeꞌHisiraheeri, nabo bâli kizi yiji dandaza ingano zeꞌMiniiti, naꞌmahemba, noꞌbuuki, naꞌmavuta geꞌmizehituuni, noꞌmubadu.
18-19 Abandu beꞌDamasiki, nabo bâli kizi yiji gula ibindu byawe bingi-bingi, banakuleetere idivaayi ukulyoka i Heribooni, noꞌbwoya bweru-bweru bweꞌkibuzi ukulyoka i Zahari, neꞌbyuma bitule, neꞌbiti byaꞌmalaasi, noꞌlusheke.
20 Abandu beꞌDedaani nabo, mwâli kizi dandalizanwa ibyajo byeꞌfwarasi.
21 Abaharaabu naꞌbatwali booshi beꞌKedaari, mwâli kizi dandalizanwa. Bâli kizi kuleetera ibyanabuzi, neꞌbipanga, neꞌmbene.
22 Abandu beꞌSheeba, naꞌbeꞌRama, mwâli kizi kaburania ibindu. Bâli kizi kuleetera ibilungo byeꞌbyokulya, naꞌmabuye geꞌkishingo, neꞌnooro.
23 Abatuulaga beꞌHarani, naꞌbeꞌKane, naꞌbeꞌHedeni, naꞌbeꞌSheeba, naꞌbeꞌHashuuri, naꞌbeꞌKirimadi, mwâli kizi dandalizanwa
24 imirondo miija yeꞌkituku-tuku, na íkahangirwa kweꞌbirimbiiso, neꞌbyajo byaꞌmabara ga kwingi-kwingi, neꞌngoba ngomu, zinali nduke.
25 E Tiiro! Ibindu byawe byâli kizi seeherwa mu mashuba mahamu-mahamu.
Ee ma! Byâli yijwiri mwo.
26 Haliko lolaga! Abashooji baawe, bakakutwala i buziba,
yanatuza imbuusi yoꞌmulula ukulyoka isheere.
27 Yoho wee! Ku lusiku lwo ugashereezibwa kwo, byoshi bigatikirira mu nyaaja:
Ubugale bwo ukalonga mu budandaza,
naꞌbashooji baꞌmashuba, kuguma neꞌbirongoozi,
na banaluganda boꞌkugalingaania, naꞌbadandaza baawe,
kiri naꞌbasirikaani baawe.
28 Ikyanya abashooji baawe bagateera umulaga kwo batabaalwe,
abandu ku ngombe bagajuguma neꞌkyoba.
29 Abashooji booshi, neꞌbirongoozi naꞌbandi bakozi, bagashonooka mu mashuba,
banabeere kwiꞌbuga, bagweti gabaloleera.
30 Kwo bali booshi, bagabululuka hiꞌgulu lyawe,
iri banayifuka uluvu mu matwe, noꞌkuyivuruguuza mu munyota-kiiko.
31 Amatwe gaabo, bagagakunguula hiꞌgulu lyawe,
banayambale amasuuzu ku mwizingeerwe.
Banabululukage ku kimombo, iri banashenguka.
32 Bagakizi jengeerwa hiꞌgulu lyawe,
iri banakuyimbira ulwimbo lweꞌkigandaaro, ti:
Ka hâli riiri akaaya ákali nga keꞌTiiro?
Si keera katikira mu nyaaja, i buziba!
33 Ibindu byawe, ikyanya byâli kizi hika mu bihugo byeꞌkajabo,
abandu bingi bâli kizi longa íbishubi bagooziri!
Kiri naꞌbaami, nabo bikabagaza, bwo byâli riiri kanyamwala.
34 Halikago leero, keera wavungukira mu nyaaja,
wanazika mu mabenga, halinde wanayikira haashi.
Ubudandaza bwawe, kiri naꞌbandu booshi ábâli kuliiri mwo,
mweshi kuguma, mwazika.
35 Abatuulaga booshi ba ku nyaaja,
ikyanya bakabonaga íbikakukoleka kwo, banakanguka.
Abaami baabo banayoboha bweneene,
halinde amalanga gaabo ganayami zizibala ku mwizingeerwe.
36 Abadandaza beꞌmahanga bagakizi kuyamiriza!
Ehee! Keera waheraga,
utanâye ki boneke!”»