Ado Mala Hedabi Uluguea Dëdëi
1
Uluguea beba gowe Diofilasama dëdëla ï
1 Nilï neebeawi nelebo elö elöla dofä hamoi amo dolö yafiea dëdëmolöila helësësa nelomelë.
2 Amo hamoi melï amoliage, mala olelei amoliage, nelebo mi gäwila hamoi amo ilia nilïma säla ïmelë.
3 Amai amo, Dafidilo Diofilasao, nage mi gäwila hamoi amo hedabola helësëlahilä na dima mogola dëdëla ïmolö helësëimelë.
4 Na amo dëdëla ïmolö helësëi amoda dolö dafidi nelo amolia ado dima olelei amo dofä gabula helësëmäia ado amo dëdëla ïasisago.
Selesaia fii afädëa Segelaeama ado säla ï
5 Heledo eda Yudiaïe beaha aligilo gini nelo amo gaaluda, gobela ïlo afädëïe ëida Segelaea nelo. Eda gobela ïlo Abiaea beaha neloamadi gobela ïlo nelo. Ïe udia amoïe ëida Elisabede. Udia amoïe yaua mäuda Elono.
6 Eleda Godeïe siigi mogoi nea, Godea mala säla negei dibe amo sulubadela bëgëla awäla hamolo neada, Godeïe siigi nafade afädë hamolo made nelo.
7 Eleda malö made sulo. Mida, Elisabede ea malö ägülo made. Haua sulo. Amala salea helegela edei sali hamoi sulo.
8 Segeyo afädëgi gobela ïlo odoaea bedefa bedefala gobelo dibea ami Godeïe siigi gobela ïlo mosö dibea ami Segelaeaea hamoi hamosa nelo.
9 Dafidilo Geloiïe mosö auli gobela ïlo dibea ami gafisigä mosäia gobela ïmolö amo dolö nowea gobela ïmolöi walebelela gobela ïlo amolia ilile mala dibe amo gadola memelesamelebe Segelaeaea gobela ïmolö melï. Amalebe Segelaea e gobela ïlo mumusogi digala gobela ïaha nelo.
10 Odala ï gobesolo segeyo amo galada udia dolö yafie gegedolahilä ifo baagido segea nefolalea Godema adosa nelo.
11 Gobesa neebegi gafisigä mosäia gobela ïlo auli amoïe dafädimadi amogi Dafidilo Geloiïe selesaia fii afädë Segelaea neebea ami maala ulufadigi.
12 Segelaeaea selesaia fii ulufadigila neebe amo bealahilä fudugila bedäi.
13 Bedäsebegi selesaia fii amea ema sähalea, Segelaeao, dia bedämabu. Dia Godema adoi amo Godea nabimelë. Dïe udia Elisabedeada dolö malö afädë sogobamolömelë. Malö amoïe ëida Yone negemalo.
14 Dïe iso asigia edefademalä obeägïmolömelë. Malö amo ägüsegida udia dolö yafie nefolalebe amoliage edefademalä obeägïmolömelë.
15 Mida, Dafidilo Geloiïe siigi nea eda ëi sälo namolömelë. Eada wani ödäge gagaolo ödäge made molömelë. Eda emea ägüla made maala isogi sebea ami Gesami Hedabifalï ema nobai samolömelë.
16 Eada Isilale udia dolö yafie asigi besulasilahilä ilile Dafidilo Geloi Gode neebea sigi obëgëmolömelë.
17 Eda mala gaui geloi edefade Elaia nelo amo gadola eege amohï gadoi nea, hobeala Dafidilo Geloi misiäia eda dafidila awäha namolömelë. Dafidila awäha nea eada eedoea malö hedabola boba hamolasiladigi, udia dolö Godeïe ado mala dïgïla aulo neebe amoli asigi besulasila asigi gäwi neebe amolia helësëlo amo gadola ilia helësëmäia. Ea ili neala helësëlasimolömelë. Dafidilo Geloi misiäia beaha nea ea udia dolö neala hahamogila dadaiaha namolömelëla selesaia fii amea ema säla ï.
18 Amala säsebegi, Segelaeaea selesaia fii amoma säla obëgësalea, Neda edei sali hamoi, amase, nïe udiage sesalebe hamoi sebe ameada dia walio ado säi amoda dofä gabula na abilia helësëmolödula nabi.
19 Amala nabasebegi, selesaia fii amea säla obëgësalea, Neda Gabelelomelë. Neda Gode neebea ami aligilo. Gode hï nema ado hedabi amo gaula mosöla säsebegi na dima säi amo säla ïmolö gaula misimelë.
20 Amai amo, dia nabualo. Na ado säi amo dia dofä gabula helësëla made asigi äudäi ameada walio dïe nafi idi dofogahago. Hobeala dia bu adola made nea nelebo Godea hamomolömelëla na dima säla ï amo gausiala digasolo amo gala dia adomolömelëla säla ï.
