9
Kojugu cayara jamana kɔnɔ
1 E, ni ne tun bɛ se ka dugutagabagaw ta lonanjigibon dɔ sɔrɔ kongokolon kɔnɔ yi sa!
Ne tun bɛna bɔ ne ta mɔgɔw kɔrɔ,
ka ne yɛrɛ mabɔ o ra, ka taga fɔ yɔrɔjan;
sabu o bɛɛ ye jɛnɛyakɛbagaw le ye,
o bɛɛ ye mɔgɔjanfabagaw le ye!
2 «Kalan juru bɛ sama ka biɲɛ bon cogo min na,
o bɛ o nɛnkun sama ka faninya fɔ o cogo le ra.
O ma o ta fanga sɔrɔ jamana kɔnɔ can sababu ra dɛ!
O bɛ kojugu dɔ le fara kojugu dɔ kan lon o lon,
o fana t’a lɔn ko ne ye Ala ye;
Matigi Ala ko ten.
3 «Bɛɛ ye a yɛrɛ kɔrɔsi a teriw ra,
mɔgɔ si kana la a balema ra;
sabu balemaw bɛɛ bɛ ɲɔgɔn janfa,
teriw bɛɛ ye nafigiw le ye.
4 Bɛɛ bɛ faninya fɔ a mɔgɔɲɔgɔn ye;
mɔgɔ si tɛ can fɔra tuun.
O ka o nɛnkunw degi faninyatigɛ ra;
o ta kojugukɛ ka o baraka ban
5 O siginin bɛ faninya le cɛ ra;
o ta faninya kosɔn, o t’a lɔn ko ne ye Ala ye.
Matigi Ala ko ten.»
Ala ka kankari la a ta mɔgɔw ye
6 O kosɔn Fangatigi Ala ko:
«Ne bɛna o yeele tasuma ra i ko warigbɛ, ka o kɔrɔbɔ.
Ni o tɛ ne bɛ se ka mun wɛrɛ le kɛ ne ta dugumɔgɔw ra tuun?
7 O nɛnkunw bɛ i ko mɔgɔfagabiɲɛ dabɔnin;
faninya dɔrɔn le bɛ o da ra.
O b’a fɔ o mɔgɔɲɔgɔn ma ko hɛra bɛ yi,
k’a sɔrɔ o ta miiriya ye ka jan la a ɲa k’a laben.
8 Yala ne man kan ka nin kojuguw juru sara o ra wa?
Matigi Ala ko ten.
Yala ne man kan ka ne yɛrɛ dimibɔ nin siya ɲɔgɔn na wa?»
Kasi ni jusukasi
9 «Ne bɛna kasi ka ŋuna kuruw kosɔn;
ne bɛna maɲumanko dɔnkiriw la bɛganmarayɔrɔw kosɔn kongokolon kɔnɔ,
sabu yɔrɔ bɛɛ jɛnina, mɔgɔ si tɛ tɛmɛ yi tuun.
Bɛganw kasikan tɛ mɛnna tuun;
k’a ta kɔnɔw ra ka taga a bla kongosogow ra,
o bɛɛ tagara.
10 «Ne bɛna Zeruzalɛmu kɛ kabakuruton le ye,
k’a kɛ kongowuruw dogoyɔrɔ ye;
min ye Zuda duguw ye, ne bɛna o kɛ yɔrɔ lakolon ye,
mɔgɔ tɛna sigi yɔrɔ min na tuun.
11 Jɔn ye hakiritigi ye
min bɛ se ka nin kow faamu?
Matigi Ala da ka nin kow ɲafɔ jɔntigi le ye,
ni a bɛ se k’a ɲafɔ an ye?
Mun kosɔn jamana cɛnna,
k’a bɛɛ jɛni k’a kɛ i ko kongokolon,
mɔgɔ tɛ tɛmɛ yɔrɔ min na tuun?»
