2
Melia Yesu neegela ägüi
1 Segeyo amo gaalu, Olomo dolö, ëi Sisa Ogasadasa e beaha aligilo gini nea, ea udia dolö beaha neebe amolile ëi sulubadela dëdëmolö dialeala säla negei.
2 Gabenaïe ëida Guliniasa. Ea Silia sege dibe amo sulubadela beaha neebe amo gaalu, gamane dolö ilia ëi mi gäwila dëdëi.
3 Amala hamomolö beala, udia dolö sulubadela hïle segea afufula, ëi bebagi negemolö asi.
4 Amalebe, Yosebe eda Galilimadi gaamu afädë dilo, ëida Nasalese amilahilä, Yudiamadi Debidiïe gaamu afädë dilo, amoïe ëida Bedeleheme ami asi. E ami asi amoda, e Debidiïe yaua mäu gabula helësëlahilä, ami ëi negemolö asi.
5 Yosebe eada, udia dolïsa Meli nimolö segeyo ga made negesilahilä sulo amo, helegela ëi negemolö Meli e malö fagulo hagui sulo amola asi.
6 Ele Bedeleheme ami nea, Meli e olobola sulolahilä, giisi mosöa asi.
7 Amalahilä, ea dolö malö abulümi afädë ägüi. Ägülahilä, Melia faguloea usulala, sugua gao molö nulö auli dibea ami negesi. Aulidaia ami negei amoïe mida, udia dolö gedola dilo mosö nelo amo negegila, fu made beala amai.
Selesaia fii amolia sugua sibi sigi aligilo amolima ado säla ï
8 Sege amoïe näiadodi, sugua sibi sigi aligilo odoa nefolalo. Amolia gasigi, ilile sugua sibi sigi, gaamu baagido nefolalo.
9 Amala sigi neebegi, Dafidilo Geloiïe selesaia fii afädë beselagalahalea, Dafidilo Geloiïe yo digalo hïdo elöi ili neebea ami yo digala säsäloi. Amala hamosebegi, ili edefademalä bedäla fudugi.
10 Amala bedäla neebe amo bealahilä, selesaia fii amea ilima sähalea, Bedämabio. Ado hedabi afädë na dilima säla ïmolö gaula misi neawe. Udia dolö sulubadela fifi asi sebe amo obeägïsa maademäia.
11 Debidiïe gaamu dibea ami, walio dilile damula aulo ägüimelë. Malö amoda Dafidilo Geloi. Godea Afädë Memelei amo misimelë.
12 Amo dofä gabula helësëmäiada, malö dubo amo sugua gao molö nulö auli dibea ami, faguloea usulala negei diëgi bimolömelëla säla ï.
13 Amo säha maadela neebe amo gaalu, selesaia fii yafie dafidi afädë nelo amobalä fodolofalï maala ulufadigila nelo. Amalebe, ilia Godeïe ëi gauia adahalea sähalea,
14 Gode ilibia neebe amoïe ëi gauia adahawe. Nagadaia nea hame negela aligilo udia dolö neebe amolimada, Godea aealasilomelëla säi.
Sugua sibi sigi aligilo amolia Yesu bea asi
15 Amala säha nelolahilä, selesaia fii amoli ili dïgïla, selesaia mosöa obëgëi. Ili asi baagido, sugua sibi sigi aligilo amolia, hilido säla didigahalea, Dafidilo Geloia ado walio nilïma säla ï amo gadola hamoi amo bimolö, Bedeleheme afiadila säi.
16 Amalahilä, ili fodolofalï Bedeleheme afiai. Afialahilä, Meli Yosebele sebe amo beagolela, Yesu sugua gao molö nulö auli dibea ami dibe amoge melï.
17 Bealahilä, malö amoïe ado selesaia fiia säla ï nabi amo sulubadela, udia dolö amolima säla ï.
18 Sugua sibi sigi aligilo amolia ado amo säla ïasebegi, udia dolö nefolalo amolia nabalahilä, ili sulubadela asigigi fudugisa difolalo.
19 Amalebe, Meliada ado säsebe amo sulubadela isogi nea salala, helësësa sulo.
20 Nelebo sulubadela nabi amoïege, melï amoïege, ilima säi amo gadola hamoi melï amogi, sugua sibi sigi aligilo amolia Godema obeägïla, Godeïe ëi gauia adala aligi obëgëi.
Yesuïe ëi negei
21 Malö amo ägüla misi, segeyo gödö beselagalasolo amo gala ilia malö amoïe gafodo amalela dagabolasilahilä malö amoïe ëi Yesu negei. Emea malö amo fagulo hagui made sebegi selesaia fiia ëi Yesu negemalola säi amo gadola Yesu negei.
Simeonole Anale gobela ïlo mosöa nea Yesu melï
22 Segeyo amo beselagalasolo amo gala Mosese neebegi Ado säla negei dibe amo gadola Godeïe siigi udia malö ägüla misi sulo amoïe nigime dogadigimolöïe elea malö amo Dafidilo Geloigali ïmolö Yalusaleme ägüla asi.
23 Dafidilo Geloiïe Ado säla negei dibe ameada dolö malö abulümi sogobaseda, Dafidilo Geloigali odala ïmalola säla negei.
24 Dafidilo Geloiïe Ado säla negei dibe amo gadola haea maliabu gadoi äudä made galëda, haea emalö äudä ïmalola säla negei. Elea amo gadolage neala ïmolö asi.