21 Segelaeaea amo hamosa neebegi, udia dolö segea nefolalo amolia beaha nea häuai. Nea häuasebegi ilia e gobela ïlo mumuso isogi idogoi nelebo edo hamosa neadula säosäola helësëla asigia hogosa nefolalo.
22 Segelaea e segea doadigila fedai amo beahamelebe ado made ilibalä adomolöi made melï. Amo beala ilia helësësaleada Godegali gobela ïlo mumusogi idogoi sosoäla awäla melï gabula helësëi. Ea adoea sämolö amo ïliawai galebeda ea sämolö helësëi amo naaboea odobibila säla ï.
23 Holöfalï nelolahilä ea hamoi hamolo negei amo hamosa maadelahilä Segelaea e hï mosöa asi.
24 Hobeala salea ïe udia Elisabede e isogi malö fagulo hagulahilä aube bia mosöamu musügä sulo. Amala salea Elisabedea sähalea,
25 Dafidilo Geloia nema hedabi hamola ne beala ugila negei gabuwe. Udia dolö odoaea ne hewalasila dida hauala made sämolö gabumelëla säi.
Selesaia fii afädëa Melima ado säla ï
26 Elisabede e isogi malö fagulo hagui, aube gafeia baagila sebegi, Godea selesaia fii afädë, ëi Gabeleloma sähalea, Di Galiliïe sege gaamu, ëi Nasalese mosalola säi.
27 Udia dolïsa afädë, Yosebea nimolöïe säi sulo amo sebea ami, selesaia fii amea ado säla ïmolö asi. Yosebe eda, Isilale udia dolö beaha aligilo Gini Debidiïe yaua mäu nelo. Dolïsa amoïe ëida Meli.
28 Amala hamoi amo sebegi, selesaia fii amea awälahilä sähalea, Melie, neala aealasilo dibalä diamolöi diamiäiala sähago. Dafidilo Geloi dibalä gedola nea. Edefademalä obeägïsa namiäia, di neala obeägïlasimelëla säi.
29 Selesaia fii amea ado säi amo nabalahilä, Melia ado amo abodoïe sähadula asusugala, asigia edefademalä säosäola helësëla, hogosa sulo.
30 Amala helësësa sebegi, selesaia fii amea ema sähalea, Melie, bedämabio. Godea di helësëlahilä, dima obeägïsa neamelë.
31 Dïe isogi malö dubo samolömelë. Dia dolö malö dubo ägümolömelë. Malö amo ägüla maaseda, ïe ëida Yesu negemalo.
32 Malö amoda, dolö ëi sälo namolömelë. Udia dolö sulubadelaea sähalea, Eda Gode ilibia neebe amoïe malö neala sämolömelë. Dafidilo Geloi Godea Yesuïe mäu Debidi beaha aligilo gini nelo amo gadola, eege amo gadoi namolömelë.
33 Eada Yeigabaïe yaualali neebe amoïe sigi aligilo namolöi namolömelë. Ea beaha namolö amoda, beahamu namolöi namolömelëla säla ï.
34 Amala säla ïasebegi, Melia selesaia fii amoma naba obëgësalea sähalea, Neda dolïsa. Dolöbalä nawelo made saleawe. Ado walio säi amoda, abilia hamola hamomolödula nabi.
35 Amala nabasebegi, selesaia fii amea ema säla obëgësalea, Gesami Hedabifalï dima digalahilä, Gode Ilibia Neebe amoïe geloida, dima salugamolömelë. Amala hamomolö ameada, malö hedabi hïdo elöi amoda, Godeïe malö neala sämolömelë.
36 Dia nabualo. Di sosogo Elisabededa sesalebefalï sulo gaso, walio e fagulo hagui sebe amoda, dolö malö neegela ägümolömelë. Siiba, odoa ilia ema sähaleada, eda haua, malö madela sälo amo, walioda, e fagulo hagui sebegi, aube gafeia hä, baagimelë.
37 Godea nelebo hamomolöi made ulï, afädëda maademelëla säla ï.
38 Amala säsebegi, Melia ema säla obëgësalea, Neda Dafidilo Geloiïe hamoi hamolo udia saleawe. Dia walio ado nema säla ï amo gadola, nema hamosa maademalola säi. Amala säi amo nabalahilä, selesaia fii amo Meli e ami sebe bahïla asi.
Meli Elisabede bea asi
39 Selesaia fii amo asi baagido Meli e fodolofalï nowela Yudia sege gau dibe amo fedaladigi digaladigila awäha nelolahilä gaamu afädë dibea ami beselagalai.
40 Beselagalalahilä Segelaeaïe mosö mumusogi nogila digalahilä Elisabede sebea ami beselagalahalea nesamala säla olei.
41-42 Elisabedea Melia säla olei amo nabalahilä Elisabedeïe isogi malö dubo sulo amea fologoi. Gesami Hedabifalï Elisabedema nobalasisebegi Elisabedea ado gelolafalï sähalea, Melie, dida udia odoa sebe amo gadoi made. Godea dima edefademalä obeägïlasi gabu. Dia malö neegela ägümolö amomage Godea obeägïlasimolömelë.