12 Matigi Ala ko: «O kɛra, sabu ne tun ka sariya minw yira o ra, o banna o sariyaw ra; o ma sɔn ka ne ta kumaw lamɛn, o m’a sira tagama fana.
13 O tora o yɛrɛ jusukun ta miirijuguw le kan, ka tugu Baali* ta jow nɔ fɛ, i n’a fɔ o bɛmaw ka o karan a ra cogo min na.
14 O kosɔn Fangatigi Ala, Izirayɛli ta Ala ko: Ne bɛna nin mɔgɔw baro ni jalaji le ye, ka flajugu kɛ o ta minji ra k’a di o ma.
15 Ne bɛna o janjan siya tɔw cɛ ra, o ni o bɛmaw si tun ma siya minw lɔn. Ne bɛna tugu o kɔ ni kɛrɛkɛmuru ye, fɔ ka taga o bɛɛ halaki ka ban pewu.»
16 Fangatigi Ala ko:
«Aw ye miiri! Aw ye sangakasibagaw wele ka na!
Muso minw ka sangakasi lɔn kosɛbɛ, aw ye o dɔw yɔrɔɲini ka na.
17 O ye teliya ka na kule an kunna
fɔ ka an ɲaw fa ɲaji ra,
fɔ ka ɲaji woyo ka bɔ an ɲaw ra.»
18 «Sabu ŋunakanw bɛ bɔra Siyɔn dugu kɔnɔ:
‹E, anw ta cɛnna pewu!
An marora dɛ!
Sabu an gbɛnna ka bɔ an ta jamana ra;
o ka an ta bonw bɛɛ benben.›
19 «E, musow, aw ye Matigi Ala ta kuma lamɛn!
A da bɛ min fɔ aw ye, aw ye aw torow dayɛlɛ ka o lamɛn.
Aw ye aw denmusow karan sangadɔnkiriw ra,
aw bɛɛ ye aw sigiɲɔgɔnw degi sukasi ra.
20 Sabu saya donna an ta bonw finɛtiriw fɛ,
a donna an ta bonɲumanbaw kɔnɔ;
a ka denw faga siradaw ra,
ka kanbelenw faga jamalajɛnyɔrɔw ra.»
21 «Yeremi, a fɔ ko Matigi Ala ko,
ko adamadenw suw bɛna yɛrɛgɛ dugu ma
i ko o bɛ nɔgɔ yɛrɛgɛ foro kɔnɔ cogo min na,
i ko siman minw benbenna simankanbagaw kɔ, mɔgɔ tɛ sɔrɔ ka minw tɔmɔ.»
Ala lɔnniya le ye hakiritigiya ye
22 Matigi Ala ko:
«Hakiritigi kana a yɛrɛ bonya a ta hakiritigiya kosɔn,
cɛfari kana a yɛrɛ bonya a ta cɛfariya kosɔn,
naforotigi kana a yɛrɛ bonya a ta naforotigiya kosɔn!
23 Nka ni mɔgɔ min b’a fɛ k’a yɛrɛ bonya,
o tigi y’a yɛrɛ bonya ko a ka hakiri sɔrɔ ka ne lɔn,
k’a lɔn ko ne le ye Matigi Ala ye,
ko ne bɛ ɲumanya ni can ni terenninya kɛ dugukolo kan
sabu o le ka di ne ye.
Matigi Ala ko ten.»
Siya minw ma o jogo yɛlɛma
24 «Wagati dɔ bɛ nana, Matigi Ala ko ten, siya minw kɛnɛsigira k’a sɔrɔ o jogo ma yɛlɛma, ne bɛna wuri olugu kama:
25 O ye Misirankaw, ani Zudakaw, ani Edɔmukaw, ani Amɔnkaw, ani Mohabukaw ye, o siya minw bɛɛ bɛ o bonbosi kɛrɛfɛyɔrɔw li, minw siginin bɛ kongokolon kɔnɔ, sabu o siyaw si ma kɛnɛsigi ka o jogo yɛlɛma; Izirayɛli jamana mɔgɔw fana jogo ma yɛlɛma.»