25 Segeyo amo gala, dolö afädë ëi Simeono, Yalusaleme ami sulo. Dolö amoda asigi mogoi nea, Godeïe mala nabahamu aligilo. Eada Isilaleïe damula aulo misiäia beaha nelo. Emada Gesami Hedabifalï nobai nelo.
26 Dafidifalï, Gesami Hedabifalïa Simeonoma sähalea, Di baagola made neëgi, Dafidilo Geloia Afädë Memelei moholömelëla säla negei amo misi neëda, dia siia bimolömelëla säla ï.
27 Godeïe Gesami Hedabifalï amea Simeono e sigi gaula Godeïe mosöa asi. Awäla beselagalahamelebe, Ado säla negei dibe amo gadola hamomolöïe, eedo emelea malö amo sogobala gaula misi neebe melï.
28 Bealahilä, Simeonoea malö amo sogobala gaula nea, Godeïe ëi gauia adala sähalea,
29 Dafidilo Geloie, dia dafidi säla negei dilo amo gausiala digai gabu. Dïe hamoi hamolasilo ne hame eegelasilahilä, ne baagomolö amo dofea.
30 Nïe siia, dia nilï damula moholömelëla säi amo beahawe.
31 Amoda, udia dolö sulubadelaïe sidaia dia daiai.
32 Eda yo digalo nea, udia dolö fii odoa neebe amo neala yo digalasilahilä, dïe Isilale udia dolö neebe amoïe ëi gauia adamolö neebegola
Simeonoea säla wagai.
33 Simeonoea malö amoïe ado säi amo nabalahilä, malö amoïe eedo emelea asigigi fudugisa nelo.
34-35 Amala sälahilä, Simeonoea ele neala obeägïlasila, malö amoïe eme Melima sähalea, Nabualo. Malö goeada Isilale udia dolö yafie neala digalasila, yafie nowela ifosimolöge, Godea e memelela ifosimelë. E hïdo elöi neëgi, udia dolö yafiea ema ado nafadela sälahilä, bimolö habobala, ilile asigigi dibe amo gadoi säla ulufadigisa namolömelë. Amala hamosegi, bobasëmolö amoda nudulo helebe meia dïe bobagi gäwi sëlo amo gadoi bimolömelëla Melima säla ï.
36 Ami bea sälo udia afädëge sulo. Amoïe ëida Ana. Eda Fanueleïe idiwi, e fiida Asa. E dafidi dolö fila awäla dolöbalä gäheo i gifalädalïa sulo.
37 Amala salea ïe dolö amo baagoibua eda didalo sulo. Ïe gäheo ida nabülasi gödölasiïe odoai biyidia, eda sesalebefalï sulo. Eada segeyo afädë damula made, gobela ïlo mosöa awähamu aligilo. Molö made nala yose gasi esoage Godema adosamu filo sulo.
38 Segeyo amo gala e maala eage Godema nesegesa nelo. Amala sälahilä Godea udia dolö damula mosäia Yalusaleme beaha nefolalo amoli sulubadelama ea malö amoïe ado säla ïaha nelo.
Yosebe Nasalese obëgëi
39 Elea Dafidilo Geloiïe Ado säla negei dibe amo gadola hamosa maadelahilä malö amo ägüla Galili segeamadi hilile segea Nasalese gaamugi obëgëi.
40 Ami awäla nea Yesu e asigi gäwila geloi edela dawadigilo hedabi ema nobai. Godeïe obeägïla ugila negeloge ema dilo.
41 Gäheo i sulubadelagi Baagila Asi Segeyoïe molö molö amo gala Yesuïe eedo emele Yalusaleme awäha aligilo.
42 Yesu e gäheo i giwilasi baagilahilä molö molö mala dibe amo gadola hamola eege hiligila Yalusaleme asi.
43 Segeyo amo awäha maadeibua ele hele segea obëgësaleada malö maalïbu Yesu eda Yalusaleme ami neebe amoda eedo emelea helësëi made.
44 Eleada dolö odoa amolibalä afiaha gabula helësëlahilä ele segeyo afädë awäha nelo. Made beasebegi hobeala ele sosogo, elea dawa, amolibalä maaha walebelela hogoi.
45 Hogosa nea made melëlebe elea hohogola Yalusaleme bu obëgëi.
46 Elea hogosa neamu segeyo ohodoa awälahilä beahamelebe eda Godeïe mosöa säla olelelo amolia säsebe amo nabadigi, säla obëgëladigisa, ili mogogi sebe melï.
47 Yesuea ado säi amo nabaha sefolalo amolia e asigi edefade negei nea säla obëgëi amogi ili asigia fudugi.
48 Eedo emelea e beala asigia fudugilahilä emea ema sähalea, Nafege, dia alïma amo hamoi amoda mi edoïe amaila nabi. Diado alïda asigi säosäola di hogosa nelomelëla säla ï.
49 Amala säsebegi, ea elema nabahalea, Alia ne hogosologoda mi edoïe. Ne Nadoïe hamoi hamomolö misi neebewe alia dawadigi madelela nabi.
50 Ado amala säi amo nabalahilä gaso, elea ado amo mi goweïe säsebela fädäla made helësëi.
51 Amalahilä e elebalä Nasalese awäla beselagalala salea elea hamomola säsebe amo gadola ea hamosa maadesa nelo. Amo gadola hamosebegi emea ado säi amo sulubadela asigia helësësamu sulo.
52 Yesu e asigi gäwi ïe dawage hedabifalï fädäla aligisebegi Godeage udia dolöeage ema obeägï.