43 Nada hedabi abodo hamoi amoïe nïe Dafidilo Geloi neebe amoïe eme di ne sebeawi misi.
44 Ne sebea di misimelëla säla olei amo nabalahilä malö dubo nïe isogi sulo amea obeägïla fologoimelë.
45 Dafidilo Geloia hamomolömelëla dima säi amo gadola dofä gausiala digamolömelë. Dia asigi afädëfalï negela sebegoeada di edefademalä obeägïlahilä samolömelëla säla ï.
Melia gë udäi
46 Amala säla ïasebegi, Melia sähalea,
Nïe iso asigia Dafidilo Geloiïe ëi gauia adahawe.
47 Nïe damula aulo Gode neebe amoma nïe iso asigia edefade obeägïsawe.
48 Mida, ne ïe hamoi hamolasilo dolïsa nagadaiala neebe amo hï melï gabio. Walio neebe amoliage hobea namolö amoliage Dafidilo Geloia negali obeägïlo ïla sämolömelë.
49 Mida, Gode iso gäwi geloi neebe amea hedabi edefade amo nema hamoi. Ïe ëida hedabifalï hïdo elöi eso si gadoi nea.
50 Udia dolö walio fifi asi sebeweliage, hobeala fifi moholö neebe amoliage, ili sulubadelaea ebalä bedälahilä nagadaiaha neebe amoli ea bobasëlahilä ugila negelo nea.
51 Ea ïe naabo geloia hamoi edefademalä hamoimelë. Udia dolöea gugusäla bimäialahilä hilidofalï hamomolö daiaha difolalo amoli nesiladigisebegi fisäla afädë afädëla balälela asimelë.
52 Beaha aligilo gini geloi nefolalo amolida ea neala nagadaialahilä, udia dolö nagadaiala nefolalo amoli neala ilibialasila ifosimelë.
53 Udia dolö sïdëa baagoi nefolalo amoligalida nelebo yafie ïmelë. Udia dolö nelebo yafie negei amolimada ea ilile nelebo amogi afädë made gaula ili badumu mosalaimelë.
54-55 Ea nilïle mäumage, Abalahamamage, Abalahamaïe yaua dafidi nelo amolimage, amase, hobeala fifi moholö neebe amolimage hamomolömelëla säla negei amo gadola bobasëla ïe hamoi hamolasilo Isilale ili helësëla ugila negeila Melia säla wagai.
56 Meli e Elisabedebalä aube ohodoa gadoi ami sulolahilä hï segea obëgëi.
Elisabedea Yone neegela ägüi
57 Elisabede e olobola sulolahilä giisi mosöa awäla dolö malö afädë neegela ägüi.
58 Neegela ägüimelëla säi amo nabalahilä ïe sosogo amoliage sege afädëgi ami fii amoliage Dafidilo Geloia e edefade bobasëla ugila negei gabula helësëlahilä iliage Elisabedeage hiligilaea obeägï obeägïsa nefolalo.
59 Ägüla misi segeyo gödö beselagalasolo amo gala ilia malö dubo amoïe gafodo amalela dagabolasimolöïe ägüla asi. Awälahilä ilia malö amoïe ëida hïle eedoïe ëi Segelaea negei.
60 Segelaea negesebegi malö amoïe emea ilima säla obëgësalea, Amala made. Malö goïe ëida Yone negedelämelëla säi.
61 Amala säsebegi, ilia ema säla obëgësalea, Di sosogo neebe amogida ëi go gadoi edaio afädë mademelëla säla ï.
62 Amala sälahilä ilia eedoma naaboea odobibila nabahalea, Dïe malö goïe ëida nowe negemolö helësësebela nabi.
63 Amala nabasebegi, ea ilima naaboea odobibila, Beba afädë neala ïmola säsebegi ilia ema dëdëlo beba afädë neala ïasebegi ea amogi dëdësalea, Malö goïe ëida Yonemelëla dëdëi. Amala dëdëi amo bealahilä ili fudugila olobo dadäla nefolalo.
64 Amo gaalu, fodolofalï Segelaea e nafi dagala bu adomolöfalï beala ea Godeïe ëi gauia adaha nelo.
65 Amalebe ebalä sege afädëgi ami fii amoli fudugila bedäi. Amala hamoimelëla Yudia sege gau dibeamadi amo sulubadela säla didigai.
66 Ado säi amo nabi udia dolö amolia asigia helësësaleada Dafidilo Geloiïe geloida malö amobalä dofä gelola neebe. Amalahilä ilia sähaleada, Malö ameada abodo gadoi hamomolö namolödula säha nelo.
Segalaeaea bea säi
67-79 (Aso, made dëdëi.)
80 Hobeala malö amo domalo asigi gäwi geloi edela aligi. Amalahilä Isilale udia dolö neebe amea siia bimäia e ulufadigimolö segeyo beselagalamäia beaha nea, eda sege nafade udia dolö aligilo made dibea ami nelo.