34
Elihu wì yo Yɛnŋɛlɛ li yɛn ma sin
1 Kona, a Elihu wì si sɛnrɛ ti lɛ ma yo fɔ:
2 Yoro kajɛnmbɛlɛ, yanla sɛnrɛ ti logo!
Yoro mbele jɛnmɛ pi yɛn ye yeri, ye nuŋgbogolo jan ye logo na yeri!
3 Katugu nuŋgbolo li ma sɛnrɛ ti sɛgɛsɛgɛ mari jɛn yɛgɛ ŋga na,
pa yɔn ki ma yaakara ti nɛnɛ mari tanwa pi jɛn ma fun.
4 Koni ŋga ki yɛn ma sin, we ko wɔ,
ŋga ki yɛn ma yɔn, waa ko jaa we yɛɛ sɔgɔwɔ.
5 Zhɔbu wìgi yo ma yo fɔ: «Mi yɛn sinŋɛ,
ɛɛn fɔ Yɛnŋɛlɛ lì je mbe tanga ki kan na yeri.
6 Ali mbege ta mi yɛn sinŋɛ, pe yɛn nala jate yagbogolo fɔ,
na wɛlɛgɛsaga yama pi woro na koo, ma sigi ta mii kapege pye.»
7 Lere wiwiin wi yɛn wa paa Zhɔbu wi yɛn,
wo ŋa wi maa yɛɛ nagawa sɛnrɛ yuun paa lere ma kaa na tɔnmɔ woo we?
8 Wo ŋa wì kapere pyefɛnnɛ pe pye wi tangayɛɛnlɛ,
ma lepeele pe pye wi pinlɛyɛɛnlɛ.
9 Katugu wi ma yo fɔ: «Na lere kaa ki jaa wi kala li Yɛnŋɛlɛ li ndanla,
tɔnli woro ki ni.»
10 Ki kala na, ye logo na yeri, yoro kajɛnmbɛlɛ wele,
tipewe pi laga yɛn ma lali Yɛnŋɛlɛ li ni,
kambasinŋge ki laga yɛn ma lali Yɛnŋɛlɛ na yawa pi ni fuun fɔ li ni.
11 Li ma sɛnwee wi sara mbe yala wi kapyegele ke ni,
li ma lere nuŋgba nuŋgba pyew wi sara mbe yala wi tangalɔmɔ pi ni.
12 Kaselege ko na, Yɛnŋɛlɛ laa tipege pye,
Yɛnŋɛlɛ na yawa pi ni fuun fɔ laa kiti kɔn mbe kasinŋge ki kɛ.
13 Ambɔ wi tara ti tegere ti kan li yeri?
Ambɔ wi dunruya wi ni fuun wi le li kɛɛ?
14 Na kaa pye Yɛnŋɛlɛ làa pye na jatere piin li yɛɛra wogo ko cɛ na,
ndɛɛ ki pye lili yinnɛ lo naa li yinwege wɔnwɔn pi sɔngɔrɔ maa wɔ we ni,
15 yaara yɛnwere pyew ti jɛn na ku mbe wɔ wa yɔnlɔ nuŋgba,
sɛnwee pyɔ wi jɛn na sɔngɔrɔ wa taambugɔ ki ni.
16 Zhɔbu, na kaa pye ma jilige, ma logo na yeri,
ma nuŋgbolo jan mala sɛnrɛ ti logo!
17 Naga yɛn ma, Yɛnŋɛlɛ li mbe ya cɛn dunruya wi go na mbege ta li yɛn ma kasinŋge ko panra wi le?
Naga yɛn ma, Yɛnŋɛlɛ na sinnɛ naa fanŋga fɔ, mboro mbe ya kiti kɔn wi to li na wi le?
18 Lo li maga yo wunluwɔ wa kan fɔ: «Ma woro yaraga ka,»
mbege yo fanŋga fɛnnɛ pe kan fɔ: «Ye yɛn lepeele!»
19 Yɛnŋɛlɛ laa fanŋga fɛnnɛ pe wɔ pe yɛ leele sanmbala pe ni,
laa si yarijɛndɛ tafɔ wi mbɔnrɔ fyɔnwɔ fɔ wi na,
katugu lo lì pe ni fuun shyɛn pe gbegele li kɛɛ ki ni.
