17
Umugani gwa nyunda noꞌmuzabibu
1 Nahano anashubi mbwiraga kwokuno:
2 «E mwana woꞌmundu, utwire Abahisiraheeri guno mugani, kwo
3 Rurema Nahamwabo adetaga kwokuno:
“Hâli riiri bisitwe muguma wa nyunda, úkabalala halinde ku mugazi Lebanooni,
anagendi yineneka kwiꞌshako lyeꞌkiti kyoꞌmwerezi.
Uyo nyunda âli neꞌbyubi bila-bila,
naꞌmashala mala-mala, ganâli riiri naꞌmabara mingi-mingi.
4 Yiryo ishako lya hiꞌgulu bweneene, analikoonyola,
analibalalana, halinde mu kaaya kaꞌbadandaza.
5 Ha nyuma, anayabiira ikitombo mu kihugo kyeꞌHisiraheeri,
anakifulika mwiꞌdaho lyeꞌnagiira, áhali amiiji mingi.
6 Iri yikyo kitombo kikakula, kyanahinduka kya muzabibu mwija gwoꞌkulandira haashi.
Gwanagangaala, halinde amatavi ganakizi lola imunda ulya nyunda,
neꞌmizi iri inayika bweneene mwiꞌdaho.
Yugwo muzabibu, gwanatavika, halinde gwanashoga kweꞌbihunda bingi.
7 Halikago, hanayija ugundi bisitwe wa nyunda,
naye âli neꞌbyubi bila-bila, naꞌmashala mingi-mingi.
Gulya mulandira gwanahindulira imizi neꞌbihunda imunda ali,
gira agunywise.
8 Kundu kwokwo, ho gwâli shiizirwi, hâli riiri inagiira, naꞌmiiji mingi,
lyo gugangaala, gunatongeke kweꞌbitumbwe,
gunakizi yama gudehiri.”
9 «Aaho! Rurema Nahamwitu amùbwiraga kwokuno:
“Yugwo mulandira, ka gwangasikama? Aahabi!
Mukuba ngagushikula neꞌmizi neꞌmizi.
Ibihunda byagwo kiri neꞌbitumbwe, bigayuma.
Amatavi gaagwo, kundu gakiri mu mina, haliko gagayuma.
Gunayami shikulwa, buzira kukoleesa imisi mingi, kandi iri bandu bingi.
10 Yugwo mulandira, kundu gwangashubi byalwa,
haliko gutagaki kula!
Si uluhande lweꞌsheere, lugahulukaga imbuusi ngayu,
inaguyumye, haahalya mu luvu lwo gukakulira mwo.”»
Umugeeza gwa yugwo muzabibu
11 Ha nyuma, Nahano anambwira
12 kwo mbwirage yabo bahuni kwokuno: «Yugwo mugani, ka mutasobanukiirwi noꞌmugeeza gwagwo? Mwami weꞌBabeeri akahikiraga i Yerusaleemu, analyosa mwami wayo kuguma naꞌbagingi baage, anabatwala booshi i Babeeri.
13 «Uyo mwami, anayabiiraga mundu muguma mu bwami bweꞌBuyuda, anamúbikiisa indahiro kwo akizi ba mwemeera imwage. Analyosa naꞌbandi batwali, anabatwala hala,
14 gira ubutwali bwabo butaki sikame. Kwokwo, lyo yubwo bwami bweꞌBuyuda bugenderera naaho ukukizi simbahiisa irya ndahiro yo bakalagaana na mwami weꞌBabeeri.
15 «Haliko, ulya mwami weꞌBuyuda, anahuna imbere lyoꞌyo wabo weꞌBabeeri, analungika indumwa i Miisiri, gira zigendi múhuunira ifwarasi, kuguma naꞌbasirikaani bingi. Aahago! Ka kwokwo uyo mwami weꞌBuyuda agaahima? Bwo keera akahongola indagaano yage, ka agayiyeka ikihano? Aahabi!
16 «Nie Rurema Nahamwinyu, nga kwo nyamiragi ho, ngweti ngakyula kwoꞌyo mwami agafwira mu kihugo kyeꞌBabeeri. Mukuba, mwami wakyo, ye na yolya úkayimikwa abe mwami weꞌBuyuda. Ee! Mwami weꞌBuyuda atakasiima umuhango gwo akalagaania mwami weꞌBabeeri, anaguhongola.
17 «Ikyanya Abababeeri bagalwisa Abayuda, ulya mwami weꞌMiisiri, kundu ali neꞌbikalage bingi byaꞌbasirikaani, haliko atagahasha ukubatabaala mwiꞌzibo. Mukuba yabo Bababeeri bagasokanana kalya kaaya kooshi, halinde banayite mwaꞌbandu bingi.
18 «Uyo mwami weꞌBuyuda, kundu akatee biika indahiro kwo agakizi yihega ku Bababeeri, haliko anayiji gigayiriza, mu kugihongola. Ku yukwo, atagafuushuka.
19 «Rurema Nahamwitu adetaga kwokuno: “Nga kwo nyamiragi ho, bwoꞌlya mwami weꞌBuyuda akangayiriza, anahongola kirya kihango kyo tukanywana twe naye, ku kasiisa, ukumúhana, ngamúhaniiriza.
20 Ngamúyajuulira kwoꞌlushenga lwani, halinde analugwatwe mwo. Ninamútwale halinde i Babeeri. Haaho, lyo ngamúhana, mukuba atâli riiri mwemeera imwani.
21 Kundu ali neꞌbihagange byaꞌbasirikaani, bagayitwa ku ngooti. Na ábagafuushuka, bagashabukira imbande zooshi. Kwokwo, lyo mugaamenya kwo nie Nahano, nie wadeta.”
Umuhango gwa Rurema, guli mu tuleetera umulangaaliro
22 «Nie Rurema Nahamwinyu, nadetaga kwokuno: Nienyene, ngayabiira ihitavi íhikamina ku kiti kyoꞌmwerezi. Yihyo hitavi, ngahitola ku matavi gaakyo hiꞌgulu, na ngendi hishinga kwiꞌrango lila bweneene.
23 Ee! Ngahishinga mu kihugo kyeꞌHisiraheeri. Ha nyuma, higayasa, hinatongeke kweꞌbitumbwe, kinayiji ba kiti kiija kyoꞌmwerezi. Haaho, utunyuni tweꞌmilala yoshi tunayiji yubakira ingisha ku matavi gaakyo, tunakizi yegama mu kimbehwa.
24 «Kwokwo, lyeꞌbindi biti byoshi íbiri mu yikyo kihugo bigaamenya ku kasiisa kwo nie Nahano. Ee! Ibiti bila-bila, ndi mu kizi bimanula. Haliko, ibiti byofi-byofi byohe, na mbiyinamule. Ibiti bibishi, ndi mu biyumya. Halikago ibiti byumu, na mbikuze. Yibi byoshi, nie Nahano, nie wabideta, nie nganabigira.»