33
Elihu wì yo Yɛnŋɛlɛ
li maa sɛnwee
wi nari jɔlɔgɔ sanga ni
1 Koni Zhɔbu, na sɛnrɛ ti logo na yeri!
Nuŋgbolo jan mala sɛnrɛ ti ni fuun ti logo!
2 Wele, mi yaa na yɔn ki yɛngɛ mbe para,
mi yaa na yɔn sɛnrɛ ti yo.
3 Kaselege ŋga ki yɛn wa na kotogo na, ko mi yaa yo,
jɛnmɛ mba pi yɛn na ni, po sɛnrɛ mi yaa yo wa na yɔn mboo filige.
4 Yɛnŋɛlɛ li yinnɛ lo lìlan gbegele, Yawa pi ni fuun fɔ wi yɔn tifɛlɛgɛ ko kìgi kan mi yɛn yinwege na.
5 Na kaa pye ma mbe ya mbanla yɔn sogo,
ma yɛɛ gbɛgɛlɛ ma yere na yɛgɛ sɔgɔwɔ,
mɔɔ woyoro ti yo!
6 Wele, mi naa mboro ni we yɛn ja Yɛnŋɛlɛ li yɛgɛ na,
katugu mi fun joro pè tɛgɛ mala fanri.
7 Ki kala na, kii daga ma sunndo wila kɔɔn maa seri na yɛgɛ sɔgɔwɔ,
mi se ya mbanla fanŋga ki taga ma na.
8 Mà para, na nuŋgbogolo yɛn ki sɛnrɛ ti na,
ma sɛnyoro mìri logo.
9 Mà yo fɔ: «Mi yɛn kpoyi ma pye kapege fu,
mi yɛn ma yala, kajɔɔgɔ kpɛ woro na na.
10 Konaa ki ni fuun, Yɛnŋɛlɛ li yɛn nala jɛrɛgisaga jaa,
li yɛn nala jate paa li jugu yɛn.
11 Lìlan tɔɔrɔ ti le ŋgbɛɛrɛ na,
li yɛn nala torosaga pyew ki kɔrɔsi.»
12 Mi yɛn nɔɔ yɔn sogo Zhɔbu naga yuun ma kan fɔ tanga woro ma yeri wa ki kala na li ni,
katugu Yɛnŋɛlɛ lì gbɔgɔ ma wɛ sɛnwee wi na.
13 Yiŋgi na ma nɛɛ kendige woo li ni,
fɔ li woro na li kapyegele ke pyego ki yuun lere kan?
14 Yɛnŋɛlɛ li ma para yɛgɛ ka na wagati wa ni,
mbe ka para yɛgɛ ka yɛgɛ na wagati wa ni, ɛɛn fɔ sɛnwee wo wila laga kɔrɔsi.
15 Li ma para sɛnwee wi ni wɔɔnrɔ na, naa yariyanra ni yembinɛ,
sanga ŋa ni sɛnwee wi ma wɔnlɔ ma ku we,
sanga ŋa ni wi ma pye ma sinlɛ na wɔnlɔ wa wi sinlɛyaraga ki na we.
16 Ko sanga wowi li ma sɛnrɛ le sɛnwee piile pe nuŋgbolo,
mbe nagawa kan pe yeri jɛŋgɛ;
17 jaŋgo mbe sɛnwee wi laga wi kapyere tijangara ti na,
mboo shɔ yɛɛ gbɔgɔwɔ pi kɛɛ.
18 Ki ka pye ma, wi yaa wi yɛɛ shɔ fanga ki kɛɛ,
konaa mboo yɛɛ shɔ sɔgbɔ kunwɔ pi kɛɛ.
19 Mbe taga wa ko na, Yɛnŋɛlɛ li ma yama tɛgɛ ma lere wa koro, mboo ta sinlɛsaga wa wi fuuro ti na;
kona wi wire ti maa seri wi na wɛrɛwɛ pi kala na.
20 Yaakara tila tanla wi yɔn naa,
ali yaakara tanra ti la ma kɔ wi na.
21 Wi ma cɔgɔ ma cɛn kɛkɛlɛkɛ,
wi kajeere nda ti sila pye na yaan, koni wi ma koro kajeere.
22 Ko sanga wo ni, wi ma yɔngɔ fanga ki ni,
wi yinwege ki ma pye kunwɔ mɛrɛgɛ wi kɛɛ na.
23 Ɛɛn fɔ, na ki ka pye mɛrɛgɛ wa yɛn le ki naŋa wi tanla,
na mɛrɛgɛ nuŋgba pe ka yiri wa Yɛnŋɛlɛ li mɛrɛgɛye mbele kasulumbolo pe waga kele (1 000) sɔgɔwɔ,
mbe kaselege konɔ li naga ki naŋa wi na,
24 na ko mɛrɛgɛ wo kaa yinriwɛ ta, mbe Yɛnŋɛlɛ li pye fɔ:
«Wi shɔ wiga ka ta mbe tigi wa fanga ki ni,
katugu mùu go shɔgɔ sara wi ta.»
25 Kona wi wire ti ma kanŋga ma pye paa wi punwɛ sanga wire ti yɛn,
wi ma sɔngɔrɔ ma pye paa wi lefɔnrɔ sanga wi yɛn.
26 Wi ma Yɛnŋɛlɛ li yɛnri, li maa yɛnrɛwɛ pi logo;
wi ma kari wa li yɛgɛ sɔgɔwɔ yɔgɔrimɔ ni,
katugu Yɛnŋɛlɛ lo li ma sɔngɔrɔ na sɛnwee wi jate naa lesinŋɛ.
27 Ki lerefɔ wi maa yuuro koo leele pe yɛgɛ na na yuun fɔ:
«Mìla kapege pye, mi sila tanga kasinŋge ki na,
ɛɛn fɔ ŋga kila daga mbe pye na na, Yɛnŋɛlɛ lii ko pye na na.
28 Yɛnŋɛlɛ lìlan shɔ, jaŋgo mi ka ka tigi wa fanga ki ni,
kì pye ma, mi yɛn yinwege na, mi yɛn na yanwa pi yaan.»
29 Wele, Yɛnŋɛlɛ lo li maa ko ki ni fuun ŋga ko piin sɛnwee wi kan,
li maga pye pyesaga shyɛn, maga pye pyesaga taanri,
30 jaŋgo mbe sɛnwee wi yinwege ki shɔ mbege wɔ wa fanga ki ni,
jaŋgo mbe weele pe yanwa pi yirige wi kan.
31 Koni Zhɔbu, nuŋgbolo jan ma logo na yeri,
pyeri maga yaga mi yaa para.
32 Na kaa pye sɛnrɛ yɛn ma yeri mbanla yɔn sogo, ti yo!
Ma para, katugu ki yɛn mala ndanla mbege yan ma tanga ta.
33 Na kaa si pye sɛnrɛ si woro ma yeri, ma logo na yeri!
Ma pyeri mi yaa ma naga kajɛnmɛ pi ni.