20 Pe ma ku le yɔnlɔ nuŋgba li ni,
tara woolo pe ma yiri ma je yindɛgɛ na, kundigile pe ma tɔngɔ ma wɔ wa,
fanŋga fɛnnɛ pe ma kɔ ma wɔ wa, mbe sigi ta lere kɛɛ na gbɔn pe na.
21 Katugu Yɛnŋɛlɛ li yɛgɛ yɛn sɛnwee wi tangalɔmɔ pi na,
li yɛn na sɛnwee wi yɔngɔlɔ ke ni fuun ke yaan.
22 Diwi wo wa woro wa nakoma kunwɔ pi diwi wo wa woro wa,
ŋa tipege pyefɛnnɛ pe mbe ya lara wa wi ni.
23 Yɛnŋɛlɛ lii jori mbe lere kala wele mbe mɔ,
mbe si ka jɛn mbe kiti kɔn wi na wa li yɛɛ yɛgɛ sɔgɔwɔ.
24 Li ma fanŋga fɛnnɛ pe jan laa cɛn mbaa yewe pe wogo na,
mbe si pele yɛgɛ tɛgɛ wa pe yɔnlɔ;
25 katugu lì pe kapyegele ke jɛn,
li ma pe jan yembinɛ ma pe tɔngɔlɔ.
26 Li ma pe gbɔn lere pyew wi yɛgɛ na,
paa lepeele yɛn.
27 Katugu pàa pe yɛɛ laga Yɛnŋɛlɛ li na,
pe sila yɛnlɛ mbe tanga li koŋgolo ke ni fuun ke na.
28 Pàa ti a fyɔnwɔ fɛnnɛ pe gbelege mbe sagawa ja kì gbɔn wa li na,
a lì mbele pe yɛn tege ni pe gbelege ki logo.
29 Na Yɛnŋɛlɛ li ka pyeri lii yaraga ka pye, ambɔ wi mbe ya mbeli jɛrɛgi?
Na li ka li yɛgɛ ki lara, ambɔ wi mbe ya mbeli yan?
Konaa ki ni fuun, li maa cɛngɛlɛ ke kɔrɔsi yɛgɛ ŋga na, pa li maa sɛnwee piile pe kɔrɔsi ma;
30 jaŋgo mbele pe woro na fyɛ Yɛnŋɛlɛ li yɛgɛ, mbe pe yɛgɛ kɔn wa ka ka cɛn fanŋga ki na,
konaa paga ka pye paa pɛnɛ yɛn tara woolo pe na.
31 Ndɛɛ ki pye lere wa mbe ja ya mbege yo Yɛnŋɛlɛ li kan mbe yo fɔ:
«Mìlan kapege ki jɔlɔgɔ ki jɔlɔ makɔ, mi se kapege pye naa.
32 Yaraga ŋga mi woro na yaan, ki naga na na,
na kaa pye mi kambasinŋge pye, mi se ka pye naa.»
33 Naga yɛn ma, mboro ŋa mà je Yɛnŋɛlɛ li kapyegele ke na,
mbe yala ma jatere wi ni, li daga mbe ki lerefɔ wi le jɔlɔgɔ wi le?
Mboro ma daga mbe ka yo, mi ma.
Ŋga mà jɛn ki yo na kan!
34 Leele mbele pè jilige,
mbe pinlɛ kajɛnmbɛlɛ mbele pe yɛn na nuru na yɔn na pe ni, pe yaa kanla pye fɔ:
35 «Zhɔbu wi yɛn na para jɛnmɛ fu,
tijinliwɛ woro wa wi sɛnrɛ ti ni.
36 Ki kala na, ki daga Zhɔbu wi wamawelewe pi pye wi na fɔ sa gbɔn wa pi kɔsaga ki na,
katugu wùu yɔn sogomɔ pi kan paa lepee yɛn.
37 Katugu wi yɛn na yinrigi na jege, na ka tari wa wi kapege ki na,
wi yɛn na sɛnlɛgɛrɛ yuun Yɛnŋɛlɛ li na, maga kan we jatere wi yɛn na kɔɔn shyɛn we na.»