19
ጾሳይ ጽሎተꬃ አዋ
ዛማረቱዋ ካፖ የጸቴዳ፥ ዳዊታ ማዝሙርያ።
1 ሳሎቱ ጾሳ ቦንቹዋ ሃሳዪኖነ
ሳሎቱዋ ጉፋንꬁ እ ባረ ኩሽያን ኦꬄዳዋ አዋዬ።
2 እት ጋላሳይ የንኮ ጋላሳዉ ሄዋ ኦዴ፤
እት ቃማይካ የንኮ ቃማዉ ኤራተꬃ ቆንጭሴ።
3 ሃሳይ ዎይ ቃላይ ባዋ፤
ኡንቱንቱ ኮሻይካ ስሰተና።
4 ግዶፐካ፥ ኡንቱንቱ ሃሳያ ኮሻይ ሳኣ ኡባን ላለቴዳ፤
ኡንቱንቱ ቃላይካ ሳኣ ጋጻ ጋኬዳ።
ጾሳይ አዋይ ደእያ ሳኣ ሳሉዋን ጊግሴዳ።
5 ናሸቲደ ካረ ሶፐ ከስያ ምሽራዳን፥
ዎꬃ ናስያዉ ጊጌዳ ዎꬃንቻዳን፥
አዋይ ዎንታ ዎንታ ከሴ።
6 አዋይ እት ባጋ ሳሉዋ ጋጻፐ ሞኪደ፥
ሀራ ባጋ ሳሉዋ ጋጻ ጋካናስ ቤ፤
አ ሆኡዋፐ ጌምያዌ አያይነ ባዋ።
7 መꬍና ጎዳ ህጊ ሱረ፤
ሸምፑዋ ዛሬ።
መꬍና ጎዳይ ኦድያዌ አማነትያዋ፤
አኬካይ ፓጬዳዋንቶ ኤራተꬃ እሜ።
8 መꬍና ጎዳ ዎጋይ ልከ፤
ዎዛና ናሸቼ።
መꬍና ጎዳ አዛዙ ጌሻ፤
ዎዛና ፖእሴ።
9 መꬍና ጎዳዉ ያይያዌ ጌሻተꬃ፤
ሄዌ መꬍናዉካ ኤቂድ ደእያዋ።
መꬍና ጎዳ ፕርዳይ ቱማነ ጽሉዋ።
10 ዎርቃፐነ ዋላክ ባይና ዎርቃፐ አꬊደ ዶሰቴ፤
ኤሳፐነ ኤሳ እልሉዋፐ አꬍ ማልኤ።
11 ቃይ ታና ነ ቆማ ናገታናዳን ዞሬ፤
ነ ህግያ ናጉ ዳሮ ጎኤ።
12 ባረ ሁጲያ ባላ ደምያዌ ኦኔ?
አቤት ጾሳዉ፥ ጌሜዳ ናጋራፐ ታና ጌሻ።
13 ቃይ ታን፥ ነ ቆማይ፥
ጻላን ናጋራ ኦናዳን፥
ኔን ታና ናጋ።
ታና ናጋራዉ ሞድሶፓ፤
ሄ ዎደ ታን ሱረ ግዳደ፥
ዎልቃማ ባይዙዋፐ ጌያና።
14 አቤት መꬍና ጎዳዉ፥ ታ ዎጋ ዛላዉ፥
ታና ዎዜዳዎ፥
ታ ዶናፐ ከስያ ቃላይነ
ታ ዎዛና ቆፋይ ኔና ናሸችያዋ ግዶ።