10
Batofɛn gbansanw ani Ala ɲanaman
1 Matigi Ala bɛ min fɔra aw kama, aw ye o lamɛn, aw Izirayɛlimɔgɔw!
2 Matigi Ala ko:
«Aw kana siya wɛrɛw ta kokɛcogow ladegi;
aw kana siran sankolo tagamasiyɛnw ɲa,
hali ni siya tɔw bɛ siranna o ɲa.
3 Siyaw ta landakow tɛ foyi ye.
O bɛ taga yiri tigɛ kongo kɔnɔ,
yirilɛsɛbaga b’a lɛsɛ ni yirilɛsɛnan ye.
4 O bɛ warigbɛ ni sanin kɛ k’a cɛɲa,
ka nɛgɛkuru dɔw kɛ k’a gbengben k’a lɔ,
janko a kana ben.
5 O alaw bɛ i ko kɔnɔgbɛnnan minw bɛ fifa foro kɔnɔ,
o tɛ se ka kuma.
Mɔgɔ le bɛ o ta,
ni o tɛ, o tɛ se ka tagama.
Aw kana siran o ɲa,
sabu o tɛ se ka kojugu kɛ,
o fana tɛ se ka koɲuman kɛ.»
6 E, Matigi Ala, ele bɔɲɔgɔnko tɛ yi!
I ka bon, i tɔgɔ baraka ka bon!
7 E, siyaw bɛɛ ta Masa, mɔgɔ juman le bɛ yi ko ele ɲasiran tɛ min na?
Bɛɛ ka kan ka siran i ɲa.
Siyaw ta mɔgɔ hakiritigiw bɛɛ ra,
ani o ta maraw bɛɛ ra
ele bɔɲɔgɔnko tɛ yi.
8 O bɛɛ ye nalomanw le ye, o bɛɛ ye hakirintanw le ye;
o ta batofɛnw tɛ se ka mɔgɔ karan foyi ra, sabu yiri dama lo.
9 O bɛ na ni warigbɛ gbasinin ye ka bɔ Tarisisi,
o bɛ bɔ ni sanin fana ye Ufazi.
Yirilɛsɛbaga bɛ fɛn dɔ tagamasiyɛn kɛ,
saninfagabaga boro b’a lalaga.
O bɛ o jow masiri ni faniɲuman bulamanw, ani a wulenmanw ye,
k’a sɔrɔ o bɛɛ ye adamaden dɔ ta hakiri nɔ le ye.
10 Matigi Ala le ye Ala yɛrɛ ye;
ale le ye Ala ɲanaman ye, ani Masa wuribari.
Ni a jusu bɔra, dugukolo bɛ yɛrɛyɛrɛ,
siya si tɛ se ka lɔ k’a ta dimiba makɔnɔ.
11 Aw y’a fɔ o ye ko ala minw ma sankolo dan, o ma dugukolo dan, ko lon dɔ o alaw bɛna tunu ka bɔ dugukolo kɔ kan, ka tunu ka bɔ sankolo jukɔrɔ.
12 Matigi Ala ka dugukolo dan a ta sebagaya baraka ra,
ka dunuɲa ju sigi a ta hakiritigiya baraka ra,
ka sankolo dan a ta faamuri baraka ra.
13 Ni a k’a ta sankurukan bɔ, jibaw bɛ lajɛn sankolo kɔnɔ,
a bɛ sankabaw lana ka bɔ fɔ dunuɲa danw na;
a bɛ sanmanamanaw bɔ sanji cɛ ra,
a bɛ fɔɲɔ labɔ a marayɔrɔw ra.
14 Adamadenw bɛɛ ye nalomanw le ye, o si tɛ ko lɔn;
saninfagabaga bɛ jo min lalaga, o maroya bɛ laban ka ale yɛrɛ sɔrɔ;
a bɛ o fɛnw lalaga ka mɔgɔw nɛgɛ le,
sabu nɛnɛkiri tɛ o fɛnw na.
15 Fɛngbansanw lo, baarakunntanw lo;
ni o ta kojugu saralon nana se, o bɛɛ bɛna halaki.
16 Nka Ala min bɛ Yakuba ta mɔgɔw fɛ, ale tɛ o cogo ra;
ale le ka fɛn bɛɛ dan.
Izirayɛli le ye a ta siya ye,
Fangatigi Ala, o ye a tɔgɔ ye.
Cɛnriba wagati sera
17 Aw ye aw ta doniw cɛ ka bɔ dugu ma,
aw juguw ka aw minw ta dugu lamini!
18 Sabu Matigi Ala ko:
«A flɛ, sisan kɔni,
ne bɛna nin jamana mɔgɔw firi fɔ yɔrɔjan;
ne bɛna sɛgɛ ben o kan ka o degu,
janko o juguw ye o mina.»
19 Zeruzalɛmu ko: «E, bɔnɔ ka ne sɔrɔ, ne banara;
ne ta jori dimi ka bon kosɛbɛ!
Ne tun b’a fɔra ko: Sɛgɛ sera ne ma,
nka ne ka kan k’a sɔnmina le.
20 Ne ta fanibon benna,
a sirijuruw bɛɛ tigɛtigɛra.
Ne dencɛw bɛɛ tagara ka ne to,
o si tɛ yi tuun;
mɔgɔ tɛ yi min bɛ se ka ne ta bon lɔ tuun,
k’a datugufaniw lawuri.»
21 Sagagbɛnbagaw kɛra nalomanw ye,
o ma Matigi Ala ta jɛnɲɔgɔnya ɲini;
o kosɔn o ta baara ma ɲa,
o ta bɛganw bɛɛ janjanna.
22 Aw ye mankan dɔ lamɛn! A bɛ surunyara ka na!
Wɔyɔkanba dɔ le bɛ bɔra sahiliyanfan jamana fan na.
O bɛna Zuda mara duguw ci ka o kɛ yɔrɔ lakolonba ye,
ka o kɛ kongowuruw dogoyɔrɔ ye.
Cira Yeremi ka Ala daari a ta jamana mɔgɔw ye
23 E, Matigi Ala, ne k’a lɔn ko adamaden ta dunuɲalatigɛ tɛ a yɛrɛ boro,
ko mɔgɔ tagamatɔ tɛ se k’a tɛmɛyɔrɔw latigɛ.
24 E, Matigi Ala, ne koro, nka i kana a dama tɛmɛ;
i kana a kɛ ni dimi ye, ni o tɛ, i bɛna ne halaki ka ban pewu.
25 Siya minw tɛ i lɔn o ta Ala ye, i ta dimi ben olugu kan,
ani mɔgɔ minw tɛ i tɔgɔ bato!
Sabu olugu le ka Yakuba ta mɔgɔw domu,
o ka o domu ka o ban pewu;
o k’a ta jamana cɛn, k’a kɛ yɔrɔ lakolon ye.